ŴaHebere 11

Chivwanu

1Kweni chivwanu nchimbondu cha vyakugomekezgeka vyo, chirozgu cha vinthu vyambura kuwoneka. 2Chifukwa awaku chenicho ŵaraŵara wo ŵangusimikizgikiya. 3Ndi chivwanu titeska kuti vyaru vyo vyachitika ndimazu ghaku Chiuta, viyo kuti cho chiwoneka chirive kuŵapo kutuwa ku vyakuwoneka.

4Ndi chivwanu Abelu wangupereka kwaku Chiuta mpasku wamamphako kwakuruska Kaini, mwaku weniwo wangusimikizgikiya kuŵa murunji, Chiuta iyo wachimsimikizgiya pa mipasku yake; mwaku chenicho nacho chingana wakufwa wacharongoro. 5Ndi chivwanu wangusamiskika Hanoke kuti wareke kuwona nyifwa; ndipo kuti wangusanirika cha, pakuti Chiuta wangumsamiska: chifukwa wenga wandasamiskike, wangusimika kuti wamkondweska Chiuta. 6Kweni kwambura chivwanu kutondeka kumkondweska: chifukwa yo watuza kwaku Chiuta wakavwananga kuti waliko, ndipo kuti ngwakuŵalambula ŵeniwo ŵatumpenjeska. 7Ndi chivwanu Nowa, wati wachenjezgeka ndi vinthu vyo vyenga vindawoneke, kwa uwopa Chiuta wangarongoso ngaraŵa kwachitaska ŵamu nyumba yake; mwaku chenicho wanguchisuska charu, ndipo wanguŵa muhara wamu urunji wa chivwanu.

8Ndi chivwanu Abrahamu, wanguti wadanika, wanguvwiya kuti watuwemo kuya ku malo ghenigho wakarondanga ngenchihara; ndipo wangutuwa, wambura kuziŵa ko wayanga. 9Ndi chivwanu wangutandara ku charu cho cha phanganu, ulaka nchilendo, wakuja mu mahema, pamoza ndi Yisaki ndi Yakobe, ŵakuhariya pamoza nayo phanganu lenilo; 10chifukwa walerezenga msumba wo wakuŵa ndi viŵanja, waku weniwo mzengi ndi chata ndi Chiuta. 11Ndi chivwanu Sara iyo nayo wanguronde nthazi yakuzuukiya mbeu pavuli pa nyengo ya uŵisi, pakuti wangumpima wamagomekezgeka mweniyo wangupangana; 12ndiviyo ŵangupapikako ku yumoza, ndi iyo nge ngwakufwa, mu unandi nge ndi nyenyezi za kuchanya, ndi uli ndi mchenga wo wapa likumba la nyanja, wambura maŵerengeka.

13Mu chivwanu ŵangufwiya yaŵa wose, ŵambura kuronde mapanganu gho, kweni ŵakughalereske ndi ŵakughatauzgiya kutari, ndi ŵakuzomera kuti ŵengaŵalendo ndi ŵayinga pa charu. 14Chifukwa ŵeniwo ŵakamba ghaviyo, ŵarongo kuti mbakupenja charu cha uskeu. 15Ndipo asani ŵakumbukanga charu chiya kweniko ŵangutuwa, mphanyi ŵanguŵa nayo nyengo yakuwere kweniko. 16Kweni sono ŵanweke chamamphako, ndicho chakuchanya: ndiviyo Chiuta walive soni nawo, kutamulika Chiuta wawo: chifukwa waŵarongosole msumba.

