1 Yohane 2

Kristu movwili widu

1Mwatwana twangu, ndikulembiyani vyenivi kuti mungalakwa cha. Ndipo asani munthu wangalakwa, nkhoswi te nayo ku Dada, Yesu Kristu murunji yo: 2iyo nayo ndi mphepeska pa chifukwa cha vilakwa vidu; ndipo pa vidu pe cha, kweni so pa chifukwa chaku vya charu chose. 3Ndipo mwaku chenichi tiziŵa kuti timziŵa iyo, asani tisunga marangu ghake. 4Yo watiti, “Ndimziŵa,” ndipo marangu ghake wareka kughasunga, ndi mtesi, ndipo mwaku iyo uneneska mulive: 5kweni mweniyo yose wasunga mazu ghake, nadidi mwaku iyo chanju chaku Chiuta chifiskika. Mwaku chenichi tiziŵiska kuti te mwaku iyo; 6yo watiti waja mwaku iyo, nayo so watenere kwenda, uli ndimo wangwende Yuwa.

Dangu lifya

7Mwaŵakwanjiwa, kuti ndikulembiyani dangu lifya cha, kweni dangu lakale, lenilo mwaŵa nalo kutuwa ku mtendeku. Dangu lo lakale ndi mazu ghenigho mwavwa. 8Ndipo so, ndikulembiyani dangu lifya lenilo mbuneneska mwaku iyo ndi mwaku imwe; pakuti mdima wo ukungunuka, ndipo ndi sono kungweruka kweneko kuŵala. 9Yo watiti we mu kungweruka, ndipo ngwakumtinkha mbali wake, weche mu mdima mpaka sono. 10Yo ngwakwanja mbali wake, waja mu kungweruka, ndipo mwaku iyo mulive chiguŵisku. 11Kweni yo ngwakumtinkha mbali wake wemu mdima, ndipo mu mdima wo watenda, ndipo kuti waziŵa cha kweniko wata, pakuti mdima wo waburumutizga maso ghake.

12Ndikulembiyani, mwatwana twangu, chifukwa vilakwa vinu vyarekeke imwe pa chifwa cha zina lake. 13Ndikulembiyani mwaŵada chifukwa mumziŵa mweniyo ngwakutuliya ku mtendeku. Ndikulembiyani, mwamadoda, chifukwa mwampunda mheni yo. Ndikulembiyani, mwaŵampupuka, chifukwa mumziŵa Dada. 14Ndikulembiyani, mwaŵana chifukwa mumziŵe mweniyo nga ku mtendeku. Ndikulembiyani, mwamajaha, chifukwa mwe ŵanthazi, ndipo mazu ghaku Chiuta ghaja mwaku imwe, ndipo mwampunda muheni yo.

15Munganjanga charu cha, chingana ndi vyo vyamu charu. Asani munthu watanja charu cho, kuti chanju cho cha Dada che mwake cha. 16Pakuti chose chamu charu nchilakalaka cha nyama, ndi chilakalaka cha maso, ndi chitumbwa cho cha umoyo, kuti nchakutuliya ku Dada cha, kweni nchaku charu cho. 17Ndipo charu chikungunuka, ndi chilakalaka chake; kweni mweniyo wachita khumbo laku Chiuta, wajaririya muyaya.

Ŵamawongo ŵaku Kristu

18Mwatwana, ndi ora lakumariya: ndipo nge ndimo munguvwiya kuti mkanakristu watuza, sono nako ŵalipo ŵamkanakristu ŵanandi; ndimo tiziŵiya kuti ndi ora lakumariya. 19Ŵangutuwamo mwidu, kweni kuti ŵenga ŵamwaku ifwe cha; chifukwa asani ŵenga ŵamwaku ifwe, mphanyi ŵangujaririya pamoza nafwe; kweni ŵangutuwamo mwakuti kuziŵikwe kuti wose mba mwaku ifwe cha. 20Ndipo imwe mwe ndi chitukutizga chakutuliya ku Wakupaturika yo, ndipo muziŵa vyose. 21Ndikulembiyani kuti nchifukwa mureka kuziŵa cha uneneska wo; kweni muwuziŵa, chifukwa palivi utesi wo ngwakutuliya ku uneneska. 22Njani mtesi yo? Ndi mweniyo wakana kuti Yesu ndiyo Kristu. Mweniyo ndi mkanakristu yo, mweniyo ngwakukana Dada ndi Mwana. 23Yose wakumkana Mwana, walive so Dada: yo ngwakuzomera Mwana, we nayo Dada so. 24Imwe, chenicho mwavwa kutuwa ku mtendeku chijaririye mwinu. Asani chingajaririya mwinu chenicho mwavwa kutuwa ku mtendeku, namwe so mujaririyenge mu Mwana ndi mu Dada. 25Ndipo chenichi nchipanganu chenicho iyo wangupangizgiya ifwe, Umoyo wo wamuyaya.

26Vyenivi ndikulembiyani paku wo ŵakurandizgani. 27Ndipo imwe, chitukutizga cho munguronde kwaku iyo, chijaririye mwinu, ndipo kuti mukavuka cha kuti munthu wakusambizgeni; kweni uli ndimo chitukutuzga chake chikusambizgiyani ndi vinthu vyose ndipo nchakuneneska, ndi kuti nchitesi cha, jaririyani mwaku iyo, uli ndimo chakusambizgiyani.

28Ndipo sono, mwatwana twangu, jaririyani mwaku iyo, alinga kuti, wachiwoneka, tiŵe ndi chigomezgu ndi kulengeka lilengu cha paurongo pake, pa uzi wake. 29Po muziŵiya kuti ndi murunji, ziŵani kuti yose yo ngwakuchita urunji wapapika kwaku iyo.

Currently Selected:

1 Yohane 2: TongaMw

Highlight

Copy

Compare