Yosua 23
23
E’yo Yosuani azile ’ba ma tiari
1 #
Yos 21:44; 22:4; 13:1 Eri nga eca ’dini o’du kakau ma vutia, Yehova ka Israeli anziyi dri ava liza fe ’bo, juru yini dria yi acepi ’diyi ma omba asuzu, de Yosua ovu di mbazauru eli be kakau, 2#Azi 31:28; Yos 24:1; 1 Sur 28:1’dini Yosua nga ’ba Israelini omve dria, ’ba deza piyi ’ba ’wara pie, ’ba e’yo lipi ’diyi pie, ’ba yi dri cepi ’diyi be, nga ’yo yi tia kini, Curu’do ma mbazauni, eli mani kakau; 3emi ndre e’yo dria Yehova Mungu eminini ’yele ’ba jururu dria ’diyi vu emi ma e’yosiri dria ra; a’disiku Yehova Mungu emini ’di ndra a’di emi drini. 4Emi lu, ma awa emini ’ba jururu acepi ’diyi ma angu odrisisi ’bo, ’ba jururu mani ndra dri jale ’bo ’diyi ma angu be, suru emini ma bi ani angu nde awuruso yiniru, engazu yi ara Yoridaniniasi cazu kpere miri amboru etuni ’derialeruri vu. 5#Efu 23:30; 33:2; 34:11; Azi 11:23; Kal 33:53Yehova Mung emini ma ngulupi nga yi omvu ofuzu emi drilia yi drozu emi miliarisi ra; emi ma nga angu yini ’du eminiru ani, Yehova Mungu eminirini ’yole emi tiarile. 6#Azi 5:32; 28:14E’yo ’disi emi ma ovu di ani asi agupirusi tu, emi ma mba e’yo ovupi sizaru buku azita Musaniri ma aliari ma ta dria yi ’yezu indi, emi kazu emi ojazu dri ejia kani dri ndia yi kuzu ku, 7#Efu 23:33; Azi 7:2, 3; O’be 4:14; Efe 5:11; Efu 23:13; Kal 32:38; Zab 16:4; Yer 5:7; Zef 1:5emi kazu fizu ’ba jururu acepi emi be ’diyi ma eselia ku, emi kazu adrou yini ma ru ajizu ku, emi so oyo adrou nde ’diyi ma rusi ku indi, kani azi ngazu yi dri ku, kani avuzu va yi ma drilia ku indi; 8#Azi 10:20; 11:22kiri emi ma ekpa emi Yehova Mungu eminiri be, emini ’yele kpere o’du andru ’dorisirile. 9#Yos 1:5Yehova odro suru ambo ambo okpo be ’diyi emi driliasi ’bo; te emiruni, ’ba aluani soni pa emi drilia ecazu kpere andru ku. 10#Azi 3:22; 32:30; Lip 3:31; 15:15; 2 Sam 23:8’Ba emini aluri nga ’ba yini alifu alu dro ra, Yehova Mungu eminirini a’di ’dile yi be eminirisi, ekile erini ’yole emi tiarile. 11E’yo ’disi emi te emi agei asi driasi tu, emi ma le Yehova Mungu eminiri avasi. 12#Ebra 10:38; 2 Pet 2:20Te emi ka nga mvi emi ecizu ’ba jururu ’diyi ma joloko be, ada ’ba acepi emi eselia ’diyi, emini oku jezu emi eselia yi be, emini ani fizu yi vu lazini yini efizu emi vu, 13#Lip 2:3; 1 Opi 11:4ka’dini emi ma ni di ani kini Yehova Mungu emini ngani ri juru ’diyi odro emi miliarisi ’dini ku; te yi lu nga ovu emba azini esese emi bizuriru, emi rua cozuriru, azini oci emi mile osozuriru, kpere emini dri jaria teketeke angu onyi be Yehova Mungu eminirini fele emi dri ’diriasi.
14 #
Ekl 12:3-7; Ebra 9:27; 11:13; Luk 21:33 Emi ma lu, curu’do ma’i ma mani mu geri ’ba dria ovupi nyakua ’diyini muzuria; te emi ni, asi emini driasi azini orindi emini driasi indi kini e’yo onyiru dria Yehova Mungu eminini ’yole emi e’yosi ’diyi ma eselia aluni eceni ku; ’ye yi emi dri dria dria ’bo, yi ma alua avini ku. 15#Azi 28:63; Lev 26:16; Azi 28:15, 16; Lip 3:8, 12; 4:1; Luk 21:22Te eri nga eca ’dini, e’yo onyiru dria Yehova Mungu eminirini ’yole emi tiari yini ecale emi ruaa trotrorile, ’dinile indi Yehovani nga e’yo onzi dria eji emi ruaa trotro, de nga eri jani emi dri angu onyi be Yehova Mungu eminirini ndra fele emi dri ’diriarisi ku. 16E’yo ’diyi nga yi ’ye ra, emi ka aziza Yehova Mungu eminirini ndra azile emi driri eza ra, emini ngaria muria azi ngazu adrou toko ’diyi dri, avuzu va yi drilia indi; etu ’dasi adra Yehovani nga ti ko ve emi ruaa, emi nga dri ja mbele mbele angu onyi be erini ndra fele emi dri ’diriasi.
Currently Selected:
Yosua 23: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
