E'yo O'beza 4
4
Asi ndriza onduani
1 #
Zab 34:11; O’be 1:8 Anzi mani, emi eri imbata atani feleri, emi co bile emi ma ni e’yo vazu beni;
2mani imbata onyiru fele emi dririsi: emi ku azita mani ku.
3 #
2 Sam 12:24; 1 Sur 29:1 A’disiku ma ovu ndra mva e’yereru ata mani dri, ma ovu mva alu ma andrini lele turi.
4 #
1 Sur 28:9; Efe 6:4 Te ma ati imba ndra ma ra, eri ’yo ma tia, Asi mini ma mba e’yo mani ’yoleri ma ta; mi ma ’ye mani azilerile, mi nga di ovu idriru.
5Mi nda ondua, mi nda e’yo vaza, mi dri ma avi e’yo efupi ma tilia ’diyisi ku, mi oja mi kalaa yi kuzu ku. Mi ku eri ku, te eri nga mi ta
6 #
2 Tes 2:10
mba; mi le eri avasi, te eri nga mi agei te.
7 #
Mat 13:44; Luk 10:42 Ondua agani, mi ma nda ondua’i; adaru, afa dria mini ndale ’diyisi mi ma nda e’yo vaza’i.
8 #
1 Sam 2:30; Dan 12:3 Mi inzi eri inzi, eri nga mi idri drile; eri nga mi ’ba inzitaru, mi ka mi ebi eri be.
9Eri nga onyiafa ndrizaruri ’ba mi dria; eri nga oku ndrizaruri su mi dria indi.
10Mi eri, mva mani, mi a’i e’yo mani ’yole ’diyi, eli mini adrizu idriru ’diyi nga ovu ani kakau beni.
11Ma imba mi geri onduanirisi ’bo; ma ce mi dri e’yo kililiruri ma geria ra.
12 #
Zab 18:36; 91:11; O’be 3:23; 4:19; Yer 13:16; Yoh 11:9, 10 Mi ka aci ra, ’ba ngani mi pa ombe ku; mi ka nzu ra, afa azini ngani mi pa si ku.
13Mi bi imbata ci, mi fe eri ma mu ra ’dini ku; mi mba eri ma ta, erini ovule idri miniri’irisi.
14Mi fi acizu ’ba onzi ’diyi ma gerisi ku, mi aci ’ba e’yo onzi ’yepi ’diyi ma letia ku.
15Mi ona mi, mi aga leti nderisi ku; mi oja mi kalaasi, mi aga drile,
16A’disiku yi koni o’du ku, de nga yi ’yeni e’yo onzi ku; o’du koza yi ma milia yo, de nga yi feni aguni e’dezu ku.
17A’disiku yi enya azi onziniri nya, yi vini patiefi su egananiri mvu’i.
18 #
Mat 5:14; Fil 2:15; 2 Sam 23:4 Te ’ba kililiru ’diyi ma geri ovu ekile diza dipi di dirile, eri di ’dani drile drile, cazu anguni ovuria etururia.
19 #
1 Sam 2:9; Yob 5:14; Isa 59:9, 10; Yer 13:16; Yoh 12:35 Te ’ba onzi ’diyi ma geri ovu angu bizale; yi nini a’di afa si yi ma pani yari ku.
20Mva mani, mi eri e’yo mani ’yole ’diyi e’yere; mi co bile e’yo mani oluleri vu.
21Mi fe yi ma avi mi miliasi ku; mi mba yi ma ta mi asi ma alia.
22E’yo nde ’diyini ovule idrini ’ba yi isupi ’diyi dri, azini rua ala yi ma rua dria dririsi.
23Mi mba mi asi ma ta mi asi driasi; e’yo idrinirini efule aleniarisi.
24Mi ku ti e’yo ’yopi ambosi akari ja, mi ku tile e’yo lokiriru ’yopiri mi vurisi ziri,
25Mi fe mi mile ma lu drile, mi ku mi mile ongoro’bi ma fe ti mi drilialeru kilili.
26 #
Ebra 12:13
Mi ega pari mini mi pa ’bazuri ma e’yo e’yere, geri mini ’diyi dria nga adri ani kililiru.
27 #
Isa 1:16
Mi oja mi dri ndia kani dri ejia ku; mi enze mi pa e’yo onzi aliarisi ra.
Bible in Lugbara © United Bible Societies, 1966.