Amosi 6
6
Kuparghanika kwa ŵaYisraele
1“Owe kwaku wo ŵaja ndi
kufwasa mu Zioni,
ndi kwaku wo ŵakudeka pa phiri la Samaria,
ŵanthu ŵakuziŵika ŵa mitundu yakudanga,
kwaku ŵeniwo nyumba yaku Yisraele yituza!
2Rutani ku Kalne, mukawone;
ndipo kutuwa kuwa murute ku Hamati mukuru;
viyo musikiyi ku Gata wa ŵaFilisti.
Kumbi mbamampha kuruska maufumu yagha?
Pamwenga, charu chawo nchikuru kuruska charu chinu,
3owe imwe muŵika kutali zuŵa liheni,
ndi kunderezge kufupi chitengo cha nkhaza?
4“Owe, kwaku wo ŵagona pa vita vya minyanga ya njovu,
ndi kutambaruka pa vita vyawo,
ndikurgha ŵana ŵa mberere ŵamu mskambu,
ndi matholi gha mukati mu khola;
5wo ŵatumba sumu za waka ndikalilidu kazeze
ndi kujipangiya vyakumbiya nge ndi Davidi;
6wo ŵatumwa vinyo mu mbali,
ndi kujitukutizga ndi mafuta ghamampha,
kweni kuti ŵe ndi chitima cha ndi pharghaniku laku Yosefe!
7Chifukwa ichi iwo ŵadanjiyenge mwaku wo ŵaruta ku umkoli,
ndipo kukondwa kwaku wo ŵatijitukumuwa kukamaranga.”
8Ambuya Chiuta wajirapiya iyo mweneko
(atiti Ambuya, Chiuta wa maŵanja),
“Ndichita unyakazi ndi kujikuzga kwaku Yakobe,
ndi nditinkha malinga ghake;
viyo ndiperekenge msumba ndi vyose vyo virimo!”
9Ndipo asani ŵanthu chumi ŵaja mu nyumba yimoza, ŵakafwanga. 10Ndipo asani mbali wapa mtima wa munthu, yo watumocha, wakamutonga kutuzgamo viwanga mu nyumba, ndipo wakatinge kwaku yo we mu nyumba mukati ukongwa, “Kumbi waliku soyumoza ndi iwe?” Wamukenge kuti, “Awa” Ndipo watinge, “Ja chete! pakuti tingaumbuwa zina la Ambuya cha.”
11Pakuti wonani, Ambuya alangula,
ndipo nyumba yikuru yikabwangandulikanga,
ndinyumba yimana nayo yibwangandukenge.
12Kumbi ŵakavalo ŵachimbiya pa majarawi?
Kumbi munthu wangaziŵa kulima nyanja ndi mithenu?
Kweni mwasanduska cheruzgu kuŵa ndulu
ndi vipasi vya urunji kuŵa vyakuŵaŵa
13imwe mumukondwere mu kanthu kawaka-waka,
mutiti, “Asi tajitole masengwe ndi nthazi zakutaŵeni?”
14“Chifukwa wonani, ndimuyuskiyeninge mtundu wakumikana namwe,
owe, nyumba yaku Yisraele,” atiti Ambuya, Chiuta wa maŵanja;
“ndipo ŵamusuzgeninge kutuwa kukuserere kwa Hamati
kwachifika ku msinji wa Araba.”
Currently Selected:
Amosi 6: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
