ŴaHebere 10
10
1Chifukwa, pakuti dangu lo le ndi chizgezge cha vyamampha vyo vituza, chikozgu cheneko cha vinthu vyo cha, muyaya liuravi nthazi ndi visopu vyenivyo pe, vyo chirimika ndi chirimika ŵapereke rutaruta, kuŵafiska ŵakuŵandikako. 2Iku asi mphanyi visopu vyenivyo vingureka kuperekeka chifukwa ŵakusopa, pakuphotoleka limu, mphanyi ŵanguwuravi njuŵi ya vilakwa? 3Kweni mu visopu vyenivyo mwe chinkhumbo cha vilakwa chirimika ndi chirimika. 4Chifukwa ndopa za zinkhuzi ndi zimbuzi zambura nthazi kutuzgapo vilakwa. 5Ndipo viyo,
Kristu wachiza mu charu, watiti,
“Sembe ndi mpasku kuti mungukhumba cha,
kweni liŵavu mwandirongosole;
6mu sembe zakocha ndi mu mpasku wapa vilakwa
kuti mungukondwere cha.
7Sono ndinguti,
‘Awona, ndaziya mu chizinga cha buku
kwalembeka paku ine
kwachichita khumbu linu, Achiuta.’”
8Pachanya po watiti, “Sembe ndi mipasku, ndi mipasku yakocha, ndi mipasku yapa vilakwa kuti mungukhumba cha,” chingana nkhuti mungukondwere mwenimo cha (vyenivyo vyaperekeka uli ndi dangu lo); 9sono watiti, “Awona, ndaziya kwachichitakhumbu linu.” Watuzgapo chakudanga cho, alinga kuti wamiske chachiŵi cho. 10Mu khumbu lenilo to ŵakupaturikiya mu kaperekedu ka liŵavu lo laku Yesu Kristu kamoza limu.
11Ndipo nadi mzukuru yose watuma zuŵa ndi zuŵa pakumiriya ndi kupereka sembe zenizo pe nyengo zinandi, zo muyaya zilive nthazi kutuzgapo vilakwa: 12kweni mwenuyu, wanguti wapereka sembe yimoza yapa chifukwa cha vilakwa, wangujariya pasi ku marghe ghaku Chiuta muyaya; 13kwamba penipo wakulereze mpaka wamawongu wake waŵikika kuŵa chitengu cha marundi ghake. 14Pakuti mu sembe yimoza wafiskiya muyaya wo mbakupaturika. 15Ndipo watisimikizgiya Mzimu Wakupaturika nayo, pakuti pavuli pa kukamba,
16“Ichi nchipangano cho nkhachitanga nawo
pavuli pa mazuŵa gho, atiti Ambuya:
Nkhaŵikanga marangu ghangu mu mitima yawo,
ndipo pa njuŵi zawo ndighalembenge.”
17Ndipo sono watiti,
“Vilakwa vyawo ndi mauchikana marangu ghawo kuti ndikumbukenge so cha.”
18Kweni po pe chireke chaku vyenivyo, kuti uripo so cha, mpasku pa chifukwa cha vilakwa.
Tiyeni tindere kwaku Chiuta
19Viyo, mwa ŵabali, pakuŵa nacho chigomezgu chakwachisere mu malo ghakupaturika mu ndopa zaku Yesu, 20ndi nthowa yeniyo watipatuliskiya, yifya ndi yamoyo, mu chijaru cho, ndicho liŵavu lake, 21ndipo pakuŵa ndi mzukuru mura pa nyumba yaku Chiuta, 22tiŵandikiye ndi mtima weneko mu uzali wa chivwanu, ŵakumijirika kuchiri ku mitima yidu kutuwa ku njuŵi yiheni, ndi ŵakusambiskika kuchiri ku liŵavu lidu ndi maji ghakutowa, 23tikoreske chizomerezga chambura kupetere cha chigomekezgu; chifukwa ngwamagomekezgeka yo wangupangana: 24ndipo tipimirane kwachikhu ŵirizgiyana ku chanju ndi ku nchitu zamampha; 25kwambura kujowo unganu waku taŵeni, uli nkharusu ka ŵanyake, kweni ŵakuchiskana; ndipo ukongwa viŵi po muwona kuti zuŵa lo liŵandika.
26Chifukwa asani tilakwiya ncheni pavuli pa kuronde mziŵiru wa uneneska wo, kuti ujako so cha mpasku wapa chifukwa cha vilakwa, 27kweni chilereze chakofya chakuti e cha cheruzgu, ndi ukari wa moto wo upirizgenge wamawongu wo. 28Munthu wakukana dangu laku Mosese watufwa kwambura lisungu pa chisimisimi cha ŵakeboni ŵaŵi pamwenga ŵatatu: 29mughanaghana kuti weruzgikenge nge ngwakwenere chilanga chikuru chauli, yo wakandirizga pasi Mwana waku Chiuta yo, ndi wazipima ndopa za chipanganu, mwaku zo wangupaturikiya, chinthu chaŵaka, ndi wayuyuwa Mzimu wa wezi? 30Chifukwa timziŵa yo wanguti, “Thayu ndangu, ine ndamwerezgiyapo.” Ndipo so, “Mbuya weruzgenge khamu lake.” 31Nkhwakofya kuwa mu manja ghaku Chiuta wamoyo.
32Kweni mujikumbuske ndi mazuŵa ghakundanga, mwenimo, munguti mwangweuskika, mungukunthiyapo mlimbalimba ukuru wa vikomwa, 33panyake, pakuŵa chakuwoniyapo mu matozu ndi so masuzgu; ndipo panyake pakusazgana nawo ŵakukomwa viyo. 34Chifukwa mungufwiya so lisungu ŵamagoŵa wo, ndipo mungukunthiyapo kwakukondwa muskowu wa viŵetu vinu, pakuziŵa kuti mwaŵeni mwe ndi chiŵetu chamamphako ndi chakujaririya. 35Viyo mungataya cha chigomekezgu chinu, cho che nayo mphotu yikuru. 36Chifukwa mutanere kukunthiyapo, alinga kuti, mwati mwachita khumbu laku Chiuta, mungaronde phanganu lo.
37“Chifukwa kachalipo kanyengo kamanavikeni,
ndipo yose wakuza wazenge,
ndipo kuti wakaziwulikanga cha.
38Kweni murunji wangu yo mu chivwanu wajariyenge wamoyo:
ndipo asani wawere vuli umoyo wangu kuti ukondwere mwake cha.”
39Kweni ifwe kuti te ŵakuwele vuli cha ku wanangiku, kweni ŵa chivwanu ku utaski wa mzimu.
Currently Selected:
ŴaHebere 10: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
