1 Timote 4

Ŵasambizgi ŵatesi

1Kweni Mzimu iyo wakamba pakweru, kuti mu nyengo zakumariya ŵanyake ŵadezukengekoku chivwanu, pakuphwere mizimu yirandizgi ndi visambizgu vya ŵademone, 2mu fuzi ya ŵatesi, wo mbakochereka mu njuŵi zaku ŵija, 3ndi mbakukanizga kutorana, ndi mbakulanguliya kufunga ku vyakurgha, vyenivyo Chiuta wangwatiya kurondeka kwakuwonga ndi ŵakuvwana ndi ŵakuziŵiska uneneska wo. 4Pakuti chakwatika chose chaku Chiuta nchamampha, ndipo kangakanizgika kanthu cha, asani karondeka ndi kuwonga; 5chifukwa kapaturikiya mu mazu ghaku Chiuta ndi mu rombo.

Mteŵete wamagomekezgeka waku Yesu Kristu

6Asani uŵakumbuska ŵabali ndi vyenivi, uŵenge mteŵeti mweneko waku Kristu Yesu, wakulereka mu mazu gha chivwanu, ndi gha chisambizgu cheneko chenicho warondo kuno ku le: 7kweni nthanu zamtonyoru ndi zaukhongwe kananga. Kweni ujilimbiskiye ku uwopa Chiuta: 8chifukwa kujilimbiska ko kwaliŵavu nkhwakwanduliya kumanavi; kweni uwopa Chiuta ngwakwanduliya vyose, pakuŵa nacho chipanganu cha umoyo wasono ndi chaku wo utakuzanga. 9Ndamagomekezgeka nenedu lo, ndipo ndakwenere nchakati yose. 10Chifukwa cheni chititataliya ndipo tilimbalimbiya, pakuti tagomekezge paku Chiuta wamoyo, mweniyo ndi Mtaski wa ŵanthu wose, ukongwa wa ŵachivwanu.

11Languliyanga vyenivi, ndi sambizganga vyo. 12Wareke munthu yose kuyeya umpupuka wako; kweni uŵe chandiru cha ŵakuvwana mumazu, mu nkharu, mu chanju, mu chivwanu, mu ukhovu. 13Mpaka nthuza, phwere kuŵerenga, kuchiska, kusambizga. 14Ungachijowo cha chaulera cho chamwako, chenicho chingupaskika kwaku iwe penipo ŵamchimi ŵangurongoro, ndi ŵara ŵanguŵikapo manja. 15Phwerenga vyenivi jaririyanga mwaku vyo, alinga kuti kakiyakiyidu kako kawoneke kwaku wose. 16Jichenjeriyenge wamweni, ndi so ku chisambizgu chako. Jaririyanga mwaku vyenivi; chifukwa pakuchita chenichi ujitaskenge wamweni ndi wo ŵatukuvwa.

Currently Selected:

1 Timote 4: TongaMw

Highlight

Copy

Compare