ŴaHebere 9

Chisopo cha panu pasi ndi chakuchanya

1Kweni chingana nchipanganu nacho chakudanga chinguŵa ndi miteŵetu ya chisopa, ndi so nyumba yakupaturika yapa charu. 2Chifukwa chingurongosoleka chihema, chakubwaro cho, mwenimo mwenga chikoleru-nyali cho, ndi gome lo, ndi viŵande vyo vyasembe; ndicho chizumbulika Malo Ghakupaturika. 3Ndipo parweka pa chijaru chachiŵi, chihema cho chizumbulika Malo Ghakupaturika gha Ghakupaturika; 4chakuŵa ndi chisoperu cha golide chachema, ndi bokosi lo la chipanganu lakumatika kosekose ndi golide, mwaku lenilo mwenga msuku wa golide mwaku wo mwengamana, ndi ndodo yo yaku Aroni yo yatundanga, ndi viŵaraŵaja vyo vya chipanganu; 5ndi pachanya pake wakerubi ŵa unkhankhu, ŵakuvimba chitengu chalisungu cho; paku vyenivyo kuti tingakambiya payijapayija sono cha.

6Ndipo vyati vyarongosoleka viyo vinthu vyenivyo, ŵazukuru ŵasere rutaruta mu chihema chakubwaro cho pakutata milimu; 7kweni mu chachiŵi cho wasere mzukuru mura yo yija, kamoza mu chirimika, wambura ndopa cha, zenizo wapereke pa chifukwa chaku iyo mweneko ndi chifukwa cha maubudi gha khamu lo. 8Mzimu Wakupaturika nayo wakusimikizga chenichi, chakuti nthowa ya ku malo ghakupaturika yindarongoleke, cheche kuma chihema chakudanga oho, 9chenicho ndi ntharika ku nyengo ya sono; kwakulingana ndi yeniyo ntharika mipasku ndi so visopu viperekeka, vyambura nthazi kumkongoreska wakusopa, kuchiri ku njuŵi, 10pakuŵa mu vyakurgha ndi vyakumwa ndi masambidu ghamtundumtundu malangulu ghanyama pe, ghakuŵikika mpaka nyengo yakukongore.

11Kweni Kristu, pakuza ngendi mzukuru mura wa vinthu vyamampha vyakukhasa kuza, mu chihema cho chikuruka ndi chakufiskikaka, chakwatika ndi manja cha, ndikwesa kuti, cha kalengekedu kano cha, chingana ndi mu ndopa za vyaphongu ndi matholi cha, kweni mu ndopa zaku Yija. 12Wangusere kamoza mu Malo Ghakupaturika, wati waronde uwombozi wamuyaya. 13Chifukwa asani ndopa za mbuzi ndi nkhuzi, ndi choto cha thokazi vyakumijiya pa ŵakukazuzgika, vipatuliskiya ku chiphoto cha liŵavu: 14uli ukongwako ndopa zo zaku Kristu, mweniyo mu Mzimu Wamuyaya wangujipereka wambura kalema kwaku Chiuta, zitozgenge njuŵi zinu ku nchitu zakufwa kwachiteŵete Chiuta wamoyo?

15Ndipo pa chifukwa chenichi ndiyo mwendapakati wa chipanganu chifya, viyo kuti yati yaŵapo nyifwa yakwachipepeske pa maujumphi ghapa chipanganu chakudanga wo ŵadanika ŵarondenge phanganu lo la chihara chamuyaya cho. 16Pakuti po pe chipanganu cha chirawu, yikateskekanga nyifwa ya wakuchichita. 17Chifukwa chirawu nchanthazi po pe nyifwa: pakuti nchakukho cha weche wamoyo yo wanguchikamba. 18Chifukwa chenichi chingana nchipanganu chakudanga cho kuti chinguserezgeka kwambura ndopa cha. 19Pakuti lati lakambikiya ndi Mosese ku khamu lose langulu lose mwa dangu, wanguto ndopa zo za matholi ndi vyaphongu pamoza ndi maji ndi thonji lakuchesama ndi husope, ndipo wangumijiya buku nalo ndi so khamu lo lose, 20wakuti, “Izi ndi ndopa zo za chipanganu chenicho Chiuta wangulanguliya imwe.” 21Ndipo kwakulingana so wangumijiya ndi ndopa zo chihema cho ndi viyaŵi vyose vyaku teŵete. 22Ndipo mwa dangu lo viŵiviŵi vyose viphotoleka ndi ndopa, ndipo kwambura kudika ndopa chireke palive.

Kristu sembe yo yituzgapo uheni

23Viyo kungukhumbikwa kuti vikozgu vyaku vyo vyamu machanya vitozgeke ndi vyenivi, kweni vinthu ivyo vyeneko vyamumachanya ndi visopu vyakuzungura vyenivi. 24Chifukwa Kristu walive kusere mu malo ghakupaturika ghakwatika ndi ŵanthu, cho nchikozgu cha malo gheneko. Kweni wanguruta kuchanya iko, kweniko sono wawoneka paurongo paku Chiuta pa chifwa chidu: 25chingana nkhuti panandi wangujipereka cha; uli ndimo mzukuru mura waserere mu Malo Ghakupaturika chirimika ndi chirimika ndi ndopa zo kuti zake cha; 26iku wangwenere kukomwa panandi kutuwa ku kujarikika kwa charu; kweni sonu kamoza pa umari wa migonezi warongoleka kwachituzgiya maulakwi mu chisopu chaku iyo yija. 27Ndipo uli ndimo kutemeke ŵanthu kufwa kamoza, kweni pavuli pake kweruzgika, 28viyo Kristu nayo, wati waperekeka kamoza kwachinyamuliya vilakwa ŵanandi, wamwoneka kachiŵi, kwambura maulakwi, ku ŵakumlereze, kwachiŵataska.

Currently Selected:

ŴaHebere 9: TongaMw

Highlight

Copy

Compare