2 ŴaKorinte 2

1Kweni ndingujiteme chenichi, kuti pakuza so kwinu ureke kuŵa ulendo wa chitima. 2Chifukwa asani ine ndimkwininskani na njani yo wangandikondweska, asi ndimweniyo wakwininiskika ndi ine? 3Ichi ndicho chifukwa ndingulembe, mwakuti vinu nditakuti ndaza, ndingazachiŵa ndi chitima chakutuliya kwaku ŵeniwo ŵangwenere kundikondweska, ndawakugomekezge mose kuti chimwemwe changu nchimwemwe chaku mose. 4Ndingumlembiyani mu suzgu yeni yikuru, mu urwirwi wa mtima ndi mu masozi ghanandi; kuti ndakhumbanga kumukwininiskani cha, kweni kuti muchiziŵe chanju chakuzara cho nde nacho mwaku imwe.

5Kweni asani yumoza wakwininiska, walive kukwininiska ine, kweni kurwandi imwe mose (alinga ndingarutiliyako cha). 6Ku munthu waviyo nchakwenere chilangu cho chaŵikika paku ndi urapasi wa mpingu wo; 7viyo kuti kuchiri kunyake mujiwezge mumugowoke ndi kumsangaruska, vinu kokuli wangakoleka ndi chitima chakuruska 8Chifukwa chenichi ndikuŵeyereni rongoni ndi kukhozga chanju chinu paku iyo. 9Ichi ndichu chifukwa ndingulembe alinga kuti ndiziŵe ndikupanikizga vinu mwe ŵakuvwiya mu vinthu vyose. 10Kwaku mweniyo yose mugowoke kanthu ine nane so ndimugowokiyenge. Chifukwa asani ine nane so ndimugowokiyenge. Chifukwa asani ine nane, ndimugowoke, ndamugowoke chifukwa chinu pa maso ghaku Kristu; 11mwakuti tireke kupundika ndi Satana yo; chifukwa tireka kuziŵa cha fuzi yake.

Chigowoke kwaku yo waguŵiska ŵanyake

12Kweni ndati ndaza mu Troa kwachimemeza evangeli waku Kristu, nanga khomo lingundijurikiya mu Mbuya; 13kweni ndengavi chipumulu mu mzimu wangu, chifukwa chakureka kumsaniya mwenimuwa Tito mbali wangu; viyo pakurayirana nawo ndingurata ku Makedonia.

14Kweni chiwongu chiŵiye Chiuta, mweniyo watipundiskiya nyengo zose mwaku Kristu, ndi wasapatiskiya mu malo ghose fungu la chiziŵisku chake mwaku ifwe. 15Pakuti te chema chaku Kristu kwaku Chiuta, mu ŵakutaskika ndi mu ŵakutayika; 16kwaku yaŵa fungu la nyifwa ku nyifwa; ku ŵanyake wo fungu la umoyo ku umoyo. Ndipo wakukwaniya vyenivyo njani? 17Chifukwa kuti te nge mbanandi wo cha, ŵakukazuzga mazu ghaku Chiuta: kweni nge mbanthu ŵaneneska, ŵakupakika ndi ŵakupatulika ndi Chiuta, mu maso ghaku Chiuta, tirongorore mwaku Kristu.

Currently Selected:

2 ŴaKorinte 2: TongaMw

Highlight

Copy

Compare