'Ba E'yo Lipi 'Diyini 5
5
Ongo Debora pini Baraki beri
1’Dinile Debora nga di ongo ngo Baraki Abinoamu mvi be o’du ’dasi kini:
2’Ba ’ba dri cepi ’diyini ’ba dri cele Israeliarisi,
’bani yi ma ngulupi fele cenirisi, emi ma inzi Yehova.
3Emi eri, emi opi la;
emi co bile, emi opianzi la;
ma’i, adani ma’i, ma nga ongo ngo Yehova dri,
ma nga inzita ngo Yehova Mungu Israeliniri dri.
4 #
Azi 33:2; Zab 68:7, 8; Hab 3:3-6; Isa 64:3 Yehova la, mini efuria Seiriasi,
mini aciria engazu nyamuko Edomuni ma aliasi,
nyaku oya ra, ’bu oti alu ra, ada iriti fe yi otini.
5 #
Efu 19:18; Azi 4:11 Oni piyi aka, rava Yehova ma milia,
ada Sinai nde ’daleri aka ra Yehova Mungu Israelinirini ovule indirisi.
6 #
Lip 3:31; Lev 26:22; Isa 33:8; Imv 1:4; 4:18 Ewu Samigari Anatimvini ma alia,
ewu Yaelini ma alia, gboko ’diyi ndra pirini,
te ’ba acipi ’diyi aci geri izia ’diyisi.
7 #
Lip 4:4-6; Isa 49:23 ’Ba ’ba dri cepi ’diyi asi Israelia ra,
yi asi ra kpere ma’i Debora, mani engaria,
de nga ma engani andriru angu Israeliniria ku.
8 #
Azi 32:16; Lip 2:12; 1 Sam 13:19, 22; Lip 4:3 Yi ope adrou o’diru ’diyi’i;
a’di ’diza ovu ndra ani kalitilea ogogo.
Gombere kani aju pi ’ba ndre ndra ’ba alifu kali su ma eselia angu Israeliniria ra ya?
9Ma asi ovu ’ba Israeli ma dri cepi ’diyi vu ayikosi yini yi ngulupi fele ceni ’ba nde ma eseliarisi.
Emi ma inzi Yehova.
10 #
Lip 12:14
Emi olu e’yoni, emi’i ’ba nzupi akanya emverusi ’diyi la,
emi ’ba ripi birisi ndrizaru ma dria ’diyi la,
emi acipi geria ’diyi la indi.
11Yi nga ’yeta kililiru Yehovani ’diyi ma e’yo olu dika dika pari yikiyi ’ba ’ye gbipi osusi ’di yini zoleri be reria,
pari ’bani yi kozuria indi,
ada yi nga ’yeta kililiru erini ’yele erini angu nyaria Israelia ’diyi ma e’yo olu’i.
O’du ’dasi ’ba Yehovani si di andra kalitilea.
12Mi oro, mi oro, Debora la!
Mi ore, mi oro, mi ngo ongo Mi nga,
Baraki, mi ce ’ba ndra mi ’bapi aruru ’diyi ma dri aruru, Abinoamu mvi la!
13’Ba opiru ’diyi ma joloko nga di esi va, ’ba nde maazi ’diyi be;
Yehova esi ma dri va ’ba okporu ’diyi ma ruaa ra.
14 #
Lip 3:27; 4:5, 6; Kal 32:39; E’do 49:21 Engazu Efiraimu ma alia yi esi va,
’ba yi ma olani ovuzu Amaleki ma alia ’diyi;
yi esi mi vutia, Benyamini la, ’ba mini ma eselia;
engazu Makiri ma alia ’ba ’ba dri cepi ’diyi esini,
te engazu Zebuluni ma alia ’ba lote ambo ’ba driliariniri be ’diyi esini.
15Te opianzi Isakarini ’diyi ovu Debora be;
ekile Isakarini ovulerile, ’dini Barakini ndra ’dini alu indi;
yi nzu e’bua eri ma palaa.
Pari yi raza Rubenini ma tia yi ede yi asi azi okporu ngazu.
