ŴaGalatia 1

1Kalata wakutuwa kwaku Paulo, wakutumika pamwenga wakumikika ndi munthu cha, kweni ndi Yesu Kristu, ndi Chiuta Dada, mweniyo wangumyuska ku ŵakufwa. 2Ŵabali wose wo ŵe kunu ŵasangana nane pakumutauzgani imwe mwa ŵamipingu ŵamu Galatia. 3Wezi kwaku imwe ndi chimangu kutuwa kwaku Chiuta Dada, ndi Mbuyafwe Yesu Kristu, 4yo wangujipereka pa chifukwa cha vilakwa vidu, mwakuti watitaske ku mgonezi uwu uheni, kwakulingana ndi khumbu laku Chiuta widu, Auskefwe; 5kwaku mweniyo kuŵiye unkhankhu muyaya-muyaya. Ameni.

Uthenga wamampha umoza

6Ndizizwa kuti musamako viyo ruŵi kwaku mweniyo wangumdanani ndi wezi waku Kristu, 7ndi kuti murata ku evangeli munyake; ndikweni kuti ngunyake cha: kweni ŵanyake ŵalipo wo ŵatumkweŵeskani, ndipo ŵakhumba kupepetuwa evangeli waku Kristu. 8Kweni chingana ndifwe, chingana ndi mungelo kutuwa kuchanya wangatauliya imwe evangeli wakumikana ndi weniwo tingumtauliyani, waŵe wakutembeka! 9Uli ndimo takambiya kali, sono naku ndiwerezgapo, Asani yumoza wakutauliyani evangeli wakupambana ndi weniwo munguronde, waŵe wakutembeka! 10Chifukwa kumbi ndiwoja ŵanthu, pamwenga Chiuta iyo? Pamwenga ndilembe kukondweska ŵanthu? Asani ndale ndakondweskanga ŵanthu, mphanyi kuti ndingawa mteŵeti waku Kristu cha.

Mo Paulo wanguŵiya wakutumika

11Chifukwa, mwa ŵabali, ndikuziŵiskani kuti evangeli weniwo ungutaulika ndi ine, kuti ngwa munthu cha. 12Chifukwa chingana nkhuti ndinguuronde ku munthu cha, chingana nkhuti ndingusambizgika cha, kweni ungundiwiya mu uvumbuzi waku Yesu Kristu. 13Chifukwa mwavwa mo ndajariyanga kale mu chisopa cha chi Yuda, mwakuti ukongwa viŵi ndaŵembanga eklesiya lo laku Chiuta, ndipo ndalipopotanga: 14ndipo mu chi Yuda cho ndarutiriyanga kwakuruska ŵanandi ŵanthanga mu fuku langu, pakuŵa warwana kwakuruska mu miyambu ya ŵaseku. 15Kweni penipo kungumkondweska Chiuta, mweniyo wangundipatuwa kutuwa ku kawi kangu, ndipo wangundidana mu wezi wake, 16kuvumbuliya mwangu Mwana wake, alinga kuti ndimtaule iyo mu ŵaMitundu; kuti ndingufumba munthu we yose cha cho nditenere kuchita; 17chingana nkhuti ndingukwere ku Yerusalemu ku ŵakutumika ŵa paurongo pangu cha: kweni ndinguya ku Arabia; ndipo pavuli ndinguwere so ku Damasko.

18Pavuli penipo, vinguti vyakapo virimika vitatu, ndingukwere ku Yerusalemu kwachichezga ndi Kefa, ndipo ndinguswa kwake mazuŵa chumi ndi ghankhonde. 19Kweni munyake wa ŵakutumika ndengavi kumwona, kweni Yakobe pe, mhurwa wa Ambuya. 20Ndipo nge nkhwaku vyo nditukulembiyani, wonani, paurongo paku Chiuta, kuti nditeta cha. 21Pavuli pake ndinguza ku vigaŵa vyaku Siriya ndi Kilikia. 22Kweni kuti ndaziŵikwanga pa chisku cha mipingu ya mu Yuda yaku Kristu cha: 23ndikweni yavwanga waka kuti, “Yo kale watiŵembanga le ngwakutaula chivwanu cho kali wapopotanga.” 24Ndipo yamkankhuskiyanga Chiuta mwaku ine.

Currently Selected:

ŴaGalatia 1: TongaMw

Highlight

Copy

Compare