Amosi 7
7
Chiwona cha ŵazombe
1Viyo ndimo Ambuya Chiuta wangundiwoneske: wonani, walongosonga ŵazombe mu nyengo yakwamba kubuka kwa uteka wakukuwa pavuli; ndipo ehe, wenga wakukuwa pavuli po karonga wanguti wasengamo wake.
2Ndipo po zombe wangumara kurgha
uteka wa charu, ndinguti,
“Ambuya Chiuta, gowokani, ndi kuŵeyani!
Kumbi Yakobe wangama uli?
Ndimumana limu!”
3Ambuya angugowoka paku ichi;
“Kuti kukaŵanga viyo cha,” atiti Ambuya.
4Viyo ndimo Ambuya Chiuta wangundiwoneske: wonani, Ambuya Chiuta wangudana cheruzgu cha moto, ndipo ungocha ndimba yikuru ndi warghanga charu. 5Viyo ndinguti,
“Ambuya Chiuta, rekani, ndikuŵeyani!
Kumbi Yakobe wangaziŵa kuma uli?
Ndimumana limu!”
6Ambuya angugowoka paku ichi;
“Ichi nacho chikaŵangako cha,”
anguti Ambuya Chiuta.
7Wangundiwoneska; wonani, Ambuya amanga pa chiliŵa cho chinguzengeka ndi chingwe chakunyoloske mu wima, ndi chingwe chakunyoloske wima mu janja la wo. 8Ndipo Ambuya anguti kwaku ine, “Amosi, uwonanji?” Ndingwamuka kuti, “Chingwe chakunyoloske-wima.” Viyo Ambuya anguti,
“Awona ndiŵika chingwe chakunyoloske-wima
mukati mu ŵanthu ŵangu ŵa Yisraele;
kuti ndiŵajumphenge so cha;
9malo gha pachanya ghaku Yisaki ghakapasukanga,
ndi malo ghakupaturika ghaku Yisraele ghakanangikanga,
ndipo ndiyukiyenge nyumba yaku Yeroboamu ndi lipanga.”
10Penipo Amaziya mzukuru mura waku Betele wangutuma kwaku Yeroboamu, karonga waku Yisraele; kuti, “Amosi watukuŵemba mukati mu nyumba yaku Yisraele; charu kuti chingaziŵa kuronde mazu ghake ghose cha. 11Chifukwa Amosi wakamba viyo,
‘Yeroboamu wakafwanga ndilipanga,
ndipo Yisraele wakalutanga ku umkoli kutali
ndi charu chake!’ ”
12Ndipo Amaziya wangukamba so kwaku Amosi, “Iwe muwona, ruta thaŵiya ku charu cha Yuda, ndi ukarghe chiŵande kwenikuwa ndi kuchima kwenikuwa; 13kweni ungachimanga so cha ku Betele chifukwa ndi malo ghakupaturika gha karonga, ndipo ndi kasopi wa ufumu.”
14Viyo Amosi wangwamuka Amaziya wanguti, “Kuti ndine mchimi cha chingana nkhuŵa mwana wa mchimi; kweni ndine mliska wa ng'ombe, ndi wakupontho nkhuyu, 15ndipo Ambuya angundidana kutuwa ku uliska wangu wa mskambu, ndi anguti kwaku ine, ‘Ruta, ukachimi ku ŵanthu ŵangu ŵaYisraele!’
16Viyo sono, uvwi mazu gha Ambuya.
Iwe utiti, ‘Ungachimanga cha ku mikana ndi Yisraele,
ndi ungasambizganga cha kususka nyumba yaku Yisaki.’
17Viyo mu chifukwa ichi atiti Ambuya:
‘Muwoli wako waŵenge mureŵi mu msumba,
ndipo ŵana ŵako ŵanthurumi ndi ŵana ŵako
ŵanthukazi ŵakabayikanga ndilipanga,
ndi charu chako chamugaŵika ndi chipimo cha chingwe,
ndipo wamweni wamufwiya mu charu cha ukazuzi;
ndipo Yisraele wakarutanga nadi ku uŵanda kutali ndi charu chake!’ ”
Currently Selected:
Amosi 7: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
