1 Timote 5

Nchitu ya ŵachivwanu

1Ungachenyanga cha mura, kweni mchiskenge nge ndi usu; ŵamanako nawo nge mbabali, 2ŵanthukazi ŵara-ŵara nawo nge mbanyoko; ŵamanako nawo nge mbazichi, mu ukhovu wose. 3Tumbika vyoko vyo ndi vyoko vyeneko. 4Kweni asani choko chinyake che nawo ŵana pamwenga ŵazuku, ŵasambire yaŵa danga kuchitiya mbumba yaku ŵija ulemu, ndi kuwerezga ŵapapi ŵawo liwerezga chifukwa chenichi nchamarondeka mu maso ghaku Chiuta. 5Kweni choko cheneko ndi chamasiya chigomekezga paku Chiuta, ndipo chijaririya mu maniniziku ndi mu marombo usiku ndi msana. 6Kweni cho chitechitechi chafwa cheche chamoyo. 7Ivi navyo languliyanga, alinga kuti viŵe vyambura kalema. 8Kweni asani munthu wareka kuŵarongosole limu ŵaku yija, ndi viŵiviŵi ŵapake pa nyumba, wakana chivwanu, ndipo ndi muheniko kwakuruska mzira chivwanu.

9Chingalembeka cha choko chakupereŵe virimika machumi ghankhonde ndi limoza (60) cho chinguŵa muwoli wa munthurumi yumoza, 10chakusimikizgikiya mu nchitu zeneko, asani chalera ŵana, asani charonde ŵalendo ndi wezi, asani chasambiska marundi gha ŵakupaturika, asani chovya ŵakusuzgika, asani chandondoloska mlimu wose wamampha. 11Kweni vyoko vimanako kananga, chifukwa vyati vyatwangiya paku Kristu, vikhumba kuŵirwa so; 12ndipo vituŵa ndi chisusa, pakuti vyajowo chivwanu chawo chakudanga. 13Napu so visambira kuŵa vikata, vyakuuraura ku nyumba ndi nyumba; ndi vikata pe cha, kweni so vyapa mlomo#5.13 vyapa mlomo: uku ndiku kuti ŵambembe, ŵakuŵereŵeta vinandi. ndi vyamwendanatu, vyakurongoro vyamburakwene. 14Viyo na ndikhumba vimanako kuŵirwa so, kupapa ŵana, kuruliska nyumba, kupaska nyengo cha ku ŵamawongu yaku titukiya: 15chifukwa ndisono vinyake vikunyongoke kuvuli kwaku Satana. 16Asani munthukazi wachivwanu we navyo vyoko, wavyovye, ndipo ungazitiskika cha mpingu wo; alinga kuti ungavyovya vyoko vyeneko.

17Ŵara wo ŵateruzga kaunthu ŵenereskeke thumbiku lakuwerezga, viŵi-viŵi wo ŵatakatakiya mu mazu ndi chisambizgu. 18Chifukwa lititi lembo lo, “Ng'ombe yakupwantha trigu ungayisunamiskanga cha.” Ndipo, “Wanchitu ngwakwenere mphotu yake.” 19Pa mura ungarondi yapo chipacha cha, kwambura kuti mpha ŵakaboni ŵaŵi pamwenga ŵatatu. 20Ŵakulakwa uŵachenye mu maso ghaku wose, alinga kuti ŵakujapo nawo ŵaŵe ndi chopu. 21Ndikuchenjezga pa maso ghaku Chiuta, ndi ghaku Kristu Yesu, ndi gha ŵangelo ŵakusankhika, kuti usunge vyenivi kwambura chisankha, wakuchitiya kanthu pa chanasi cha. 22Ungaŵikapo manja pa yumoza ruŵiruŵi cha, chingana nkhusangana mu vilakwa vya ŵanyake cha: ukajisunganga mkhovu.

23Ungamwiyamwiya maji cha, kweni imwa vinyo nayo mumanavi, chifukwa cha chifu chako ndi mauthomboru ghako ghanandi.

24Vilakwa vya ŵanthu ŵanyake viwoneke limu, vyakudanjiyako ku cheruzgu, kweni ŵanyake nawo viŵarondo. 25Kwakulingana nako kwe nchitu zeneko zo ziwoneke limu, ndipo nanga zambura kuwoneka zo kuti zingaziŵa kubisika cha.

Currently Selected:

1 Timote 5: TongaMw

Highlight

Copy

Compare