2 ŴaKorinte 3

Ŵateŵete ŵa chipanganu chifya

1Kumbi tambenge so kujisimikizgiya ifwe taŵeni? Pamwenga tikavuka kumbi, nge mbanyake ŵakalata ŵakutisimikizgiya kwaku imwe, pamwe ŵakutuwa kwaku imwe? 2Imwe ndimwe kalata widu, wakulembeka mu mitima yinu, wakuziŵikwa ndi wakuŵerengeka ndi ŵanthu wose; 3pakurongoleka kuti mwe kalata waku Kristu, wakuperekeka ndi ifwe, wakulembeka ndi inke cha, kweni pa vipadwa vya mitima ya ŵanthu.

4Ndipo te nacho chigomezgu chaviyo mwakuKristu kuchiri kwaku Chiuta. 5Kuti ndikamba cha kuti te ŵakukwaniya mwaku taŵeni, kujipimiya nge tendi kanthu kakutuliya pa mtima waku taŵeni, kweni kukwaniriskika kwidu nkhwakutuliya kwaku Chiuta, 6Mweniyo so watenereska kuŵa ŵateŵeti ŵa chipanganu chifya, cha lembo cha, kweni cha mzimu; chifukwa lembo lo libaya, kweni Mzimu ndiyo wapaska umoyo.

7Kweni asani uteŵeti wo wa nyifwa, wakusemeka ndi kulembeka mu mya, unguŵa ndi unkhankhu, viyo kuti ŵana ŵaku Yisraele ŵengavi kuziŵa kulereska pa chisku chaku Mosese chifukwa cha unkhankhu wa chisku chake, unkhankhu wo wenga wakuchujuka; 8na uli ukongwako asi uteŵeti wa mzimu ukaŵanga ndi unkhankhu ukuru? 9Chifukwa asani uteŵeti wo wa chisusa mbunkhankhu, iku ukongwako mbwenu uteŵeti wa chirunjisku uruska mu unkhankhu. 10Chifukwa chakukankhuskika cho kuti chakankhuskika mwaku chenichi cha, chifukwa cha unkhankhu wo ngwakuruska. 11Chifukwa asani cho chakungunukanga chenga ndi unkhankhu, iku ukongwako cho nchakujaririya nchamu unkhankhu wakuruska.

12Viyo pakuŵa ndi chigomezgu chaviyo, tikamba ndi chiganga chikuru, 13ndipo nge ndi Mosese cha, yo wadikanga chidiku pa chisku chake, kuti ŵana ŵaku Yisraele ŵangalereskanga pa umari wa unkhankhu wo wakungunukanga cha. 14Kweni miwongu yawo yingunonopeskeka, chifukwa mpaka ku zuŵa lino chidiku cho cheche kujaririya chambura kuvwinkhulika, penipo ŵeche kuŵerenga chipanganu chamwake; ndiku kuti chivwinkhu cho cheche kujaririya chambura kuvwinkhulika chifukwa ndi mwaku Kristu pe mo chivwinkhulikiya. 15Kweni mpaka zuŵa linu, penipo pose Mosese waŵerengeka, chivwinkhu cheche pa mitima yawo. 16Kweni penipo pose wangang'anamukiya munthu ku Mbuya, chivwinkhu cho chamuvwinkhulikiya limu. 17Kweni Ambuya ndi Mzimu, ndipo kweniko kwe Mzimu wa Mbuya, kweniko so kwe wanangwa. 18Ndipo ifwe tose, ndi chisku chakuvwinkhulika, tithoŵa uli ndi mu kayilole unkhankhu wa Mbuya, ndipo tisanduskikiya mu chikozgu icho cha kaŵiru kake, kutuwa ku unkhankhu kuya ku unkhankhu, nge ndimo uziya kutuliya ku Mbuya yo ndi Mzimu.

Currently Selected:

2 ŴaKorinte 3: TongaMw

Highlight

Copy

Compare