E'yo O'beza 9
9
Omveta onduaniri, oku ondua kokoruniri be
1 #
Mat 16:18; Efe 2:20; 1 Tim 3:15; Ebra 3:3-6 Ondua si i vile jo ra, ga vini pati i’diaferu aziri ’bo.
2Eri oli anyapa ini ’diyi ra, eri osa patiefi su ini ’bo, eri ede mesa ini ku ngonde indi.
3 #
Mat 22:3, 4, 9; Luk 14:17; Rum 10:15 Eri ope ezoanzi ini ’diyi ma ti amve aku amboru ma esele nguru ’diyia, oyuzu kini:
4 #
O’be 6:32; Mat 11:25 ’Ba azini ka ovu ondua kokoru, eri ma efi ’ dia! eri ’yo ’ba e’yo vaza kokoruri ma tia,
5 #
Ong 5:1; Isa 55:1; Mat 26:26-28 Mi emu, mi nya enya mani, mi mvu patiefi su mani osale ’bori.
6Emi ’ba ondua kokoru ’diyi, emi ku aza ja, emi ovu di idriru ani, emi aci geri e’yo vazaniria.
7Yi nga ’ba egapi agu edematararuri ma driari o’da o’da, azini ’ba egapi ’ba onzi ma driari nga ru onziri isu ra.
8 #
Mat 7:6; Zab 141:5 Mi ega agu edematararuri ma dria ku, kazu mi nguzuonzi ku; mi ega ’ba onduaruri ma dria,mu: eri nga ani mi le le.
9 #
Mat 13:12
Mi fe imbata ’ba onduaruri dri, eri nga di ani ovu onduaru aga ra; mi imba ’ba kililiruri, eri nga di ani zo onita ma alia drile.
10 #
Yob 28:28; Zab 111:10; O’be 1:7 Ruta ’bani Yehovani ruzuri eri ondua ma e’dozani; azini nita ’bani Mungu Alatararuri nizuri eri e’yo vazani,
11 #
O’be 10:27
Masi o’du mini nga yi ere kakau, azini eli mini adrizu ’diyi nga ezu drile drile.
12 #
Yob 35:6, 7 Mi ka ovu onduaru, mi ovu onduaru e’yo mi ngulupinisi; mi ka ovu edematararu, mi vuni nga e’yoni isu mi’i.
13Oku ondua kokoruri adri e’yo o’yo o’duko urusi; eri ovu e’yo vaza kokoru, eri nini e’yo aluni ku.
14Eri ri i vile jotilea, ’bili dria pari ngururu akua ’diyia,
15eri ma omve ani ’ba agapi geria ’diyi, ’ba mupi kililiru geri yirua ’diyi, kini,
16’Ba ka ovu ondua kokoru, eri ma, efi’dia! Azi eri ’yo ’ba e’yo vapi kuri tia,
17 #
O’be 20:17
Yi mvuza ’bani oguleri alu alu; enya ’bani nyale oyokolosiri eri ayikoni tu.
18Te agu nde nini kini ’ba draza ’dale ci, azini wa’di oku ndeni yi ango va aliru Pari ’ba drazaniri ma alia, ’dini ku.
Bible in Lugbara © United Bible Societies, 1966.