'Ba E'yo Lipi 'Diyini 3
3
Suru kule Israelini o’bizu ’diyi
1 #
E’do 22:1; Azi 8:2, 16; 13:3; Yoh 2:24; 1 Kor 11:19 Te suru Yehovani kule, Israelini amazu geri yinisi ’diyi yi ’di; ku ndra yi ’ba a’di ’diza ndra Kananiari nipi ku ’diyi amazu; 2pe lu a’bianzi anzi Israeliniri ma ni, ma imba yi a’di ’diza ma e’yosi, ma imba ’ba e’yo ’diri nipi oku ku ’diyi ani. 3#Yos 13:3Suru nde ’diyi yi ’di: opi towi Filisitiaa ’diyi pi, ’ba dria Kananini pie, ’ba Zidonia ’diyi pie, ’ba Hivini ovupi oni Lebanoni ma ruaa, engazu oni Baali-herimonia cazu kpere pari ’bani fizu Hamatiaria ’diyi pie dria. 4Yi ovu ’daa bani Israelini amaze, nizu kani yi nga azita Yehovani, erini ndra azile a’bipi yini dri Musa ma driasi ’diyi eri ra yani. 5#Zab 106:35’Dini anzi Israelini ovu ’ba Kananini piyi ma eselia, ’ba Hitini pie, ’ba Amorini pie, ’ba Perizini pie, ’ba Hivini pie, ’ba Yebusini pie; 6#Efu 34:16; Azi 7:3; Ezr 9:11o’du ezopi yini yi ma okuru, ofe ezoanzi yi ma ngulupini agianzi yini dri; nga azi adrou yini ’diyi dri indi.
Otinielini Israelini pazu Kusani-risataimu driri
7 #
Lip 2:11; Efu 34:13; Azi 16:21; Lip 6:25 Anzi Israelini yi ’ye e’yo ovupi Yehova ma milia onziri, yi dri avi Yehova Mungu yiniri ma e’yo ra, yi nga azi adrou Baaliru ’diyi pi dri, Aserotiru ’diyi be. 8#Hab 3:7E’yo ’disi adra Yehovani ko di ti Israeli ma ruaa ani, eri fe yi je Kusani-risataimu opi Mesopotamiaari dri; yi nga azi Kusani-risataimu dri eli aro. 9#Lip 6:7; 10:10; 1 Sam 12:10; Neh 9:27; Zab 22:5; 106:44; Lip 2:13, 16Te anzi Israelini ka wu Yehova vu ra, Yehova fe ’ba ’ba papiri enga anzi Israelini dri yi opazu, eri Otinieli, Kalebu ma adripi eri vutia Kenazi’iri ma mvi’i. 10#Kal 11:17; 27:18; 1 Sam 10:6; 11:6; 16:13; 2 Sur 15:1; Ebra 6:4Orindi Yehovani esi drinia, eri li ’ba Israelini ma e’yoni; eri fu mu a’di ’dizu, te Yehova fe Kusani-risataimu opi Mesopotamiaari eri ma dria; azini eri dri aga Kusani-risataimuni ra. 11Angu nde li di ava eli kali su Otinieli Kenazi mvi nga di dra ra, Ehudini Israelini pazu Moabu driri 12#Lip 2:19; Yer 16:12; Hos 6:4; Mat 23:32; 1 Sam 12:9Anzi Israelini nga vini e’yo onzi ’ye Yehova ma milia dika; Yehova nga di okpo fe Egiloni opi Moabuari dri a’di ’dizu Israeli be, a’disiku yini e’yo ovupi onzi Yehova ma miliari ’yele ’borisi. 13#Lip 5:14; Azi 34:3; Lip 1:16Eri nga Amoni anzipi piyi oku Ameleki anzipi be i vu, eri mu anzi Israelini ofuzu; yi pa aku itu pati beri ra. 14#Lev 26:23-25; Azi 28:40Anzi Israelini nga di azi nga Egiloni opi Moabuari dri eli mudri drini aro.
