ŴaGalatia 3

Dangu pamwenga chivwanu

1Mwa ŵaGalatia mwaŵakupusa, njani warowa imwe, pa maso ghaku maŵenimwe Yesu Kristu wakupayikika wataulikiya pakweru? 2Chinichi pe ndikhumba kuziŵapo kwinu, kumbi munguronde Mzimu yo ku milimu ya chilangulu, pamwenga ku kuvwa kwa chivwanu? 3Mupusiyanji viyo na? Mwaŵakwandiya mu Mzimu, kumbi mufiskikiya sono mu liŵavu? 4Kumbi mwakunthiyapo vyenivinandi vyo kwaŵaka? Kwakuneneska penga kanthu. 5Kumbi mweniyo wakupaskani Mzimu yo, ndi ngwakutataliya mwinu vyanthazi, wachita viyo kutuwa ku milimu ya chilangulu, pamwenga kutuwa mu kuvwa kwa chivwanu?

6Uli ndimo “Abrahamu wanguvwaniya mwaku Chiuta, ndipo kungupimikiya iyo ulaka mburunji.” 7Viyo na, ziŵani kuti ŵeniwo mbaku chivwanu, iwo nawo mbana ŵaku Abrahamu. 8Ndipo lembo lo, pakuwone limu kuti Chiuta kutuwa ku chivwanu warunjiskenge ŵaMitundu, lingutauliya limu evangeli kwaku Abrahamu, lakuti, “Mwaku iwe yikatumbikikanga mitundu yose.” 9Ndi viyo wo mbamu chivwanu watumbikika pamoza ndi Abrahamu wachivwanu yo.

10Chifukwa ŵeniwo wose mbakugomekezge milimu ya chilangulu ŵe pasi pa tembo: chifukwa kwalembeka kuti, “Ngwakutembeka yose yo walive kujaririya mwaku vyose vyo vyalembeka mu buko lo la chilangulu, kuvichita.” 11Kweni kuwoneka kuti ndi langulu palive munthu warunjiskika paurongo paku Chiuta: pakuti, “Murunji yo wakaŵanga wamoyo ndi chivwanu”; 12kweni chilangulu cho kuti ncha mu chivwanu cha; kweni, “Mweniyo wavichita, wakaŵiyanga wamoyo mwake.” 13Kristu watiwombo ifwe ku tembo la chilangulu cho, pakuŵa wakutembeka pa chifukwa chidu: chifukwa kwalembeka, “Ngwakutembeka yose yo ngwakupayikika pa muti”: 14alinga kuti pa ŵaMitundu chiŵiyenge mwaku Kristu Yesu chitumbiku cho chaku Abrahamu; viyo kuti mu chivwanu tirondiyenge chipanganu cha Mzimu.

Dangu ndi chipanganu

15Mwa ŵabali, ndikamba uli ndi munthu: chingana phanganu lakukozgeka nda munthu, palive yumoza walikana pamwenga wakuskiyako. 16Kweni kwaku Abrahamu ghanguneneke mapanganu gho, ndi ku mbeu yake, walive kukamba, “Ndi ku zimbeu,” nge mpha zinandi; kweni nge mpha yimoza “Ndi ku mbeu yako,” yo ndi Kristu. 17Kweni chenichi ndititi; langulu lakutemeka pavuli pa virimika machumi pe chumi ghanayi ndi machumi ghatatu kuti lipenevya cha phanganu lakukhozgeka kali ndi Chiuta, viyo kuti liwayuwe chipanganu cho. 18Chifukwa asani chihara cho nchakutuwa ku langulu, kuti ncha ku chipanganu so cha: chifukwa Chiuta wanguchpaska kwawezi kwaku Abrahamu mu chipanganu.

19Ndavine nanga langulu lo? Linguŵikikapo pa chifukwa cha maubudi, mpaka yingaza mbeu yo, kwaku yeniyo chipaskika chipanganu; ndipo chingurongosoleke ndi ŵangelo mu janja la mwendapakati. 20Kweni mwendapakati kuti ngwa yumoza cha; kweni Chiuta iyo njumoza.

Chifukwa cha dangu

21Viyo langulu lo ndakumikana ndi mapanganu ghaku Chiuta kumbi? Kungaŵanga viyo cha! Chifukwa asani lingupaskika langulu lanthazi kwachipaska umoyo, nadidi mphanyi urunji watuwa ku langulu. 22Kweni lembo lo laŵajariya wose pasi pa ulakwi, alinga kuti chipanganu cho chamu chivwanu mwaku Yesu Kristu chapaskike kwaku wo mbakuvwana.

23Kweni chenga chindaze chivwanu cho, tasungikanga pasi pa langulu, nge mbamikoli mpaka po chivwanu cho chazanga, chinguvumbulika. 24Ndiviyo langulu lo lenga msambizgi widu mpaka kuza kwaku Kristu, alinga kuti mu chivwanu tirunjiskike. 25Kweni chati chaza chivwanu cho, kuti teche pasi pa msambizgi yo cha. 26Chifukwa mose mwe ŵana ŵaku Chiuta mu chivwanu mwakuKristu Yesu. 27Pakuti mose mwaŵakubatizikiya mwaku Kristu, munguvwa Kristu. 28Mwaku Kristu mulive muYuda chingana ndi muGriki, mulive muŵanda chingana, ndi mwanangwa, mulive munthurumi ndi munthukazi; chifukwa mose mwe yumoza mwaku Kristu Yesu. 29Ndipo asani mwe waku Kristu, po ndipo mwe mbeu yaku Abrahamu, ndi ŵakuhara uli ndi chipanganu.

Currently Selected:

ŴaGalatia 3: TongaMw

Highlight

Copy

Compare