Yosua 22
22
Pari edeta edezu Yoridani tiari
1Yosua omve ’ba Rubenini piyi ’ba Gadini pie, suru ali Manaseni be, 2#Kal 32:20-32; Yos 1:12-17; Azi 3:18nga ’yo yi tia, Emi ’ye e’yo Musa ati’bo Yehovanini azile emi tiari dria ’bo, emi eri vini o’duko mani e’yo dria mani azile emi tiari ’yezu indi; 3emi kuni emi adripi yi o’du kakau ’diyisi ku, ecazu kpere andru o’du ’doria, te emi ’ye azita Yehova Mungu eminini azile kini emi ma ’yeri ’bo. 4#Kal 32:33; Azi 29:8; Yos 13:8Te curu’do Yehova Mungu emini fe di emi adripi dri ava liza ’bo, erini ’yole yi tiarile; ka’dinile emi ma oja emi, emi ma mu hema eminia kpere angu emini ’dule eminiruria, Musa ati’bo Yehovanini fele emi dri Yoridani tia ’aa’dasiri. 5#Azi 6:6, 17; 11:22; 2 Opi 10:31; Zab 119:4; Mat 22:36; Rum 13:10; 1 Tim 1:5; Azi 10:12; Yos 23:11; Luk 11:42; Yoh 15:9, 10; 1 Yoh 5:3; 2 Yoh 1:6; Yud 1:21Emi ma mba lu emi ngulupi ma ta asi driasi, aziza azini azita Musa ati’bo Yehovanini azile emi tiari ’yezuni, Yehova Mungu emini lezu avasi, acizu geri erinia dria, azita erini ma ta mbazu, emini emi ekpazu eri be, ovuzu ati’ba erini azi ngazu eri dri asi emini driasi azini orindi emiru driasi indi. 6#E’do 47:7; Efu 39:43; Yos 14:13; 2 Sam 6:18; Luk 24:50’Dini Yosua nga di asi ndriza fe yi dri, nga vini geri fe yi dri mvizu; yi nga di geri bi muzu hema yinia. 7#Yos 17:5Isu de Musa fe ndra suru Manase ma ali azini dri awuruso Basania ’bo; te ali aziniri dri Yosua fe awuruso yiniri adripi yini ma eselia Yoridani ma tia ’aa’dosi etuni ’derialeru. Te Yosua ka geri fe yi dri mvizu hema yinia, eri fe asi ndriza yi dri indi, 8#Kal 31:27; 1 Sam 30:14eri ’yo yi tia kini, Emi ma mvi hema eminia lonyi be kakau, anyapa piyi kakau tu, dahabu pie, mele pie, mola pie, aya pie, bongo pie karakarau tu; emi ma awa lonyi emini opale juru emini driri emi adripi dri indi. 9#Kal 32:26, 29Vutinia ’ba Rubenini piyi ’ba Gadini pie, suru ali Manaseni be, yi nga mvi ibizu Israeli anziyi ma eselia Silo ovupi angu Kananini ma aliaria ’dalerisi, nga geri muzu Gileadiari bi, angu yini ’dule yiniru yi ma adri aleniari, aziza Yehovani azile Musa tiarisirile. 10Yini caria angu Yoridani ma kalati angu Kananiaria, Rubeni anziyi piyi Gadi anziyi pie, suru ali Manaseni ’diyi be, yi nga pari edeta edezu e’dapi endrepi reri si Yoridani tia. 11#Lev 17:8; Azi 13:12; Lip 20:12Anzi Israelini eri ani kini, Emi lu, Reubeni anziyi piyi Gadi anziyi pie, suru ali Manaseni ’diyi be si pari edeta edezuri angu Kananini ma drilia, angu Yoridani ma kalati woko Israeli anziyi vileria ’bo. 12#Lip 20:1’Dini Israeli anziyi ka e’yo ’diri eri ra, ’ba ongulumuru Israeli anziyini nga yi oku dria tualu Siloa, ma otu yi muzo a’di ’dizu yi be. 13#Azi 13:14; Lip 20:12; Efu 6:25; Kal 25:7Te anzi Israelini ’diyi nga ojiou ti pe Rubeni anziyi pi vu, Gadi anziyi pie, suru ali Manaseni be, angu Gileadinia; ’ba ti pele ’diyi Finehasi Eleazari ’ba edeta edepiri ma mvi pi, 14#Kal 1:4’ba ’wara mudri mupi eri be ’diyi pie, yi ’ba ambo suru yi ma atapini driliari, alu alu suru alu alu Israelini vusi; ’ba ’wara ’diyi alu alu ovu yi ma atapi ma suru dri cepiriru Israeli alifu alifu eselia. 