E'yo O'beza 24
24
1Ma nga oru a’dungare ya? Ma nga mu nda dika. Mi ’ba ma’yala ’ba e’yo onzi ’yepi ’diyi ma e’yosi ku, mi ma le ovuzu yi be tualu ku;
2yi ma asini e’yo ’ba inzazuri otulerisi, yi ma tileni e’yo onzi ’yole ’ba azini ma ruaarisi.
3Onduasi ’ba yi jo si, e’yo vazasi ’ba yi fe joni pa sozu okporu;
4nitasi jo alizani ga afa aje amboru ’diyi tre lonyi onyiru ’diyi be.
5’Ba onduaruri ovu okpo be, ada, ’ba nita beri fe okponi i ereni;
6a’disiku mi nga omba ’ba dri ceza onduanirisi, azini ’ba e’yo amaza fepi ’diyi ka ovu o’biru, ’ba yi nga aga ra.
7Onduari uru tu, nde ’ba ondua kokoruri ra; ’ba nde zini i ma tile kalitilia ku.
8’Ba e’yo otupi onzi ’yezuri, yi nga runi ’da Aparaka’i.
9 #
E’do 6:5; Zab 119:113; Mat 9:4; ’Yeta 8:22; 2 Kor 10:5 ’Ba ondua kokoruri ma asisileri ezatani, azini ’ba ’ ngu ’ba ’ba edepi edematarasiri onzi.
10Icimakoru ka mi ’be o’du candinirisi, isu de mi okpo were.
11 #
Isa 58:6, 7; 1 Yoh 3:16 Mi ari ’ba yini jile dra vu ’diyi; azini mi opa ’ba opele ofule ra’diyi.
12 #
Yob 34:11; Yer 32:19; Rum 2:6; Eceza 2:23 Mi ka ’yo ra, Mi ndre, ama nini e’yo ’diri ku; ’ba ’ba ma asi o’bipiri egani, e’yo nde ku ya? ’Ba mi orindi ta mbapiri nini e’yo ’diri ku ya? Azini eri ngani ofe ’ba alu alu dri ’yeta yini vusi ku ya?
13Ma mvi, mi mbe anyuoso, erini ovule onyirurisi; anyuoso otipi anyusoro ma ruaari, erini ovule aluzaru mi tiliarisi.
14Mi ma ni onduari aluzaru mi dri ’dinile; mi ka eri isu ra, orodrini nga ovu indi, azini e’yo mini teleri ngani avi oye ku.
15Mi ’ba onzini, mi zi mi ’ba onyiruri ma aku mbazu ku; mi eza pari erini adrizuri ku;
16 #
Zab 34:19; Mik 7:8 a’disiku ’ba onyi beri e’de paleko aziri, te ti, eri enga dika; te ocokoni ’ba onzi ’diyi o’be va.
17Mi ma ovu ayikosi mi ari’boni e’dele varisi ku, te mi asi ma ovu ayikosi erini i ogule varisi ku;
18adra kazu engazu Yehova ma asia erini e’yo nderi ndreria ku, eri kazu ani i ma aoko kuzu ari’bo nderi ma ruaarisi ja ku.
19Mi asi ma oti ’ba e’yo onzi ’yepi ’diyisi ku, mi ’ba ma’yala ’ba onzi ’diyi ma e’yosi ku;
20 #
Zab 11:6; Isa 3:11 a’disiku ’ba onzini ngale orodri isule kurisi; yi nga ’ba onzi ’diyi ma tala inyu ra.
21 #
Rum 13:7; 1 Pet 2:17 Mva mani, mi ru Yehova pi opi be; mi eci ti ’ba lepi yi ojapi oja ’diyi be ku;
22candi yinirini ngale engale mbelerurisi, te a’di ni dri jata yi ma iritrorinini ya?
23 #
Azi 1:17; 2 Sur 19:7; O’be 18:5; Yoh 7:24 E’yo ’diyi yi vini e’yo ’yoza ’ba onduaru ’diyini. ’Ba opezu e’yo liza ma aliari ovuni onyiru ku.
24 #
Isa 5:23
’Ba ’yopi ’ba onziri ma tiari, Mi ’ba onyiruri; suru yi nga eri ’ da, suru ndu ndu ’diyi nga eri ngu onzi;
25te ’ba egapi ’ba onziri ma dria ’diyi dri ayikoni nga ovu indi, asi ndriza onyiruri nga eca yi I ma dria,
26’Bani e’yo omvizu kililiruri si ekile ’bani o’bolo ndruzurile.
27Mi ede azi mini ngonde amve raka, mi ’ya amvu mini oko; te vutinia mi si jo mini ndo.
28 #
Efe 4:25
Mi nze e’yo eti mi agyi ma ruaa e’yo kokoru ku; mi ici ’ba mi tilesi ku.
29 #
Mat 5:39
Mi ’yo, Ma nga eri ’ye ekile emi ’yele ma vurile; ma nga aroti ofe agu nde dri ’yeta erini vusi ma’idinini ku.
30Ma aga ovuou ma amvu tia, azini ’ba e’yo vaza kokoruri ma amvu zabibuniri ma tia indi;
31 #
Yer 4:3; Mat 13:7, 22; Ebra 6:8 te mi ndre, eri du dria ociru; mileni a’bu i dria avaefi dupi risi ci, kali oniru eri ma ageiari asu iva indi.
32Te di ma lu ra, ma ega e’yere; ma ndre ra, ma isu ani imbata ra:
33 #
O’be 6:10-11
O’du kozu were, o’du kozu kaukau were, dri ekilazu tualu o’du kozu were;
34te alio minini nga emu mi dria oguoule, afaako miniri ekile ’ba sei berile.
Bible in Lugbara © United Bible Societies, 1966.