E'yo O'beza 23
23
1Mi ka ri nyaka nya opi be mi ega afa ovupi mi drilia e’yere;
2te mi ma ’ba eli mi olikoa mi ka adri ovu anyamgboloru
3Mi ma ’ba li omutibi erinirisi ku, yini ovule nyaka lokirinirisi.
4 #
O’be 28:20; 3:5; Yoh 6:27; 1 Tim 6:9; Rum 12:16 Mi ecandi mi lonyi ndruzasi ku, ’ mi ku eri ondua minirisi ja.
5Mi ka mi mile su ruania, eri yo; a’disiku lonyi ede yi dri opile ada, ekile aji sapi ’buarile.
6 #
Zab 141:4; Azi 15:9; Mat 20:15; Mar 7:22 Mi nya ’ba endraruri ma enya: ku; mi ma ’ba li omutibi erinirisi ku;
7’ba nderi ovu ekile erini e’yo egale i ma asiarile: eri ’yo mini, Mi nya, mi mvu! te asi erini ovuni mi be ku.
8Mi nga nyaka te mini nyale ’diri ogbe ra, azini e’yo mini ’yole aluzaru ’diyi nga avi ra.
9 #
Mat 7:6
Mi ’yo e’yo azini ’ba ondua kokoruri ma bilia ku, erini ngale e’yo mini ’yole ’diyi ma ondua ’bale aparakarurisi.
10Mi oja lokiri angu awazu driori ma mile ku; mi fi ’ba ata kokoru ’diyi ma amvua ku;
11 #
Yob 31:21; Yer 50:34 ’ba yi onzepirini ovule okporurisi; eri nga yi aza ko e’yo lizasi mi ndezu.
12Mi ’ba mi asi imbata dria, mi co mi bile e’yo nitani ’diyi erizu’i.
13Mi ku imbata fekokoru mva dri ku; mi ka eri co kalisi ti, ngani dra ku.
14 #
1 Kor 5:5
Mi ka eri co kalisi, mi nga ani eri ma orindi pa Pari ’ba drazaniri dri ra.
15Mva mani, mi asi ka ovu! onduaru ka, ma asini nga ovu ani ayikosi, casi mani’i.
16Ada, ayikoni nga ga ma asia tre, mi tile ka nga e’yo kililiruri ’yo’iria,
17Mi asi ma ovu ma’yalasi ’ba e’yo onzi ’yepi ’diyisi ku, te mi ma ovu Yehovani ruzu etu dria.
18 #
Luk 16:25
A’disiku adaru orodrini nga ovu indi; e’yo mini teleri ngani avi oye ku.
19Mi eri, mva mani, mi ma ovui onduasi ani, azini mi ma ce mi asi ma dri geria.
20 #
Isa 5:22; Mat 24:49; Luk 21:34; Rum 13:13; Efe 5:18 Mi ma ovu ’ba adripi patiefi su mvupi tu ’diyi ma eselia ku, kani ’ba za nyapi ngururu ’diyi ma eselia ku indi;
21a’disiku ’ba atipi ewasiri pi ’ba nyaka nyapi anyamgbolosiri be yi nga ofu alioru, azini o’du koza ’daniri nga bongo irikoru fe su ’ba ruaa.
22 #
Efe 6:1
Mi eri ata mi tipiri ma e’yo, azini mi ngu mi andrini onzi eri ka ovu dezaruria ku.
23Mi je e’yo adari, mi fe eri ozizu ku; adani ondua, imbata pie, e’yo vaza be.
24’Ba onyi beri ma atini nga ovu ayikosi tu; ’ba mva onduaruri tipiri nga ovu ayikosi erisi.
25Mi fe mi ati pi ma ovu ayikosi mi andri be, mi fe oku mi osipiri ma ovu ayikosi,
26Mva mani, mi fe mi asi ma dri, mi fe mi mile ma ovu ayikosi geri mani ma alia.
27A’disiku oku saaruni ovu ’bile alirurisi; azini oku mile acirurini ovule ’bile iziqarurisi indi.
28Ada, eri ’ba mba ekile oguoule, eri fe ’ba lokiri be ’diyi ma ezu kakau ’ba eselia.
29 #
1 Opi 20:16; O’be 20:1; Isa 5:11; Nah 1:10; Mat 24:49, 50; Efe 5:18 A’dini awu wuni ya? A’dini ovu candi beni ya? A’dini ovu awata beni ya? A’dini agata beni ya? A’dini ovu ebi be ruaa e’yo kokoruni ya? A’di ma mile ekaruni ya?
30Yi ’ba o’api ewa mvuria sawa izu ’diyi; ’ba mupi patiefi su osazaru ndapi ’diyi.
31Mi lu patiefi su ku de eri ekaru, erini feria erejea ma aleni okazu i ma wurasi, erini siria e’yere varia.
32Te vutinia eri ’ba ga urile ndo, eri ’ba ga uriohulule.
33Mi mileni nga afa osutaru ’diyi ndre, mi asini nga e’yo ’yo ambosi.
34Adani, mi nga ovu ekile ’ba lapi va miri ma aliarile, kani ekile ’ba lapi pati izuru ma siarile.
35 #
O’be 27:22; Yer 5:3; Azi 29:19; Isa 56:12; 2 Pet 2:22 Mi nga ’yo, Gba ma ’bo, te suni ma ruaa ku; co ma ra, te ma etumuni azoni ku.
Bible in Lugbara © United Bible Societies, 1966.