E'yo O'beza 13
13
1 #
1 Sam 2:25; O’be 9:7, 8 Mva onduaruri ati ma imbata eri ra, te ’ba edematara beri erini e’yo ’bani egazu i ma driari ku.
2Aguni nga afa onyiruri nya efi ’yaza i ma tiliarisi, te orindi ’ba ’yepi lokirisi ’diyini nga egana ’ba ari adazuri nya’i.
3 #
Zab 39:1
’Ba i ma tile ma agei tepiri te ’ di idri ini ma agei ra; ’ba i ma tile zipi walaruri nga dri ja ra.
4Ovuou le afa ra, te ti, isuni ku, te ’ba azi ngapi asi driasiri ma orindini nga a’bu ra.
5 #
Kol 3:9; Rum 12:9 ’Ba onyiruri ngu inzo liza onzi, te ’ba onziri eri afa azavurule, eri nga drinza eji.
6 #
O’be 11:3
E’yo kililiruri ’ba ovupi e’yo kokoru geriari ma agei te, te e’yo onzini ’ba onziri ’be va.
7’Ba azini indi eri ’ba ima ngulupi afa e’irule, te ovuni afa be ku; ’ba azini indi ’ba i ma ngulupi aliole, te de lonyi erini
8Lonyi ’bani ovu idri ’ba nderini ma aroti, te ’ba alioru erini ’bani egazu i ma driari ku.
9Diza ’ba onyirurini di ayikosi, te ’ba nga ’ba onziri ma tala inyu ra.
10Afusi lu agata gaza efuni, te ondua ovu ’ba e’yo amaza eripi ’diyi vu.
11 #
O’be 20:21
Lonyi ’bani isule geri e’yo tokonisiri nga anu anu, te ’ba afa okupi azi inisiri ma afani nga ezu ezu.
12E’yo ’bani teleri ka i dri ici ici, eri fe ’ba asini ovuzu azoru, te e’yo ’bani leleri ka nga eca ra, eri pati idriniri.
13 #
2 Sur 36:16
’Ba e’yo ’yoleri ’bapi aparakaruri eji dri jata i ma ngulupi ma ruaa, te ’ba azita rupiri nga orodri isu ra.
14 #
O’be 16:22; 15:24; 2 Sam 22:6; Zab 116:3 ’Ba onduaruri ma azita eri yi a’di idriniri, o’ba kazu ’dezu emba drani ma alia ku beni.
15E’yo vaza onyiruri asi ndriza feni, te ’ba lokiri beri ma geri ovu otukuturu.
16 #
O’be 12:23
’Ba ’yepi egatasi ’diyi dria yi azi ’ye nitasi, te ’ba ondua kokoruri eri Eonduaako ere.
17Ojio onziri fe ’bani e’dezu e’yo onzi ma alia, te ojio adaruri rua ala ejini.
18 #
O’be 15:5
’Ba imbata gapi siri nga alio isu drinza be, te ’ba imbata ’bani egazu i ma driari eripiri nga ovu inzita be.
19E’yo ’bani asi ’bazu driniari ka i ’ye ’bo, eri aluzaru orindi ’bani dri; te e’yo onzi kuzu jari ovu ’ba ondua kokoru ’diyi dri e’yo yini ngule onziriru.
20Mi aci ’ba onduaru ’diyi be, mi nga di ovu onduaru beni, te ’ba ovupi ’ba ondua kokoru ’diyi be agyiruri nga candi isu.
21 #
Zab 32:10
E’yo onzini ’ba ezata ezapi ’diyi ma vuti droni, te yi nga e’yo onyiru omvi ’ba kililiru ’diyi dri awa’diforu.
22 #
Ekl 2:26
’Ba onyiruri nga awuruso ku anzi: ini ma anzipi dri, te yi mba ’ba onziri ma lonyi ma ta ’ba kililiruri dri.
23 #
O’be 12:11
Nyaka kakau ka amvu ’ba alio-: rurini ma alia, te afa azini ovu ezazaru ’bani e’yo lile kililiru kurisi.
24 #
O’be 19:18; 22:15 ’Ba i mvini kupi cokokoru kalisi jari ngu eri onzi, te ’ba i mvini lepi rari nga eri co imbatasi.
25’Ba onyiruri nga nyaka nya i ma aleni trazu, te ’ba onzi ’diyi ma aleni nga o’a abirisi.
Bible in Lugbara © United Bible Societies, 1966.