E'yo O'beza 10
10
’Ba kililiru ’diyi pi ma e’yo o’bizu ’ba onzi ’diyi be
1E’yo o’beza Sulemanini. Mva onduaruri ayiko fe ati dri, te mva ondua kokoruri asi nziza fe i andri dri.
2 #
Zab 49:6; Luk 12:19; Dan 4:27 Lonyi e’yo onzini ma orodri yo, te onyini nga ’ba pa dra sia,
3 #
Zab 10:14
Yehova ngani a’i abirini ’ba kililiru ’diyi fuzu ku, te eri ngani a’i ’ba onzi ma isu e’yo yini li ’bazuri ku.
4 #
O’be 13:4
’Ba azi ngapi dri ovurusiri nga efu alioru, te ’ba azi ngapi asi driasiri ma drini nga eri ’ba afa e’iru.
5Agu afa okupi elisiri eri mva onduaruni, te ’ba o’du kopi ewu anya lozurisiri, eri mva drinza fepiri.
6 #
Esi 7:8
Asi ndrizani adri ovu ’ba onyi beri ma dria, te ’ba onziri zi egana i ma tilea ci.
7 #
Zab 9:5, 6; Ekl 8:10 ’Bani ’ba kililiruri ma e’yo egazuri eri drilebani, te ’ba onziri ma runi nga ma ra.
8’Ba ondua be i ma asiari nga azita a’i, te ’ba ondua kokoru e’yo ’yopi saaruri nga e’de va.
9 #
Zab 23:4; Isa 33:15, 16 ’Ba acipi kililiruri eri aci e’yo ’yaasi, te ’ba geri be goligoliruri nga i e’da ra.
10’Ba e’yo bipi i milesiri candini engani, te ’ba ondua kokoru e’yo ’yopi saaruri nga e’de va.
11 #
Zab 37:30; 107:42 ’Ba onyi beri ma tileri yi a’di idriniri’i, te ’ba onziri zi egana i ma tilea ci.
12 #
Yak 5:20; 1 Pet 4:8; 1 Kor 13:4 Ngutani fe agatani efuni, te letani ezata ma dri a’bu dria ci.
13 #
Luk 4:22
’Ba yi ondua isu ’ba e’yo vaza beri ma tilea, te kalisi yi ’ba e’yo vaza kokoruri ma nguku co.
14’Ba onduaru ’diyi nita ma ta mbani, te ’ba ondua kokoruri ma tileni dri jaza eji ogogoni.
15 #
Yob 31:24; O’be 18:11; Luk 12:19; 1 Tim 6:17 ’Ba afa e’iru ma lonyi yi aku erini okporuri, te ’ba alioru ’diyi ma alioni eri dri jaza yiniri’i.
16’Ba onyi beri ma azi ngaza fe dri idri vualeru, te ’ba onziri ma oya fe dri onzi vualeru.
17’Ba imbata eripiri ovu geri idriniri ma alia, te ’ba e’yo ’bani egazu eri ma driari gapi siri eri aba aba.
18’Ba nguta zipi i asiari ovu tile be inzoru, te ’ba e’yo onzi ekupi ’ba azi ma ruaari eri ondua kokoru.
19 #
Ekl 5:3; Zab 39:1; O’be 17:27, 28; Yak 1:19 E’yo ’yole karakarau ’diyi ma alia ezata eceni ku, te ’ba i ti bipi ciri ’ye onduasi.
20’Ba onyiruri ma andreri ekile dahabu onyiru turile; ’ba onziri ma asi si i afa aje be wererile.
21’Ba onyiruri ma tileni nyaka fe ’ba kakau dri, te ’ba ondua kokoru ’diyi odra e’yo vaza akosi.
22 #
E’do 12:2; Azi 8:17, 18; 1 Sam 2:7, 8; 1 Tim 4:8 Asi ndriza Yehovaniri fe ’bani ovuzu afa e’iru, azini eri o’bani candi asi ndriza nde be aluni ku.
23E’yo onzi ’yezuri si avitale ’ba ondua kokoruri dri, te e’yo ’yezu onduasiri ovu ’dinile indi ’ba e’yo vaza beri dri.
24 #
Yob 15:21; Mat 5:6 E’yo ’ba onzirini ruleri nga eca eri ma ruaani, te yi nga e’yo ’ba onyiru ’diyini asi ’bazu driniari fe yi dri.
25 #
Zab 15:5; Mat 7:24; 1 Tim 6:19 Oliriko ka aga ’bo, isu ’ba onziri ’daa yo, te ’ba onyiruri nga pa so kirikiri ’dani ’dani.
26Ekile patiefi su drazaruni ’ba ma si irilerile, ekile acikani file ’ba ma miliarile, ovuou ovu ’dinile ’ba eri ma ti pepi ’diyi dri.
27 #
Ekl 7:17
Ruta Yehovani ruzuri eri o’du ’bani ere kakau, te yi nga ’ba onzi ’diyi ma eli li aga.
28 #
Zab 16:9; Rum 5:2; Yob 8:13 E’yo ’ba onyiru ’diyini tele asi tezasiri nga ofu ayikoru, te e’yo ’ba onzi ’diyini asi ’bazu driniari nga avi ra.
29 #
Zek 10:12; Fil 4:13; Isa 40:31; Zab 1:6 Yehovani pari okporu ’ba acipi kililiruri dri, te eri dri jazani ’ba e’yo onzi ’yepi ’diyi dri.
30Yi ngani fe ’ba onyiruni sizu amve ’dani ku, te ’ba onzi ’diyi ngani adri angu ma alia ku.
31’Ba onyiruri ma tileni ondua ofu’i te yi nga andre lokarori li, va.
32’Ba onyiruri ma tileni e’yo ’bani ecole a’ile ’yekeri ni ra, te ’ba onziri ma tini e’yo ’yo ambosi.
Bible in Lugbara © United Bible Societies, 1966.