CHIDZIWISO 4

Pya kupembedza kwa kudzulu

1Kubuluka penepa ndidaona masomphenya mbandiona msuwo wakufunguka kudzulu. Fala idava ine pakutoma pale kulonga na ine ninga kulira kwa ngoma ile, idaveka pontho kuti, “Bwera kudzulu kuno, tenepo ndinakuonesa pinafuna dzachitika, penepi pingamala.” 2Kabodzi na kabodzi ndidagudumirwa na Mzimu Wakuchena, tenepo ndidaona mpando wachifumu kudzulu wakukhalirwa na munthu.#Ezk. 1.26-28; 10.1. 3Nyakukhala pampando ule akhali na makhaliro akuyetima ninga miyala yakudula yakuchemerwa yasipi na korinali. Mpando wachifumu ule udazungulirwa na taleza wakuoneka ninga mwala wakuyetimira wakuchemerwa samarada. 4Kuzungulira mpando wachifumu onthowo pakhali mipando inango yachifumu makumawiri na minayi. Pamipando pale padakhalirwa na akulu-akulu makumawiri na anayi. Iwo adavala nguwo zakuchena na pipewu pyachifumu pya golidi mumsolo mwawo. 5Kubulukira kumpando wachifumu ule mukhabuluka kuchetuma kwa njazi, pontho mungu na kuguma kwa chiphaliwali. Patsogolo pa mpando wachifumu ule pakhali nsakali zinomwe, zile ndi mizimu minomwe ya Mulungu.#Kub. 19.16; Ezk. 1.13; Zek. 4.2; Chid. 1.4; 8.5; 11.19; 16.18. 6Patsogolo pa mpando wachifumu ponthopo pakhaoneka ninga pakhali nyanza yakuoneka ninga gilazi yakuyetima ninga mwala wakuchemerwa khulustali.

Kuzungulira mpando wachifumu pale, pakati na kati kukhundu zache zinayi, pakhali pyakulengwa pyamoyo pinayi pyakukhala na maso uku na uku, kutsogolo na kunduli kwene.#Ezk. 1.22. #Ezk. 1.5-10; 10.14. 7Chakutoma chidaoneka ninga nkhalamu, chachiwiri chidaoneka ninga ng'ombe imuna, chachitatu chikhali na nkhope ninga ya munthu; pontho chachinayi chidaoneka ninga mphamba wakumbuluka. 8Pyakulengwa pyamoyo pinayipi chonsene chikhali na maphaphido matanthatu, pontho maphaphidowo adadzala na maso kunja na m'bwalo mwene. Mosiku na masikati ipyo pimbaimba mwakukhonda lekeza kuti,

“Wakuchena, wakuchena,

wakuchena ndi Mbuya Mulungu Wamphamvu zonsene,

ule akhalipo kale, alipo chinchino,

pontho anakhalapo kwenda na kwenda.”#Ezk. 1.18; 10.12; Yes. 6.2, 3.

9Ndzidzi onsene ukhapereka pyakulengwa pyamoyo pinayi pile demelero, chilemedzo na takhuta kuna nyakukhala pampando wachifumu, ule ana moyo kwenda na kwenda, 10akulu-akulu makumawiri na anayi ale akhapiponya pansi patsogolo pa nyakukhala pampando wachifumu ule mbampembedza iye wakukhala na moyo kwenda na kwenda ule. Iwo ambaponya pansi pipewu pyawo pyachifumu patsogolo pampando wachifumu ule mbalonga mbati,

11“Mbuya Mulungu wathu!

Ndimwe wakuthema kutambira demelero, chilemedzo na mphamvu.

Thangwi ndimwe mudalenga pinthu pyonsene,

pontho na kufuna kwanu pyonsene pidalengwa mbapikhalapo.”

Currently Selected:

CHIDZIWISO 4: SenaMw

Highlight

Copy

Compare