1 Yohane 3

Ŵana ŵaku Chiuta

1Alereni, chanju cho watipaska Dada, mwakuti titamulike ŵana ŵaku Chiuta: ndimo tiriri. Chifukwa chenichi chirive kutiziŵa, pakuti chengavi kumziŵa iyo. 2Mwaŵakwanjiwa, sono te ŵana ŵaku Chiuta, ndipo chindarongoleke ndasono mo tiŵiyenge. Kweni tiziŵa kuti, penipo wakawonekanga, tikaŵanga ŵakukozgana nayo; pakuti tikamuonanga mo waliri. 3Ndipo munthu yose wakuŵa nacho chigomekezgu chenichi paku iyo, wajitozga ulaka ndimo waliri wakutowa Yuwa.

4Munthu yose yo wachita chilakwa, wachita uchikana marangu nawo so: ndipo chilakwa mbuchikana marangu. 5Ndipo muziŵa kuti wanguwoneka Yuwa, alinga kuti watuzgepo vilakwa; ndipo mwaku iyo chilakwa mulive. 6Munthu yose wakuja mwaku iyo kuti walakwa cha: yose yo ngwakulakwa kuti wamuwona cha, chingana nkhumziŵa. 7Mwatwana twangu, munthu wangamrandizgani kose cha: yo ngwakuchita urunji ndi murunji uli ndimo waliri murunji Yuwa. 8Yo ngwakuchita chilakwa ngwakutuliya kwaku diabolo yo; pakuti kutuwa ku mtendeku walakwa diabolo yo. Mwana yo waku Chiuta wangurongoleke chenichi kuti wanange nchitu zo zaku diabolo. 9Munthu yose yo wapapika kwaku Chiuta kuti wachita chilakwa cha, pakuti mbeu yake yijaririya mwaku iyo: ndipo kuti waziŵa kulakwa cha, pakuti wapapika kwaku Chiuta. 10Mwaku chenichi ŵarongoleka ŵana wo ŵaku Chiuta ndi ŵana wo ŵaku diabolo: munthu yose wakuura kuchita urunji, kuti ngwa kwaku Chiuta cha, chingana ndi yo walive kumwanja mbali wake.

Yanjanane

11Pakuti wenuwu mbuthenga wo, weniwo mwavwa kutuwa ku mtendeku, kuti tanjane: 12Ulaka ndi Kaine cha, yo wenga wakutuliya ku mheni yo, ndipo wangubaya mhurwa wake. Ndipo wangumbayiya chifukwa chine? Chifukwa nchitu zake zenga ziheni, ndi za mhurwa wake zirunji. 13Mwa ŵabali, mungazizwanga asani charu chikutinkhani. 14Tiziŵa ifwe kuti tatuwako ku nyifwa kuyiyamo mu umoyo, pakuti titanja ŵabali wo. Yo wareka kwanja, wajaririya mu nyifwa. 15Munthu yose yo watinkha mbali wake ngwambanda: ndipo muziŵa wambanda kuti wendi umoyo wa muyaya mwaku iyo cha. 16Mwaku chenichi tiziŵiya chanju, mwakuti Yuwa wanguŵikiya pasi umoyo wake pa chifwa chidu: ndipo titenere ifwe kuŵikiya pasi maumoyo ghidu pa chifwa cha ŵabali wo. 17Kweni yose yo we nacho chuma cha charu, ndipo wawona mbali wake kuti wakavuka, ndi wamjariya lisungu lake, chanju cho chaku Chiuta chija uli mwaku iyo? 18Mwatwana twangu, tinganjiya mu mazu pamwe mu lilime cha; kweni mu nchitu ndi mu uneneska.

19Mwaku chenichi tiziŵiyenge kuti te ŵamu uneneska wo, ndipo paurongo pake tikhozgiyenge mtima widu, 20mwaku chose chenicho mtima widu ungatisuska; pakuti Chiuta ndi mkuruku ku mtima widu, ndipo waziŵa vyose. 21Mwaŵakwanjiwa, asani mtima ulive kutisuska, te nacho chigomezgu kuchiri kwaku Chiuta; 22ndipo chose chenicho tipempha, tironde kwaku iyo, chifukwa tisunga marangu ghake, ndipo tivichita vyakunozga pa maso pake. 23Ndipo lenili ndi dangu lake, kuti tivwaniyenge mu zina la Mwana wake Yesu Kristu, ndi kuti tanjane, uli ndimo wangutilanguliya. 24Ndipo yo ngwakusunga marangu ghake, waja mwaku iyo, ndi iyo mwake. Ndipo mwaku chenichi tiziŵiya kuti waja mwidu, mu Mzimu mweniyo wangutipaska.

Currently Selected:

1 Yohane 3: TongaMw

Highlight

Copy

Compare