15Yi nga ca Rubeni anziyi pi vu Gadi anziyi pie, suru ali Manaseni be angu Gileadinia, nga ’yo yi tia kini, 16#Azi 12:13-14; Lev 17:8, 9; 1 Sam 15:23’Ba ongulumuru Yehovaniri dria ’yo ’dini: Ezata ’diri emini ezale Mungu Israeliniri vuri, efini ngoni ya? emi mvi andru vile Yehova ma vuti bizu ku, pari edetani emini sizu’i ya? ovuni kini andru emi mbu Yehova ma ruaa amve ’dini ku ya? 17#Kal 25:1-9; Azi 4:3E’yo onzi amani ’yele e’yo Peorinisi ’dari funi dri ama dri ku ya? Ama’i kpere o’du ’diri andru ama ’bani nga ama alaru e’yo onzi ndesi ku, azo muani ka tro ovu ’ba ongulumuru Yehovani ’diyi ma ruaa e’yonisi ti. 18#E’do 18:23, 25; Kal 16:22; Yos 7:11, 12; 2 Sam 1:17; 1 Sur 21:1, 14Emi’i andru vini emi le asi vile Yehova ma vuti bizu kuru ’dini ya? Eri ngani eca ’dini ku ya, emi mbu emini Yehova ma ruaa amve andru ’di, te drusi eri nga ovu aokosi ’ba ongulumuru Israelini i ’diyi vu dria. 19#Lev 17:8, 9; Yos 18:1Emi ka angu emini ’duleri ndre ovuzu alaru ku, ’yeke, emi ezo emuzu angu ovupi awita Yehovanirurialeru, hema Yehovanini ovuzuria, emi ma ’du emini angu ama eselia beni; te emi ma mbu Yehova ma ruaa amve ’dini ku, ama’i alu vini emi ma mbu ama ruaa amve indi ’dini ku, emini vini pari edetani sizu emi dri pari Yehova Mungu amani edezuri ma paria. 20#Yos 7:1-26; 1 Sur 2:6, 7Akani Zera mvi eza ndra afa trile tririsi, adra efuni ndra ’ba ongulumu Israelini dria ma dria ku ya? Agu nderi jani dri a’dulesi ku erini ezale ’disi.
21 #
O’be 15:1; 18:3 Rubeni anziyi pi Gadi anziyi pie, azini suru ali Manaseniri be, nga di e’yo omvi ’ba ’wara ’ba Israelini alifu alifu ma drilia ’diyi tia, 22#Efu 15:11; Azi 10:17; Zab 82:1; Dan 2:47; Eceza 19:16; 1 Opi 8:39; Yob 10:7; Zab 44:21; Yer 12:3; Yoh 2:25; 21:17; 2 Kor 11:11, 31; Ebra 4:13; Eceza 2:23Yehova Mungu, Mungu dria ma driliari’i! Yehova Mungu, Mungu dria ma driliari’i! Eri ni ra, azini Israelini nga ni indi! Ka amani mbuzu amve Yehova ma ruaa’i, kani amani Yehova ezazu’i, ’dinile ma pa ama andru ku, 23#Azi 18:19; 1 Sam 20:16; Zab 7:3, 5; 10:13, 14ama ka pari edeta edezuri si ama dri amani ama ojazu vile Yehova ma vuti bikokoru; kani amani ti pi vezu drinia, edeta anyafurasi ’diyi pi, kani ama ma ede edeta asi anzuruni ’diyi, ’dini Yehova ma ngulupi ma ofe di e’yo ndeni. 