ŴaHebere 8
8
Yesu Mzukuru Widu Mura
1Kweni mwaku vyenivyo vyakambika fundu yeneko njeniyi: te nayo Mzukuru Mura waviyo, mweniyo waja pasi ku marghe gha chitengu chaufumu ukurukuru mu machanya, 2mliska wa vyakupaturika ndi wa chihema chenecho, chenicho wangujintha Mbuya, munthu cha. 3Pakuti mzukuru mura yose wamikikiya kwachipereka mipasku ndi so visopu: viyo kukhumbikwa kuti mwenuyu waŵe ndi kanthu ko wangapereka. 4Ndipo asani wenga panupasi, mphanyi kuti wanguŵa mzukuru kose cha, po ŵalipo ŵakupereka mipasku mwa dangu. 5Weniwo ŵatataliya chandiru ndi chizgezge cha vyakuchanya, nge ndimo ŵangulangulikiya Mosese po wenga pafupi kuzenga hema lo: chifukwa watiti, “Alere, kuti uchite vyose uli ndi chandiru cho chingurongoleke iwe mu phiri lo.” 6Kweni sono wafikako ku umirizi wakuzungura, uli ndimo so ndi mwendamukati wa chipanganu chakuruska, chenicho chalangulika pa mapanganu ghakuruska. 7Chifukwa asani chipanganu chakudanga chiya chinguŵa chambura kafukwa, mphanyi kuti ghangupenjeka cha malo gha chachiŵi.
8Chifukwa pakuŵasuska watiti,
“Awonani, mazuŵa ghatuza, atiti Ambuya,
ndipo ndifiskenge ku nyumba yaku Yisraele
ndi ku nyumba yaku Yuda chipangano chifya:
9kwakulingana ndi chipangano chenicho ndinguchita ndi auskeu cha mu zuŵa lo ndinguŵakole janja
kwachiŵatuzga mu charu cha Egipiti,
pakuti iwo ŵengavi kujaririya muchipanganu changu,
ndipo ine ndingureka kuŵaphwere, atiti Ambuya.
10Pakuti chenichi nchipanganu chenicho ndichitenge
ndi nyumba yaku Yisraele
pavuli pa mazuŵa yagha, atiti Ambuya:
ndiŵikenge marangu ghangu mu vinjeru vyawo,
ndipo pa mitima yawo ndighalembenge;
ndipo ndiŵaŵiyenge Chiuta,
ndipo iwo ŵandiŵiyenge khamu:
11ndipo kuti ŵarunguchizganenge chamunthu yose ndi mwanase wake,
ndi munthu yose ku mbali wake, kuti,
‘Ziŵanga Ambuya.’
Pakuti wose ŵakandiziŵanga ine,
kutuwa ku mumana mpaka ku mura waku wo.
12Pakuti ndiŵiyenge walisungu ku maubendezi ghawo
ndipo vilakwa vyawo kuti ndikumbukenge so cha.”
13Mu kukamba, chipanganu chifya, wakoteska chakudanga cho. Kweni chenicho chakukota ndi nchakukaramba che pafupi kuzirimitiya.
Currently Selected:
ŴaHebere 8: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
