'Ba E'yo Lipi 'Diyini 6
6
Gideonini omvezuri
1 #
Lev 26:14; Lip 2:19; E’do 25:2; Kal 25:17; Hab 3:7 Te anzi Israelini ’ye e’yo ovupi onzi Yehova ma miliari; Yehova fe yi ’ba Midianini ma dria eli aziri. 2#1 Sam 13:6; Ebra 11:38’Ba Midianini ma dri aga Israeli ra; ’ba Midianini ma e’yosi anzi Israelini ede yi dri oni gule ovupi oni ruaa uru ’diyi pi, oni oji pie, pari ’ okporu pie. 3#E’do 29:1; Lip 7:12; 8:10; 1 Opi 4:30; Yob 1:3Te eri ovu ’dini, Israeli ka ori ri ’bo, ’ba Midianini piyi, ’ba Amalekini pie, anzi kala etuni efurialeruria ’diyi pie, yi etu yi vu a’di ’dizu; 4#Lev 26:16; Azi 28:30; Yob 31:7, 8; Yer 5:17; 12:12, 13; Mik 6:15yi nga emu hema aso a’di ’dizu yi be, nga efi kaza amvuari eza dria ra, kpere mini emuria Gazaa, yi kuni afa nyaza aluni Israelia ku, kuni kabiloni, kani ranyani, kuni akanyani aluni ku indi. 5Yi etu anyapa yini pie, hema yini pie, yi efi angu ndea ongulumuru ekile ombile, yi’i ngamia yini pie kalafe lakokoru; yi emu angu nderia drini jazu. 6#Zab 50:15; 78:34; Hos 5:15Israeli ovu ’bazaru ele va ’ba Midianini ma e’yosi; anzi Israelini nga wu ani Yehova vu.
7Te eri nga eca ’dini, anzi Israelini ka wu Yehova vu Midiani ma e’yosi ’bo, 8’dini Yehova epe di nabi alu ma ti anzi Israelini vu; eri ’yo yi ma tia kini, Yehova Mungu Israeliniri ’yo ’dini: Ma eji emi uru engazu Misiriasi ra, ma ofu emi jo ati’boniri ma aliasi ra; 9ma pa emi ’ba Misiria ’diyi ma driarisi, azini ’ba dria emi inzapi ’diyi ma driarisi indi, ma dro yi amve emi ma miliarisi, ma fe emi dri angu yini ra; 10#2 Opi 17:35; Yer 10:2te ma ’yo emi tia, Ma Yehova Mungu emini; emi ma ru adrou ’ba Amorini, emini ovuzu yi vile angua ’diyini ku. Te emi erini ma o’duko ku. 11#Yos 17:2; Lip 8:2Malaika Yehovani nga emu ri kumara pati Ofiraa, Yoasi ’ba Abiezerini vileri ma etia; isu de eri ma mvi Gideonini anya coria pari patisu nzizuria, eri ma zi eri ’ba Midianini kazu isuzu ku. 12#E’do 16:7-13; Lip 13:3; Luk 1:11, 28Malaika Yehovani nga i e’da eri vu, ’yo tinia, Yehova ovu mi be, mi ’ba okporu asi teza beri. 13#Zab 89:49; Isa 59:1; 2 Sur 15:2Gideoni nga di ’yo tinia, Opi mani la, Yehova ka di adri ama be ci, afa ’diyi dria ’ye yi ama ruaa ’dini a’disi ya? Azi erini dria osutaru ndra ama a’bipini olule ama tia ’diyi ngoa ya, ’yozu kini, Yehova ejini ndra ama engazu Misiriasi ku ya? Te curu’do Yehova ’be ama amve ’bo, fe ama ’ba Midianini ma dria ’bo. 14#1 Sam 12:11; Ebra 11:32; Yos 1:9Yehova lu eri ra, ’yo ra kini, Mi mu okpo mini ’disi, mi opa Israeli ’ba Midianini ma dria; ma peni mi ti ma’i ku ya? 15#1 Sam 9:21Te eri ’yo tinia, Opi la, ma nga Israeli opa a’di afasi ya? Mi lu, ori’ba ma vile ’diyi alio emve ndrindriru Manase ma alia, azini ma ovu ’ba werearu tu ori’ba ma ati vile ’diyi ma alia, 16#Efu 3:12; Yos 1:5Yehova nga di ’yo tinia, Ma nga ovu mi be ada ada, mi nga ’ba Midianini ’diyi ofu ekile yi ’ba alule. 17#Efu 4:1Te eri ’yo tinia, Ma ka curu’do ’yeta anzutiri isu mi ma milia ’bo, mi ma ece di ma dri eceta, ecezu kini ’ba e’yo ’yopi ma beri eri mi’i. 18#E’do 18:3Mi nga ’diarisi ku, ma zi mi tia, de nga ma emuni mi vu afa feza mani ejizu ’bazu mi milia ku. Eri ’yo ra, Ma nga te kpere mini emuria ma vu dika.