24Te ama sini ’diri lu e’yo ’diri ma urisi ku ya? amani ’yoria kini, O’du ecapirisi anzi emini kani yi nga ’yo anzi amani ma tia kini, E’yo emini Yehova Mungu Israeliniri beri ngoni ya? 25A’disiku Yehova co ama esele emi be yi ara Yoridaninisi, emi Rubeni anziyi, Gadi anziyi ’diyi la; esele emini Yehova ma alia aluani yo. ’Dinile anzi emini yi te nga fe anzi amani ma ku Yehovani ruzu ja. 26Ka’dinile ama ’yo ra, Ama ma ede ama asi pari edetani sizu ama dri, te ma ovu afa edetaru evezu ku, kani edeta edezu ’dini ku, 27#E’do 31:48; Yos 24:27; 1 Sam 7:12; Azi 12:5-27te lu ma ovu afa e’yo eti nzezuriru ama dri emi be, a’bianzi amani ngapi ovupi vile ama vutia ’diyi dri a’bianzi emini be, ama ma inzi Yehovani edeta amani vele eri ma milia ’diyi pisi, edeta amani edele ’diyi pie, edeta asi anzuruni ’diyi be; anzi emini ma ’yo anzi amani ma tia o’du vilerisi, Esele emini Yehova vuri aluani yo, ’dini ku. 28E’yo ’dirisi ama ’yo ani, Ka nga ovu ewu vilerisi, yi ka nga ’yo ama tia, kani a’bianzi amani ma tia e’yo ekile ’dini ’diyile, ama nga ’yo yi tia, Emi ma lu pari edetani Yehovaniri ma wura vu, ama a’bipini edeleri, te afa edetaru evezu ku, kani edeta edezu ’dini ku, te eri afa e’yo eti nzezuriru amani emi be. 29#Azi 12:13, 14Mungu ma oga ama mbuzu amve Yehova ma ruaasi fo! amani ama ojazu andru vile Yehova ma vuti bikokoru; Mungu ma oga ama pari edetani sizu ama dri afa edetaru piyi evezu edeta anyafurasiri pie, edeta azini ’diyi pie, pari edetani ovupi Yehova Mungu amani ma hema driliari ma aziru ’dinirisi! 30Finehasi ’ba edeta edepiri, ’ba ’wara ongulumuruni ’diyi be, ovupi ’ba Israelini alifu alifu ’diyi ma drileru ovupi eri be ’diyi, yini e’yo Rubeni anziyi pini ’yole Gadi anziyi be, azini Manase anziyi beri eriria, e’yo nde nga ayiko fe yi dri tu. 31#Efu 25:8; 29:45; Lev 26:11, 12; 1 Opi 26:13; 2 Sur 15:2; Zek 8:23; 1 Kor 14:25; Eceza 21:3Ani Finehasi ’ba edeta edepi Eleazari mvi nga di ’yo Rubeni anziyi pi tia Gadi anziyi pie, Manase anziyi pie kini, Ama ni di bani andru ’di, kini Yehova eri ama eselia indi, emini ezata ’diri ezale Yehova vu geri ’dirisi kurisi; geri ’dirisi emi opa Israeli anziyi, Yehova ma dri ma ri yi ma dria ku beni. 32Vilerisi Finehasi Eleazari mvi ’ba edeta edepiri pi ’ba ’wara ’diyi be tualu, mvi angu Gileadiasi Rubeni anziyi pi vusi Gadi anziyi pie, Manase anziyi be, yi ca angu Kanania Israeli anziyi vu, e’yo ’diyi omvizu yi dri. 33#1 Sur 29:30; Neh 8:6; Dan 2:19; Luk 2:28E’yo ’di nga ayiko fe Israeli anziyi dri, ka’dinile Israeli anziyi nga Mungu inzi, yi ’yoni vini e’yo azini kini yi ma tu uru omba ’bazu yi be, angu nde Rubeni anziyi pini ovuzu Gadi anziyi beri ezazu, ’dini ku. 34#Yos 24:27Rubeni anziyi pi Gadi anziyi be yi nga pari edetani nderi ma ru ’da Edi’i; yini ’yole kini, Eri e’yo eti nzezuriru ama eselia kini, Yehova eri Mungu’i-risi.
Currently Selected:
Yosua 22: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
