E'yo O'beza 25
25
E’yo o’bile ’diyi pi imbata adriza kililiruri ma e’yosiri be
1E’yo o’beza Sulemanini ’ba Hezekia opi Yudaari vile ’diyini sile dika ’diyi yi ’di.
2 #
Rum 11:33; Yob 29:16 Eri diza Munguniri e’yo azini zizu, te diza opiniri eri e’yo ma eti ndruzu.
3Ekile ’buni ovule re uru turile, azini nyakuni ovule aliru va turile, ’dinile ’ba econi opi ma asisile ma eti vazaru ku.
4Mi nze ayaze dahabu ma driarisi raka, ’ba oka dipiri nga ani afa onyiruri ede ndo;
5mi nze ’ba onzi opi ma miliasi oguna erini nga di pa so okporu onyi ma alia ani.
6 #
Luk 14:8-10
Mi ’ba mi drile mi drisi opi ma milia ku, te mi so pa ’ba amboru ’diyi ma paria ku;
7a’disiku ’bani ’yozu mi tia, Mi etu ’ dole-ri eri onyiru aga ’bani mi ’bazu ele opimva ma miliari ra. E’yo mini ndrele mi milesiri
8 #
Mat 5:25
mi ofu eri agataru mbele ku; a’disiku vilerisi mi nga a’di ’ye, agyi mini ka nga drinza fe mi dri ’boria ya?
9 #
Mat 18:15
Mi nze e’yo mini agataruri ma eti ’ba mi jo ejeliari ma ngulupi ma tia, te mi ece e’yo ’ba azinini ndrule mi tiari ’ba azini dri ku;
10’ba e’yo mini eripiri kazu mi o’dazu ku, ru onzi mini kazu awuzu ’dani ku.
11E’yo ’bani ’yole ’yekeri ovu ekile patiefi meleru ovupi afazu dahaburu ma aliarile.
12Asi omiza ’ba egapi ’ba ma dria onduasirini si i ekile nziabia edele melesiri azini onyiafa edele mele alarusirile, ’ba e’yo nde eripiri ma bilia.
13Ekile egbe si emveruni ewu anyani kazurisirile, ojiou adaruri ovu ’ba e’ri ti pepi ’diyi dri ’dinile; erini opi ini ma orindi engale dikarisi.
14 #
Yud 1:12
’Ba i ipipi afa feza ini fele kurisi si ekile iriti oli be ozoo kokorurile.
15’Ba ka te e’yere etu izuru, eri nga opi ma asi oja i vu ra, andre e’yereri fala nyo ra.
16Mi isu anyuoso ra ya? Mi mbe lu dri fupi ecopi misiri, mi kazu trazu erisi huruhuru ogbezu ani ku.
17Mi pa ma fi mi agyi vile joa pale kakau ku, eri kazu andezu misi, mi nguzu onzi ku.
18 #
Zab 140:3
’Ba e’yo eti nzepi inzoru ’ba i ma jo eseliari ma ruaari si ekile oyi amborurile, seile, ’ye si ndrindririle.
19 #
Yob 6:14-20; 2 Tim 4:16 Mi ka mi asi ’ba ’ba e’yo ada kokoruri ma dria o’du candinisi, eri ekile si nyozaru, kani pa acozarurile.
20 #
Dan 6:18
’Ba ongo ngopi ’ba asi nziza beri driri si ekile ’ba bongo trupi o’du egbenisirile, ekile patiefi su drazaru osuzu a’i ma driarile.
21 #
Rum 12:20; Mat 5:44 Ari’bo mini ka ovu abirisi, mi: ma fe enya eri dri; avijo ka eri fu ra, mi ma fe eri dri yi mvuzani;
22 #
2 Sam 16:12
a’disiku mi nga aciolu oku eri ma dria, azini Yehovani nga orodri fe mi drini.
23Oli engapi kala andraleruari ozoo ejini; azini andre asururi mile aokoru ejini.
24Eri onyiru ’bani adrizu jo dri senderu ma kala aluria aga ’bani adrizu jo walaru ma alia oku e’yo o’yopi kurukuru zuri beri ra.
25Ekile yi anzuru ’ba yi avijo beri dririle, e’yo kuza baru engapi angu ziriari ovu ’ dinile.
26 #
Mik 7:8
Ekile yi a’di ’bani pa otuzu alenia saarurile, ekile yi egapi ega ’bani ezalerile, ’ba onyiru e’depi va ’ba onzi ma e’yosiri ovu ’dinile.
27 #
Luk 14:11
Anyuoso mbezu turi ovuni onyiru ku; ’bani inzita ndruzu yi driri ovuni inzitaru ku.
28’Ba i ma orindi ta mbapi kuri ovu ekile aku amboru asurupi va kali kokorurile.
Bible in Lugbara © United Bible Societies, 1966.