'Ba E'yo Lipi 'Diyini 4
4
Debora pini Baraki be Siserani agazu ombasiri
1 #
Lip 2:19
Te anzi Israelini ’ye vini e’yo onzi Yehova ma milia dika, Ehudini drazu ’boria. 2#Yos 11:1; 1 Sam 12:9; Zab 83:9Yehova nga di yi fe jezu Yabini opi Kananini angu nyapi Hazoriari dri; ’ba asikari ongulumuru erini ma dri cepiri ndra Sisera, ovupi ndra angu Haroseti ’ba Juruniari’i. 3#Yos 17:19; Lip 1:19; 5:8; Azi 28:29-48; Zab 106:42Anzi Israelini wu Yehova vu ani; erini ovule gari ombani ayaru ’diyi be turu oromirisi, eri inza anzi Israelini okposi eli kali iri.
4 #
2 Opi 22:14; 1 Kor 1:27 Te nabi Debora Lapidoti vile okururi eri li ’ba Israelini ma e’yo ewu’dasini. 5#E’do 35:8Eri ovu ndra itu pati Deborani Rama pi ma eselia Beteli be, angu oni ruaa Efiraimuniriari ma etia; azini anzi Israelini yi adri etu eri vu e’yo lizasi ’daa. 6#Ebra 11:32; Yos 19:37Eri pe ’ba ti Baraki Abinoamu mvini omvezu angu Kadesi-nafutalinia, ’yo tinia kini, Yehova Mungu Israeliniri azini mi ku ya, kini, Mi mu, mi si oni Tabori vu ogogo, mi’i ’ba alifu mudri mi be engapi anzi Nafutalini pi ma eselia anzi Zebulunini be ’diyi. 7#Efu 14:4; Yos 11:20; Eze 38:10-16; Yoe 3:11-14; Lip 5:21; 1 Opi 18:40; Zab 83:9Te ma nga Sisera ’ba asikari ongulumuru Yabinini ma dri cepiri osi mi vu ogogo yi raza Kisoni ma tia, eri’i gari ombani erini pie, ’ba ongulumuru erini pie; ma nga eri fe mi dria. 8Baraki nga di ’yo eri ma tia, Mi ka nga mu ma be ra, ma nga mu ra; te mi ka nga mu ma be ku, ma ngani mu ku. 9#Lip 2:14; 3:8; Zab 44:12; Isa 50:1Eri ’yo ra, Ma nga mu mi be ecekokoru; te ti, aci mini muzuri ngani diza eji mi dri ku, Yehovani ngale Siserani fele jele oku ma dria rarisi. Debora nga di enga ra, mu Baraki be Kadesia. 10#Lip 5:18; Efu 11:8; 1 Opi 20:10Baraki nga Zebuluni pi omve Nafutali be tualu Kadesia ra; ’ba tupi eri vutisi ’diyi yi ’ba alifu mudri; Debora tu uru eri be indi.
11 #
Lip 1:16; Efu 3:1; 18:1; Kal 10:29; 24:21 Isu de Heberi ’ba Kenini co i ma esele ’ba Kenini ma azi ’diyi be, anzi Hobabu Musa ma otini ’diyi, aso ndra hema erini kpere kumara pati Zaananimuari ma tia, Kadesi be ogogo. 12Te yi olu Sisera ma tia kini Baraki Abinoamu ma mvi tu uru oni Taboria ’bo; 13Sisera nga di i ma gari ombani ’diyi oku dria, adani yi gari ombani ayaru turu oromi ’diyi, ’ba dria ovupi eri be ’diyi pie, engazu Haroseti ’ba Juruniria cazu kpere yi raza Kisonia, 14#Azi 9:3; 2 Sam 5:24; Zab 68:7; 77:17, 18; Isa 52:12; Mik 2:13Debora ’yo Baraki ma tia, Mi enga! Te o’du andru ’dori eri o’du Yehovani Siserani fezu mi dria ’bori’i. Yehova funi mi drilia oko ku ya? ’Dini Baraki esi engazu oni Tabori ma driarisi, eri’i ’ba alifu mudri be eri ma vutia. 15#Zab 83:9, 10; Yos 10:10Azini Yehova fe Sisera pi e’de ra, gari ombani erini pie, ’ba ongulumuru erini pie, sei ma sia Baraki ma drilia; Sisera nga di esi gari erini ombaniri ma driarisi va, eri apa pasi apa apa. 16Te Baraki dro gari ombani ’diyi ma vuti ’ba ongulumuru ’diyi pie kpere Haroseti angu ’ba Juruniria, ’ba ongulumuru Siserani ’diyi yi o’de dria sei ma sia; ’ba aluni aceni ku. 17#Yob 12:21, 24; 40:11, 12; Zab 18:14; 107:40; O’be 29:23; Amo 5:19Te Sisera apa pasi hema Yaeli Heberi ’ba Kenini vile okurini vu; asi anzuruni ovule Yabini opi Hazoriari pi ma eselia Heberi ’ba Kenini ma ori’ba be cirisi. 18Yaeli fu mu dri fu Sisera be, ’yo tinia, Mi oja mi, opi mani la, mi oja mi ma vu; mi ru ku. Te eri oja i, fi eri vu hema alia ra, azini eri a’bu eri parisi ci. 19#Lip 5:25Te eri ’yo tinia, Ma zi mi tia, mi ebe mani yi werearu mvuzaru fo; yi avijo fu ma ra. Te eri zi cupa lesuni ma tile, eri fe eri dri mvuzu, eli a’bu eri dika ci. 20Eri ’yo oku nde ma tia, Mi so pa hema ma tilia ci; eri nga ovu ’dini, ’ba azini ka emu mi zizu ’yozu kini, ’Ba azini ’dia ci ya? te mi ma nga ’yo, Yo. 21#Lip 5:26Yaeli Heberi vile okuri nga di hema ma alo ’du, oparja be i ma dria indi, eri mu eri vu e’yere, di alo nderi ayako erini ma alia, alo nde so eri ekeke ega kpere nyakua; o’duni eri ’bele diirisi. ’Dini idri erini fu ra, dra ra. 22Te mi lu, Barakini Siserani droria, Yaeli efu emu dri fu eri be, ’yo tinia, Mi emu, ma nga mi dri ’ba mini ndaleri ece ra. Eri mu di eri vu ani; te mi lu, Sisera la de drazaru, azini alo heani ayakoa ci.
23 #
1 Sur 22:18; Neh 9:24; Zab 18:47 ’Dini Mungu aga di o’du ’dasi Yabini opi Kananiari anzi Israelini ma milia ra. 24Anzi Israelini ma dri aga di dika dika Yabini opi Kananiari ma ruaa, kpere yini Yabini opi Kanania ’diri ma dri jaria.
Currently Selected:
'Ba E'yo Lipi 'Diyini 4: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.