19Gideoni nga fi ndrimva ede ngonde, ede anyafura abaka alu mikateru akufi kokoru indi; eri ’ba zani afazu alia, osu a’isuni otekua alia, ji yi eri dri kumara pati etia, fe ra. 20#Lip 13:19; 1 Opi 18:33Malaika Yehovani nga ’yo tinia,Mi ’du za pi mikate akufi kokoru ’diyi be, mi o’ba yi kata ’diri ma dria, mi osu a’isu indio Eri ’ye ’dinile ra. 21#Lev 9:24; 2 Sur 7:1Malaika Yehovani nga di kali i ma driari ma eti eju za pi elozu mikate akufi kokoru ’diyi be; aci nga ani efu kata nde ma alia, eri eve za pi mikate akufi kokoru ’diyi be dria ra; malaika Yehovani nga di afi eri ma miliarisi ra. 22#E’do 16:13; 32:30; Efu 33:20; Lip 13:22Te Gideoni nga di ndre eri ovu malaika Yehovaniri; Gideoni nga ’yo ani, Eyawaye, Opi Yehova la! a’disiku amani ama mile ndrele malaika Yehovaniri berisi. 23#Dan 10:19; Luk 24:36Yehova nga di ’yo tinia, Asi anzuru mi vu; mi ru ku, mi ingani dra ku. 24#E’do 22:14; Efu 17:15; Yer 33:16; Eze 48:35; Lip 8:32Gideoni nga di pari edeta edezuri si Yehova dri ’daa, ’da runi, Yehova-salomu’i. Eri nga kiri Ofira ’ba Ahiezeriniria kpere o’du andru ’disi.
25 #
Efu 34:13; Azi 7:5; Lip 3:7 Eri nga eca ini nde ’da ma vusi ’dini, Yehova ’yo eri ma tia kini, Mi ’du monio mi atini, ada monio iriri ovupi eli be aziriri, mi ogu pari edeta edezu Baali dri mi atini ovuzu eri beri va, mi ga Asera ageiniari va indi; 26mi si pari edeta edezuri Yehova Mungu mini dri pari okporu nde ’diri ma dria, mi ede eri geri kililirurisi; mi ’du monio iriri, mi ede edeta vezaru eja Aserani mini ngale gale varisi. 27#Yoh 3:1Gideoni nga di ’ba o’du mudri ati’ba erini ma eselia, eri ’ye ekile Yehovani ’yole eri ima tia ’borile; te eri nga eca ’dini, erini ’ba i ati ma joa ’diyi pi rulerisi ’ba aku amboru ndea ’diyi pie, eri econi ndra ani ’yezaru etusi ku, te eri ’ye eri inisi. 28’Ba aku amboru ndea ’diyi ka enga o’bitisi drio ’bo, mi lu, onyo pari edeta edezu Baali driri va, ga Asera ageiniari va, ede monio iriri edetaru pari edeta edezu ’bani sileri ma dria. 29Yi nga e’yo ozi yi eselia, A’di ’ye di ’dinini ya? Yi ka e’yoni nda, ka e’yoni zi ’boria, yi ’yo ra, Gideoni Yoasi mvi ’ye e’yo ’dirini. 30#Yoh 16:2; ’Yeta 26:9’Ba aku ndea ’diyi nga di ’yo Yoasi ma tia kini, Mi eji mi mvini amve, eri ma dra ra, a’disiku erini pari edeta edezu Baali driri onyolerisi, azini erini Asera ageiniari gale varisi. 31Te Yoasi nga di ’yo ’ba dria engapi ombaru eri ma ruaa diyi ma tia, Emi nga matu ’ba Baalisi ya? Kani emi nga eri pa ra ya? ’Ba matu ’bapi erisiri ma ovu fuzaru de nga etu efuni o’biti ’dosi ku. Eri ka ovu munguruni, eri ma ’ba matu i ma ngulupisini, ’ba azinini pari erini edeta edezuri onyole ’borisi. 32E’yo ’disi o’du ’dasi yi omve di runi Yerubaali’i, kini, Baali ma ’ba matu eri ma ruaani, erini pari erini edeta edezuri onyole varisi.
33 #
Yos 17:16; 19:18; 1 Opi 18:45; 21:23 ’Dini ’ba Midianini dria, ’ba Amalekini pie, anzi kala etuni efurialeruria ’diyi pie dria, nga di yi oku tualu, yi zo mu hema yini asozu e’bu Yezireeliniria. 34#Lip 3:10; 11:29; 13:25; 14:6, 19; 1 Sur 12:18; 2 Sur 24:20; 1 Kor 12:8-11; Kal 10:3; Lip 3:27Te Orindi Yehovani esi Gideoni ma dria; eri nga guka vu ra, ’ba Abiezerini oku yi tualu eri ma vutia ani. 35Eri nga di ’ba ti pe angu Manaseni ma eselia dria; yi oku vini alu yi eri ma vutia indi. Nga ’ba ti pe Aseri pi vu, Zebuluni pie, Nafutali pie; yi etu emu dri fuzu yi be.
36Gideoni nga di ’yo Mungu tia, Mi ka nga ’ba Israelini opa dri manisi ra ekile mini ’yolerile, 37#Efu 4:3-7; Azi 32:2; Zab 72:6; Hos 6:3, 4; 14:5mi lu, ma nga kabilo enyi ’ba pari anya cozuri ma dria; andrali ka nga ovu enyi ma dria a’dule, angu ka nga ovu a’wiru dria, ma nga di ni kini mi nga ’ba Israelini opa dri manisi ra, ekile mini ’yole ’borile. 38Eri ovu ’dini; te eri enga drusi ’dini o’biti drio drio, eri nzi enyiriko nde ra, eri nzi andrali enyiriko nde ma ruaari ecia tre. 39#E’do 18:32Gideoni ’yo Mungu tia, Adra mini ma ko ti ma ruaa ku, ma nga te e’yo ’yo mi be pale alu ’di; ma zi mi tia, mi fe ma ma ama e’yo dika pale alu a’dule enyiriko ’disi; mi fe curu’do eri ma ovu a’wiru enyiriko ma dria a’dule, te nyaku dria andrali ma ovuni. 40Mungu ’ye ’dini ini nde ’darisi; eri ovu lu a’wiru enyi ma dria a’dule, te nyaku dria andrali indi.
Currently Selected:
'Ba E'yo Lipi 'Diyini 6: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
