2 ŴaKorinte 4

Kuŵika usambasi wa vyamuzimu mu ubende

1Chifukwa chenichi pakuŵa nawo uteŵeti wenuwu, uli ndimo tarondere lisungu laku Chiuta, kuti tidembereka cha. 2Kweni takana vyachibisibisi vyasoni, taŵakwendaendamu uchenjezi cha, pamwenga ŵakuchitiya kwafuzi ndi mazu ghaku Chiuta cha, kweni mu karongoroledu ka uneneska wakujirongo ku njuŵi za munthu yose paurongo paku Chiuta. 3Kweni asani evangeli widu ngwakuburumutizgika, iku ngwakuburumutizgika mwaku wo mbakuyowa. 4Mwaku ŵeniwo Chiuta wa mgonezi uno waburumutizga vinjeru vya ŵambura chivwanu, viyo kuti ungaŵaŵaliya cha ukweru wo wa evangeli wa unkhankhu waku Kristu, yo nchikozgu chaku Chiuta. 5Chifukwa vyo titaula kuti vyaku taŵeni cha, kweni Kristu Yesu nge ndi Mbuya, ndi taŵeni ulaka mbateŵeti ŵinu pa chifwa chaku Yesu. 6Pakuti ndi Chiuta yo wanguti, “Kutuwa mu mdima ukweru uŵalenge.” Ndiyo waŵaliya mu mitima yidu kungweruska mziŵiru wa unkhankhu waku Chiuta mu chisku chaku Yesu Kristu.

7Kweni mbiku yeniyi te nayo mu viyaŵi vyadongo, kurongo kuti nthazi yo yijumpha vinthu vyose njakutuliya kwaku Chiuta, kuti njaku taŵeni cha. 8Mosemose te ŵakusuzgika, kweni kuti te ŵakufyekeka cha; te ŵakutimbanizgika, kweni ŵakutondeka cha; 9te ŵakuŵembeka, kweni ŵakujowoleka cha, te ŵakutesulika, kweni ŵakujowoleka cha, te ŵakutesulika, kwani ŵakwanangika cha; 10nyengo yose tipinga mu liŵavu nyifwa yaku Yesu, alinga kuti umoyo so nawo waku Yesu ulongorekenge mu liŵavu lidu. 11Chifukwa nyengo yose taŵakuŵa ŵamoyo tiperekeka ku nyifwa chifukwa chaku Yesu, mwakuti umoyo nawo waku Yesu urongolekenge mu liŵavu lidu lachifweni. 12Viyo na, nyifwa yitakatakiya mwidu, kweni umoyo mwinu.

13Kweni pakuŵa ndi mzimu wo waviyo pe wa chivwanu, kwakulingana ndimo kwalembeke, “Ndinguvwana, chifukwa chenichi ndingukamba,” nafwe so tivwane, ndipo chifukwa chenichi tikamba, 14tiziŵa kuti mweniyo wanguyuska Ambuya Yesu, wamyuskaifwe so pamoza ndi Yesu, ndipo wakatitoriyanga ifwe pamoza namwe pamaso pake. 15Chifukwa vyose vyo viŵiya chifukwa chinu, alinga kuti wo wezi, wakwandaniskikiya mu kuwonga kwa urapasi ufurwiyenge ku unkhankhu waku Chiuta.

16Chifukwa cho kuti tidembereka cha. Inya chingana umunthu widu wakubwaro uvumuka, ndikweni wamkati wo uchitika ufya zuŵa ndi zuŵa. 17Chifukwa suzgu yidu yiyuyu yakanyengo yititataliya kwakutaruliya taruliya uzituwa muyaya wa unkhankhu wambura mapimika. 18Tichidaŵira ifwe vyakuoneka cha, kweni vyambura kuwoneka; chifukwa vyakuwoneka vye vyanyengo; kweni vyambura kuwoneka vyamuyaya.

Currently Selected:

2 ŴaKorinte 4: TongaMw

Highlight

Copy

Compare