Nthanthi 10
10
Nthanthi zakupambana-pambana
1Nthanthi zaku Solomoni.
Mwana wazeru wakondwereska awiske,
kweni mwana wakupusa nchitima ku anyina.
2Vyumba vyakusakatika ndi
mphulupulu kuti vitanduwa kanthu cha,
kweni urunji utaska ku nyifwa.
3Ambuya kuti azomerezga kufwa ndi nja cha,
kweni aziŵanizga kunweka kwa wamphulupulu.
4Janja lakutomboloka lipaska ukavu kweni janja la warwana liremereska.
5Mwana yo wawunjika mu chihanya ngwazeru,
kweni mwana mweniyo wagona pa chivuna walengeska.
6Vitumbiku vye pa mutu wa murunji kweni mlomo wa wamphulupulu ubisilizga ndeu.
7Chikumbusku cha murunji ndi thumbiku,
kweni zina la wamphulupulu likavundanga.
8Wazeru mu mtima wakaphwerenga marangu,
kweni wakupusa wavibwetu wakanangikanga.
9Mweniyo watenda mu ukongorekwa
watenda ndi kuvikirika kweni wanyongoroska nthowa zake wabowozgekenge.
10Mweniyo wakupizga jiso lake watamba suzgu,
kweni mweniyo wasuska ndi kukhwima mtima wachitika chimangu.
11Mlomo wa murunji nchisima cha umoyo,
kweni mulomo wa wamphulupulu ubisilizga ndeu;
12Kutinkha kuyuska homwa,
kweni chanju chivimba vifukwa vyose.
13Pa mlomo waku yo ngwakuwamo pasanirika zeru,
kweni ndodo nja pa msana paku yo walivi chinjeru.
14Ŵanthu ŵazeru ŵasunga kuziŵa,
kweni kubwebweta kwa wakupusa kutuza ndi phasulu pafupi.
15Chuma cha munthu muromba ndi msumba wake wakukho,
usauchi wa ŵakusauka ndi phasulu lawo.
16Mphoto ya wakurunjika yirongozge mu umoyo,
chanduwu cha wa mphulupulu nkhu uheni.
17Mweniyo waphwere kusambizga we munthowa yaku umoyo,
kweni mweniyo wakana kususkika wapulukiya.
18Mweniyo wabisirizga kutinkha
wendi milomo yitesi, ndipo mweniyo watundula kwa utesi ngwa kupusa.
19Asani mazu nganandi, kusovya kuti
kutuwa patali cha, kweni mweniyo wasunga milomo yake ngwazeru.
20Lilime la murunji ndi siliva wakusankhika.
Muwongo wa wamphurupuru utenere kamanavi.
21Milomo ya ŵakurunjika yihiŵa ŵanandi,
kweni ŵakupusa ŵafwiya kuwura chinjeru.
22Chitumbiku cha Ambuya chisakatiska,
ndipo kuti asazgiyako chitima cha kwaku cho.
23Kuchita uheni kwenge ndi saza ku wakupusa
kweni kachitidu kamampha kakondweska munthu wa vinjeru.
24Chenicho watopa wamphulupulu chikazanga paku iyo,
kweni chenicho wanweka murunji chikapaskikanga.
25Asani lilondo lakapo wamphurupuru waŵapo so cha,
kweni murunji wajinthika muyaya.
26Mo wachitiya vinigara ku minyu,
ndi usi ku maso, viyo ndimu walili mukata kwaku wo ŵatimutuma.
27Kopa Ambuya kutandaniska umoyo,
kweni virimika vya wamphurupuru vikaŵanga vifupi.
28Chigomezgu cha murunji chimaliya mu kukondwa,
kweni cho wagomezga wamphurupuru chimaliya pa waka.
29Ambuya ndi linga kwaku mweniyo nthowa yake njakunyoroka,
kweni ndi phasulu ku wakuchita uheni.
30Murunji kuti wakanderezgekangapo cha,
kweni wamphurupuru kuti wakajanga mu charu cha.
31Mlomo wa murunji, utuzga zeru,
kweni lilime lakulandizga likadumulikanga.
32Milomo yamu runji yiziŵa chenicho nchamarondeka,
kweni mlomo wa wamphurupuru uziŵa chenicho nchakulandizga.
Bible Society of Malawi