ŴaGalatia 2

Paulo ndi ŵakutumika ŵanyake

1Ndipo pavuli pa virimika chumi ndi vinayi (14) ndingukweriyako so ku Yerusalemu pamoza ndi Barnaba, wakutole pamoza nane Tito nayo. 2Kweni kwakulingana ndi uvumbuzi ndingukwera; ndipo ndinguŵaŵikiya evangeli weniwo ndimemeza mu ŵaMitundu, kweni ku ubende ku ŵathenthe, vinu mphanyi ndachimbiyanga, pamwenga ndinguchimbiya waka. 3Kweni chingana nkhuti Tito, yo wenga pamoza nane, wenga muGriki, kuti wangukakamizgika kuchinjika cha: 4kweni ndingukweriyako chifukwa cha ŵabali-ŵatesi ŵakutolekeyamo kwaubende, ŵeniwo ŵangunyeremukiyamo kwachiskola wanangwa widu wo te nawo mwaku Kristu Yesu; alinga kuti watisanduske ŵaŵanda; 5kwako wo tengavi kundere malo ndi kuthera, chingana mpha ora limoza; alinga kuti uneneska wa evangeli ujaririye namwe. 6Kweni kutuwa kwaku wo ŵanguwoneka kuŵa ŵathenthe (po ŵaŵiyanga kali ŵakutie, kuti nkhanthu kwaku ine cha: Chiuta ŵalive kuronde chisku cha munthu) ndititi, wo ŵathenthe ŵengavi kukuskiyako kanthu kwaku ine: 7kweni pakuwona kuti ndagomekezgeke ndi evangeli wo waku uwuramchinju, uli ndimo Petro wangugomezgeke nawo ku mchinju, 8(chifukwa yo wangutataliya mwaku Petro ku utumiki waku mchinju, wangutataliya mwaku ine nane ku ŵaMitundu); 9ndipo pakuwuteska wezi wo ungupaskikiya ine, Yakobe ndi Kefa ndi Yohane, wo ŵanguwoneka kuŵa mizati, ŵangupaska ine ndi Barnaba chasa cha janja lamarghe la wanase, kuti tikenge ifwe ku ŵaMitundu, ndipo iwo ku ŵamchinju; 10ndikweni ŵangu khumba kuti tiŵakumbuke ŵakavu; chenicho nacho ndingupamphuka kwachichita.

Paulo wachenya Petro pa Antioke

11Kweni penipo wanguza Kefa ku Antioke, ndingumikana nayo chisku ku chisku, pakuti wenga wamasuskika. 12Chifukwa ŵengaŵandaze ŵanyake kutuwa kwaku Yakobe, warghanga pamoza ndi ŵaMitundu: kweni ŵachiza ŵa, wajiwezganga ndi kujipatuwa, pakopa ŵamchinju, wo, 13ndipo ŵaYuda ŵakujapo nawo ŵangusanganapo nayo, viyo kuti Barnaba nayo wangurandizgika ndi fuvyu lawo. 14Kweni penipo ndinguona kuti ŵengavi kurunjika kuchiri ku uneneska wo wa evangeli, ndingunena ndi Kefa paurongo paku wose, “Asani iwe, pakuŵa muYuda ujariya ulaka mbaMitundu, ndi nge mbaYuda cha, ukakamizga uli ŵaMitundu kuti ŵaŵi ŵaYuda?”

ŴaYuda ndi ŵaMitundu ŵataskika ndi chivwanu

15Ifwe te ŵaYuda pa kawi, ndi kuti te ŵalakwi pamoza ndi ŵaMitundu cha, 16tiziŵa kuti munthu walive kurunjiskika mu milimi ya chilangulu, kweni mu chivwanu chamwaku Yesu Kristu pe, nafwe tavwaniya mwaku Kristu Yesu, alinga kuti tirunjiskikiyenge ndi chivwanu chamwaku Kristu, ndipo ndi milimu ya chilangulu cha: pakuti ndi milimu ya chilangulu paŵengevi kurunjiskika munthu yumoza. 17Kweni asani, pakulembe kurunjiskika mwaku Kristu, taŵeni nafwe tisanirika ŵalakwi, kumbi Kristu ndi mteŵeti wa ulakwi, na? Kungaŵanga viyo cha! 18Chifukwa asani vyenivyo ndingubwanganduwa ndivyo ndizengeyapo so, ndijisimikizga kuti nde mujumphi. 19Chifukwa ine mu chilangulu ndingufwa ku chingulu, alinga kuti ndijariyenge wamoyo kwaku Chiuta. 20Pamoza ndi Kristu ndapayikika; kweni nde wamoyo; kweni ine so cha, kweni ndi Kristu yo waja wamoyo mwangu: ndipo umoyo wo ndijariya sono mu liŵavu, ndiujariya mu chivwanu cha mu Mwana yo waku Chiuta, yo wangundanja, ndi wangujipereka pa chifukwa chaku ine. 21Kuti ndiunanga cha wezi waku Chiuta: chifukwa asani mu chilangulu mwe urunji, ipu Kristu wangufwa waka.

Currently Selected:

ŴaGalatia 2: TongaMw

Highlight

Copy

Compare