16 #
Kal 32:1
Mi ri ndra lico kabiloni ’diyi ma eselia a’disi ya,
mini lezu ejeleko kabilo o’biru omvezuri ma wuta erizu?
Yi raza Rubenini ma tia ’daa asi ndaza amboru tu,
17 #
Yos 13:25; 19:29 Gileadi te ndra Yoridania ’aa’dasi;
azini Dani awi ndra oguru alia a’disi ya?
Aseri ri pari alua miri ma kutia, eri te yi oji erini ’diyi ma alia.
18 #
Lip 4:10
Zebulunini ndra ’ba idri yini adipi dra dri ’diyi;
Nafutali ’ye ’dinile indi angu ngurua ’diyi ma alia.
19 #
Lip 4:16; Zab 44:12 Opi yi emu ra, yi ’di a’di;
opi Kanania ’diyi ’di a’di ra angu Taanakia yi Megidoari ageia ogogo;
yi pani silingi yi ma orodriru aluni ku,
20 #
Yos 10:11; Lip 4:15 Yi ’di a’di engazu ’bua, ’bi’bio acita yini ma alia ’diyi ’di di a’di Sisera be.
21 #
Lip 4:7
Yi raza Kisonini wu yi amve, yi nde ovupi drio,
yi raza Kisoniniri’i. Ori mani la, mi aci drile okpo be!
22Akanya ma pa ma didi we ra ombuta ma e’yosi,
ombuta ’ba okporu yini ’diyinisi.
23 #
Lip 21:9; Neh 3:5; 1 Sam 17:47 Emi tri Merozini, malaika Yehovani ’yo ra,
emi tri ’ba ovupi eri ma alia ’diyi trita asi okarurisi,
a’disiku yi emuni Yehova ma aza kozu ku,
Yehova ma aza kozu ’ba okporu ’diyi vu.
24 #
O’be 31:31; Luk 1:28 Yaelini nga ovu drilebaru oku azini ma drilia,
eri Heberi ’ba Kenini vile okuri’i;
eri nga ovu drilebaru oku hema alia ’diyi ma drilia.
25Eri a’i yi, eri fe eri dri lesu’i;
eri eji eri dri lesu kuza saani opiniri ma alia.
26Eri eju i ma dri alo bizu,
eju i ma dri ndiri opana ’ba azi ngapirini bizu indi;
opana ndesi eri di Siserani, eri so eri ma dri lekeke;
ada eri so eri ra, eri di eri ayako erinia.
27Eri avu eri ma palaa, eri e’de ra, eri la ra;
eri ma palaa eri avu ra, eri e’de ra;
pari erini avuria, ’daa eri e’de va, dra ra.
28Eri olu angu derisasi, eri oyu uru,
Sisera ma andri oyu derisa ma talasini:
Gari ombani erini ’diyi emuni mbele ku a’disi ya?
Gari ombani erini ’diyi ma pa omberu ’diyi yi dri ici ’dani a’disi ya?
29Oku erini onduaru ’diyi omvi e’yo tinia,
ada eri omvi arotini i ma ngulupisi ceni,
30 #
Efu 15:9
Yi isuni afa ku ya?
Yi awani afa yini opale okposi ’diyi ku ya?
- zamva alu, kani ezoanzi iri ’ba alu alusi;
Sisera ma afa opaza eri bongo wura be ndu nduri’i,
bongo wura be ndu ndu sole dria ndrizaruri,
wura ndu ndu sole bongo ma woko iri dria, afa opaza nde ma ombeleari ya?
31 #
Zab 48:4, 5; 58:11; Eceza 6:10; 18:20; 2 Sam 23:4; Zab 37:6; Mat 13:43; Zab 19:5 Mi ku ari’ba mini dria ma ja dri ’dinile,
Yehova la!
Te ’ba eri lepi ra ’diyi ma ovu ekile etuni efule okpo ini berile.
Angu li di ava eli kali su.
Currently Selected:
'Ba E'yo Lipi 'Diyini 5: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.