Nthanthi 11
11
Ŵarunji ndi ŵalakwi
1Mweso wakupusika mbukazuzi ku Ambuya,
kweni mweso wakunyoroka ndi likondwa lawo.
2Asani patuza kujikuzga pavuli patuza chilengesku;
kweni pamoza ndi wakujiyuyuwa ndi zeru.
3Unthu wakufikapo wa wakunyoroka utuŵarongozga,
kweni kubende kwa ŵakunyenga kutuŵananga.
4Mauromba kuti ghatanduwa cha mu zuŵa la ukari,
kweni urunji upozomoska ku nyifwa.
5Urunji wa wambura kalema unyoroska nthowa yake,
kweni wa mphulupulu zitumuwiska mphulupulu za mweneko.
6Urunji wa wakunyoroka utuwapozomoska,
kweni ŵakunyenga ŵakoloka
umukoli, ndi makhumbiru ghawo.
7Asani wamphurupuru wafwa,
gomezgu lake liwala, ndipo gomezgu la ŵambura uchiuta ligota pawaka.
8Murunji wataskika ku suzgu,
ndipo wamphurupuru waseremo mu malo ghake.
9Ndi mlomo wake munthu yo ngwambura kuziŵa Chiuta wanguziŵakunanga muzengezgani wake,
kweni ndi chinjeru ŵarunji ŵataskika.
10Asani vinthu vyose vituŵa umampha ndi murunji msumba ukondwa;
ndipo asani wamphulupulu wafwa patuŵa chiwawa chakukondwa.
11Ndi chitumbiku cha wakunyoroka msumba ukuzgika,
kweni uthereskeka ndi mlomo wa wamphulupulu.
12Yo wayuyuwa muzengezgani wake walivi chinjeru,
kweni munthu wakuwamo waja chisisi.
13Yo wayingayinga uli ndi mwendanato wasumuwa vya kuubende,
kweni mweniyo ngwamagomekezgeka mu mzimu wasunga kanthu kukabisa.
14Penipo palivi mulongizgi ŵanthu ŵatuwa;
kweni mu unandi wa zinduna mwe chimangu.
15Yo wajariya unkhoswe mlendo wakakomwanga nawo,
kweni mweniyo watinkha unkhoswe we umampha.
16Munthukazi wa wezi waronde ulemu,
ndi ŵanthu ŵandeu ŵasaniya uromba.
17Munthu mweniyo ngwa wezi watijisakatiska, kweni munthu mukari watijipweteka yija.
18Munthu wa mphurupu watanduwa mphotu yakupusika,
kweni mweniyo wamija urunji waronde mphotu yeneko.
19Mweniyo wakoreska mu urunji wakajanga wamoyo,
kweni mweniyo wachimbiriya uheni wakafwanga.
20Ŵanthu ŵa miwongo yakurandizga mbukazuzi ku Ambuya,
kweni wo mbakurunjika mu nthowa zawo wakondwa nawo.
21Uziŵiske, munthu muheni kuti walekengepo cha kulangika,
kweni ŵeniwo mbarunji wakataskikanga.
22Uli ndi mphete ya golide pa mphunu ya nkhumba
ndimu walili munthukazi wakutowa yo walivi kateskeru.
23Kunweka kwamurunji kumaliya mu umampha pe,
gomezgu la wa mphurupuru mu ukari.
24Munthu yumoza wapaska kwa wanangwa,
kweni vyose vikuwa kusambasa ukongwa;
munyake wakaniriya chenicho wangapaska,
ndipo wakomwa vichimusoŵa.
25Munthu mwanangwa wakalemeranga,
ndipo mweniyo wadiriya maji nayo wakadirikiyanga maji.
26Ŵanthu ŵatimutemba mweniyo wakaniriya kurgha,
kweni thumbiku le pa mutu waku yo waguliska kurgha.
27Mweniyo wapenja umampha kwarwana wapenja mwaŵi,
kweni uheni utuza kwaku yo watuupenja.
28Mweniyo wagomekezga mu uromba wake wakamilanga,
kweni murunji watipitiyenge uli ndi jani liŵisi.
29Mweniyo wasuzga ŵa nyumba yako wakahalanga mphepo,
ndipo wakupusa wakaŵanga muteŵeti wa ŵazeru.
30Chipasi cha ŵakurunjika ndi muti wa umoyo,
kweni uchikanamaranga utuzgapo maumoyo.
31Asani murunji walonde thayu pa charu,
naku wamphulupulu ndi muheni kuŵenge uli.
Bible Society of Malawi