CHIDZIWISO 3

Mphangwa kuna mpingo wa ku Saridi

1“Kuna mngelo wa mpingo wa ku Saridi umulembere kuti:

“Mafala akubulukira kuna nyakukhala na mizimu minomwe ya Mulungu pontho na nyenyezi zinomwe ule mbawa: Mabasako onsene ndimbaadziwa. Ndimbadziwa kuti una mbiri yakuti una moyo, kwache ndiwe wakufa. 2Lamuka uwangise pyakusala, pile pili chifupi kufa. Thangwi ndaona kuti mabasako hadamalisike pamaso pa Mulungu wanga tayu. 3Kumbuka pidafunziswa na pidava iwe; upivere mbauleka pyakudawa pyako. Ungakhonda kulamuka, ndinakudzera ninga mbava, iwe mbukhonda dziwa na ndzidzi wache ene unafuna kudza ine.#Mt. 24.43, 44; Lk. 12.39, 40; Chid. 16.15. 4Mbwenye iwe una anthu pang'ono ku Saridi, ale hadaswipise nguwo zawo na pyakudawa tayu. Munafamba na ine akuvala nguwo zakuchena thangwi mwathema kuchita tenepo. 5Nyakukunda anavazikwa pyakuchena ninga tenepa. Ine nkhabe dzafudza madzinawo m'bukhu ya moyo tayu. Ndinapilonga pakwecha pamaso pa Babanga na angelo ache ene kuti anthu enewa nganga.#Kub. 32.32, 33; Mas. 69.28; Mt. 10.32; Lk. 12.8; Chid. 20.12.

6“Ule ana makutu akuva, mbave pinalonga Mzimu Wakuchena kuna mipingopi!

Mphangwa kuna mpingo wa ku Filadelifia

7“Kuna mngelo wa mpingo wa ku Filadelifia umulembere kuti:

“Mafala akubulukira kuna nyakuchena na nyakuonadi, ule ana mfungulo, pontho ukhali wa Davite. Angafungula msuwo, nkhabe mbodzi anakwanisa kuufunga tayu. Angaufunga, nkhabe mbodzi anakwanisa kuufungula tayu mbawa:#Yes. 22.22; Yob. 12.14. 8Pimbachita iwe ndimbapidziwa. Ndimbapidziwa kuti una mphamvu zakuchepa, kwache wateweza chifunziso changa mbukhala wakukhulupirika kuna ine. Ndafungula pamaso pako msuwo wakuchimwanika kufungwa na munthu na mbodzi ene. 9Kulonga pya gulu ya Satana, anyakunama ale, ambalonga kuti mba Ayuda, kwache iwo si Ayuda tayu, ndinaadzesa kuna iwe mbalamba pamaso pako. Iwo onsene anapidziwa kuti ine ndimbakufunadi.#Yes. 43.4; 49.23; 60.14. 10Podi iwe wakoya matongero anga akuti upirire, inembo ndinakukoya mwadidi ndzidzi wa nyatwa unafuna kudza padziko yonsene yapansi dzayesa anthu onsene akukhala mwenemo. 11Ndikudza chinchino pano. Koya mwadidi pina iwe towera paleke khala mbodzi wakukubera mfupo wakuonesa kukunda kwako. 12Nyakukunda ndinamchitisa kukhala mzati m'Nyumba ya Mulungu wanga, iyembo nkhabe dzabulukamo tayu. Pana iye ndinalembapo dzina ya Mulungu wanga na dzina ya Mzinda wa Mulungu wanga, ule ndi Yerusalemu wachinchino wakutchitha kudzulu kuna Mulungu wanga. Ndinalemba pontho dzinanga yachinchino pana iye.#Chid. 21.2; Yes. 62.2; 65.15.

13“Ule ana makutu akuva, mbave pinalonga Mzimu Wakuchena kuna mipingopi!

Mphangwa kuna mpingo wa ku Laodikea

14“Kuna mngelo wa mpingo wa ku Laodikea umulembere kuti:

“Mafala akubulukira kuna nyakuchemerwa Ameni, ule ndi mboni yakukhulupirika na yakuonadi, pontho ndi phata ya pyonsene pidalenga Mulungu mbawa:#Miy. 8.22. 15Mabasako ndikuadziwa. Ndikupidziwa kuti si iwe wakutonthola penu wakupisa tayu. Mbudakhala wakutonthola penu wakupisa mbapidakhala pyadidi. 16Ndinati ndikuphule m'kanwa mwanga thangwi ndiwe wabebebe basi, mbukhonda khala wakutonthola penu wakupisa. 17Iwe umbalonga kuti, ‘Ndine wakufuma; ndina pinthu pizinji, pontho ine nkhabe sowa chinthu tayu.’ Kwache iwe nkhabe dziwa tayu kuti ndiwe wadzedze na wakutsukwalisa! Ndiwe wakutcherenga, boli-boli pontho wachipezi-pezi. 18Ndikukupanga kuti ugule kuna ine golidi wakucheneswa na moto, towera ukhale wakufuma. Ugule pontho nguwo zakuchena kuna ine kuti uvale mbubisa upezi wakupasa manyadzo una iwewu. Ugule pontho kuna ine mtombwe wa m'maso towera ukwanise kuona. 19Anthu onsene a pamtima panga ndimbaalongera mbandiatchunyusa. Tenepo uleke pyakudawa pyako kubulukira pansi pa mtimako.#Miy. 3.12; Aheb. 12.6. 20Yang'ana! Ndaimira pamsuwo pano kudidimiza. Ngakhala unango anava falanga mbafungula msuwo, ine ndinapita mwenemo mbandidya naye pabodzi iyembo mbadya na ine. 21Kuna nyakukunda ndinampasambo utongi kudzakhala chifupi na ine pampando wanga wachifumu, ninga kukunda kudachita ine mbandikhala chifupi na Baba pampando wache wachifumu.

22“Ule ana makutu akuva, mbave pinalonga Mzimu Wakuchena kuna mipingopi!”

Currently Selected:

CHIDZIWISO 3: SenaMw

Highlight

Copy

Compare