17Ndi chivwanu Abrahamu, wacheseka wangupereka Yisaki nge ndi mpasku: ndipo mweniyo wangurondapo mapanganu wangupereka mwana wake wakuwa yija; 18paku mweniyo kunguneneka, “Mwaku Yisaki yikudanikiyenge mbeu.” 19Pakuti wangupima kuti Chiuta wenga wanthazi kumyuska, chingana nkhu ŵakufwa; kutuwa kweniko nako wangumronde mu ntharika. 20Ndi chivwanu Yisaki wangutumbika Yakobe ndi Esau, kuchiri ku vyakukhasa kuŵapo navyo. 21Ndi chivwanu Yakobe, wachifwa, wanguŵatumbika ŵana ŵaku Yosefe uyu ndi uyu; ndipo ŵangulambiya pa songu ya ndodu yake. 22Ndi chivwanu Yosefe, wachifwa, wangukamba ndi chituwa cha ŵana ŵaku Yisraele; ndipo wangulanguliya vya pa viwangwa vyake.

23Ndi chivwanu Mosese wati wawa wangubisika ndi ŵapapi ŵake myezi yitatu, pakuti ŵanguwona kana kenga kakunozga; ndipo kuti ŵangopa cha lamulu la karonga yo. 24Ndi chivwanu Mosese, wati waŵa mura, wangukana kutamulika mwana wa munthukazi waku Farao; 25wangusankha kuchitikiya uheni pamoza ndi khamu laku Chiuta kwakuruska kuŵa kwanyengo ndi malikondwa gha uheni; 26ndipo wangweska tozu lo laku Kristu yo uromba ukuru ku usambasi wamu Egipiti pakuti wangulereskako ku chilambula-mphotu. 27Ndi chivwanu wangureka Egipiti, kwambura kopa kandundu ka karonga yo; chifukwa wangukunthiyapo, uli ngwakumuwona yo ngwambura mawoneka. 28Ndi chivwanu wanguchita phaska, ndi chiwazga cha ndopa so, alinga kuti yo wanguŵananga ŵakupapika-danga wangaŵakwaska cha.

29Ndi chivwanu ŵangwambuka Nyanja Yiyera yo nge mpha yumu: yeniyo ŵa Egipiti nawo pakwesa kwambuka ŵangubira. 30Ndi chivwanu malinga ghaku Yeriko ghanguwa pasi ghanguti ghazingirizgika mazuŵa ghankhonde ndi ghaŵi. 31Ndi chivwanu Rahabe, munthukazi mureŵi yo, wengavi kunangikiya pamoza ndi ŵamtafu wo, pakuti wanguronde skoli ndi chimangu.

Ndipo nkhakambanga so chine? 32Chifukwa nyengo yindipereŵiyenge kukonkhoma vyaku Gideoni ndi Baraki, ndi Samsoni, ndi Jefta, ndi Davidi ndi Samuele ndi ŵamchimi wo. 33Weniwo mu chivwanu ŵangugoda maufumu, ŵanguchita urunji, ŵangufikapo pa mapanganu, ŵangujara milomo ya zinkharamu, 34ŵanguzimwa nthazi ya moto, ŵangupozomoka ku uyi wa lipanga ŵanguthaziskika mu unthomboru, ŵanguŵa ŵakukhwima mu nkhondo, ŵanguthereska maŵanja gha ŵalendo. 35Ŵanthukazi ŵangutondoleka ŵambura kuronde uwombozi; alinga ŵafikepo pa chiyuka chakuruska. 36Ndipo ŵanyake ŵangweseka ndi matozu ndi malikhwechu, nadidi so, ndi magoŵa ndi ulinda. 37Wangupong'eka mya ŵanguchekeka, ŵangweseka, ŵangubayika ndi lipanga: ŵanguwurawura ŵakuvwara vikopa vya mberere ndi vikopa vya mbuzi: ŵakavu, ŵakusuzgika, ŵakuchitika uheni, 38ŵeniwo charu chengavi kuŵenere, ŵakuyingayinga mu mabozwa ndi mu mapiri ndi mu zimphanji, ndi mu vibuwu vya charu.

39Ndipo yaŵa wose, ŵati ŵasimikizgika mu chivwanu, ŵengavi kulironde phanganu lo, 40pakuti Chiuta watirongosole limu ifwe chinthu chamamphako, alinga kuti kwambura ifwe ŵangafiskika cha.

Currently Selected:

ŴaHebere 11: TongaMw

Highlight

Copy

Compare