Nthanthi 12
12
1We yose wakwanja kuvwiya watanja chinjeru,
kweni mweniyo watinkha kuchenjezgeka ndi bereŵeza.
2Munthu wamampha wasaniya mwaŵi kutuwa ku Ambuya,
kweni munthu wa vipangu viheni ŵatumususka.
3Munthu kuti wakhozgeka ndi mphurupuru cha,
kweni msisi wa urunji kuti underezgekengepo cha.
4Muwoli wamampha nchisoti cha mrumi wake,
kweni mweniyo watole soni we uli nkhuvunda mu viwanga vya mrumi wake.
5Maghanaghanu gha murunji nga kurunjika;
vipangu vya wamphulupulu vyakupusika.
6Mazu gha wa mphurupulu ghakhazga ndopa,
kweni mlomo wa akunyoroka utaska ŵanthu.
7Wamphulupulu ŵathereskeka ndipo ŵatuŵapo so cha,
kweni nyumba ya murunji yikamanga.
8Munthu warumbika kwakuyana ndi chinjeru chake chamampha,
kweni mweniyo ngwa muwongo wakulandizga wasekeka.
9Wamamphaku ndi munthu wakujiyuyuwa mweniyo watijitataliya kwakuruska
mweniyo watijipaska ula kweni walivi chiŵande.
10Munthu murunji waphwere umoyo wa chiŵetu chake,
kweni lisungu la wamphulupulu ndi nkhaza.
11Mweniyo walima munda wake wakaŵanga ndi viŵande vinandi,
kweni mweniyo wandondoloska vyambura kanthu walivi chinjeru.
12Sonjo wa nthazi wa wamphulupulu wabwanganduka,
kweni msisi wa murunji utuma gwa.
13Munthu muheni watghika ndi kusovya kwa milomo yake,
kweni murunji wathaŵako ku suzgu.
14Kutuwa ku chipasi cha mazu ghake munthu wakhorweskeka ndi umampha,
ndipo nchitu ya janja la munthu yiwere ku mweneko.
15Nthowa ya wakupusa njamampha mu maso gha mweneko,
kweni munthu wazeru wategherezga ku chisambizgu.
16Kukalipa kwa wakupusa kuziŵika ruŵi,
kweni munthu wakuphwere wapatana ndi kutukana.
17Yo wakamba uneneska wapaska ukaboni wakuneneskadi,
kweni kaboni mutesi wakamba kupusika.
18Walipo mweniyo mazu ghake ngaruŵi ghe uli nkhulasa kwa lipanga,
kweni lilime la wazeru lituza ndi kuchizga.
19Milomo ya uneneska yijaliriya muyaya,
kweni lilime lakupusika nda nyengo yimanavi.
20Kupusika kwe mu mtima waku wo ŵapanga uheni,
kweni ŵeniwo ŵarongoso umampha ŵendi kukondwa.
21Wakurunjika kuti katumuwiya kaheni cha,
kweni ŵaheni ŵazazika ndi suzgu.
22Milomo yitesi mbukazuzi ku Ambuya, kweni ŵeniwo ŵachita
kwamagomekegeka ndi likondwa lawo.
23Munthu wakuphwere wabisa chinjeru chake,
kweni ŵakupusa ŵamemeza kupusa kwawo.
24Janja la wakutakataka likausanga,
penipo mukata wakaŵikikanga ku nchitu yakuchizgika.
25Maghanughanu mu mtima wa munthu ghatimusiskiya pasi,
kweni limazu lamampha litumukondweska.
26Munthu murunji watuwako ku uheni,
kweni nthowa ya wamphulupulu yituŵalandizga.
27Munthu mukata kuti wakayikonga cha nyama yake,
kweni munthu wakutakataka yo wakalondanga chuma chakuzirwa.
28Mu nthowa ya urunji mwe umoyo,
kweni nthowa ya kunanga yilongozge ku nyifwa.
Bible Society of Malawi