ŴaHebere 7

Mzukuru Melkizedeke

1Pakuti mwenuyu Melkizedeke, karonga waku Salemu, mzukuru waku Chiuta wamdengwedi, mweniyo wangukumana ndi Abrahamu wachiwe ku kubaya ŵakaronga, ndi wangumtumbika, 2kwaku mweniyo nayo Abrahamu wangugaŵiya cha chichumi chaku vyose (wakung'anamuka danga, Karonga wa Urunji, ndi so pavuli, Karonga waku Salemu, ndikwesa, Karonga wa Chimangu; 3wambura wiske, wambura nyina, wambura fuku, wambura chingana nchiyambu cha mazuŵa chingana mbumari wa umoyo, kweni wakulinganizgika ku Mwana waku Chiuta), wajaririya mzukuru ku muyaya.

4Kweni lereni mo wanguŵiya mukuru yo, kwaku mweniyo Abrahamu, aseku wo, wangupaska chichumikiru chamu vyamutu vya maskowu. 5Ndipo wo ŵamu ŵana ŵaku Levi, wo ŵaronde uzukuru, ŵenalo langulu lakusonkha uli ndi dangu vyachichumi ku khamu lo, ndikwesa, ku ŵabali ŵawo, chingana mbakutuliya mu viunu vyaku Abrahamu: 6kweni yo ngwambura kutamulika wa fuku laku iwo wasonkheska Abrahamu chachichumi, ndipo wamtumbika yo wenga ndi mapanganu. 7Kweni kwambura suskanu kose chimana cho chitumbikika ndi chamamphako. 8Ndipo panu ŵanthu ŵamafwika ŵaronde vyachichumi; kweni kweniko mweniyo wasimikizgika kuti ngwamoyo. 9Ndipo, kukamba viyo mwaku Abrahamu Levi nayo, yo waronde cha chichumi wasonkhe vyachichumi; 10chifukwa wenga weche mu viunu vya wiske; wachikumana nayo Melkizedeke yo.

11Kweni asani kwenga mfisku mu uzukuru wo wa uLevi (pakuti pasi pake khamu lo linguronde langulu), kungukhumbikwa so uli kuti wayuke mzukuru munyake mwandondomeku yaku Melkizedeke, ndi kuzumbulika cha mwa ndondomeku yaku Aroni? 12Chifukwa pakusinthika uzukuru wo, chituŵa so mbwenu chisintha cha langulu lo. 13Pakuti mweniyo vikambikiya pake vyenivi ngwa fuku linyake, waku lenilo palive yumoza wamiriya pa chisoperu. 14Chifukwa kuwoneka kuti Mbuyafwe wanguburika mwaku Yuda, kwaku lenilo fuku Mosese wengavi kukamba kanthu kapa ŵazukuru.

Mzukuru munyake nge ndi Melkizedeke

15Ndipo vyenivyo viwonekadi kwakuruska, asani uli ndi mlinganu waku Melkizedeke wayuka mzukuru munyake, 16mweniyo wachitika, mwa dangu la langulu lanyama cha, kweni mwa nthazi ya umoyo wambura mamarika. 17Pakuti wasimikizgika,

“Ndiwe Mzukuru ku muyaya

mwa ndondomeku yaku Melkizedeke.”

18Chifukwa kulipo kuwayuka kwa langulu lakurutapo kali pa chifwa cha unthomboru ndi uwura-chanduku wake, 19(pakuti dangu lo lengavi kufiska kanthu), ndi chiserezga cha chigomekezgu chakuruska, mwaku chenicho tiŵandikiya kwaku Chiuta. 20Ndipo mwakuti kuti nkhwambura kurapa cha. 21Pakuti iwo nadi kwambura kurapa ŵaŵa ŵazukuru; kweni iyo ndi kurapa mwaku mweniyo watumkambiya,

“Ŵarapa Ambuya, ndipo kuti ŵawererenge cha,

‘Ndiwe Mzukuru ku muyaya,’ ”

22namu so waŵiya Yesu ndindira ya chipanganu chakuruska.

23Ndipo iwo nadi ŵaŵa ŵazukuru ŵanandi, pakukanizgika kujaririya chifukwa cha nyifwa, 24kweni iyo chifukwa wajaririya ku muyaya, we nawo uzukuru wo wambura-maharika. 25Viyo ndimo ngwanthazi kukutaskiya kose limu wo ŵatuziya kwaku Chiuta mwaku iyo, pakuŵa wamoyo nyengo zose kwachiŵeyere pa chifwa chawo.

26Chifukwa tingukavuka mzukuru mura waviyo, wakupaturika, mzizimu, mziraukazuzi, wakugaukako ku ŵalakwi, wakutumphulika kuchanyako ku machanya; 27mweniyo walive chikakamizgu zuŵa ndi zuŵa, ulaka mbazukuru ŵara ŵeniŵa, kupereka chisopu pa chifukwa cha vilakwa kudanga vya mweneko ndi pavuli vya khamulo; pakuti chenicho wanguchitiya kamoza limu, wangwachijisaska, mwenecho. 28Chifukwa dangu lo limika ŵanthu nge mbazukuru ŵara, ŵakuŵa ndi udombotu; kweni kambidu lo la kurapa ko, kwapavuli pa dangu lo, limika Mwana, wakufiskikiya muyaya.

Currently Selected:

ŴaHebere 7: TongaMw

Highlight

Copy

Compare