15 #
Zab 50:15; 78:34; Yer 29:12, 13; Dan 9:3; Lip 20:16 Te anzi Israelini ka owu Yehova vu ra, Yehova fe ’ba yi papirini engazu, Ehudi Gera mvi ’ba Benyaminini’i, ’ba ovupi dri eji beri. Anzi Israelini pe eri ti afa feza jizu Egiloni opi Moabuari dri. 16Ehudi nderi ede i dri sei si be irile irile, oco be wuale alu; eri ombe eri i ma o’du dri ndiaria. 17Eri fe di afa feza Egiloni opi Moabuari dri. Te Egilonini ’ba a’bupi turi. 18Eri ka afa feza fe de ’bo, eri pe ’ba te afa feza nde ejipi ’diyi ma ti amve ra. 19#Yos 4:20Te eri ma ngulupi atri dri dika, engazu pari ’bani oni gazu Giligaliarisi, eri kini, Ma ovu e’yo azini be ’yozu mi tia oyokolosi, opi la. Eri ’yo ra, Mi adri ciri. Te ’ba dria pa sopi ageinia ’diyi fu amve ani. 20Te Ehudi emu di eri vu; isu de eri ri eri ma ngulupi a’dule, jo erini ’a’azu elisiria. Ehudi ’yo eri tia, Ma ovu e’yo engapi Mungu vuri be mi dri. Eri nga enga pari erini rizuriarisi ani. 21Te Ehudi nga i ma dri ejiri su, sei ini enzezu i ma o’du dri ndiarisi, so eri ma ale ani; 22sei nderi ma si fi abe be dria, oso a’bu sei ma si ci, erini sei nderi enzele eri ma alia amve kurisi; te eri ega kpere amve ngukualeru. 23Ehudi nga di fu jobileko etiarisi, opi jo nde ’a’azuri ma ti tilenia ci, eci yi ci. 24Te eri ka fu amve ’bo, ati’ba erini ’diyi emu, yi ndre ra, te mi lu, jo ’a’azuri ma tile ovu ecizaru ci, yi ’yo ra, Ndi eri i ma aza ko jo erini ’a’azu elisiri ma alia. 25Yi ’a’a ’dani kpere drinzani yi biria; te mi lu, eri zini jo erini ’a’azuri ma tile ku; e’yo ’disi yi ’du fungua, yi ozi jotile nde, te mi lu, opi yini e’de va drazaru nyakua ’bo.
26Te Ehudi apa de yini opi teria, eri aga pari ’bani oni gazuri ma ageia ’dasi, eri apa Seiraa. 27#Lip 5:14; 6:34; 1 Sam 13:3; Yos 17:15; Lip 7:24; 17:1Eri nga eca ’dini, eri ka emu ra, eri vu guka angu oniru Efiraimuniria; anzi Israelini riga si va eri be engazu angu oni driariasi, eri yi ma drilia. 28#Lip 7:9, 15; 1 Sam 17:47; Yos 2:7; Lip 12:5Eri ’yo yi ma tia, Emi bi ma vuti; Yehovani ari’ba emini ’ba Moabuni ’diyi fele emi dria ’borisi. Yi si di va eri ma vutia ani, opa kiji Yoridanini zozu Moabu vualeru ’diyi ra, yi a’ini ’ba aluni ma zo ’aa’dasi ku. 29Yi ofu ’ba Moabuni ’diyi ewu ’dasi ekile ’ba alifu mudrile, ’ba dria okporu ’diyi pi ’ba dria asi teza be ’diyi pie; ’ba aluni apani ku. 30’Dini o’du ’dasi Moabu ovu ndezaru va Israeli ma palaa, Angu li di ava eli kali aro.
Samigarini Israelini pazu ’ba Filisitiaa ’diyi driri
31 #
1 Sam 17:47, 50; Lip 2:16 ’Ba eri ma vutiari ndra Samigari Anati mvi’i, eri ’ba ’ba Filisitiaa ’diyi ma azi ofupi turu azia kali akararu ranya drozurisiri’i; eri opa vini Israelini ra.
Currently Selected:
'Ba E'yo Lipi 'Diyini 3: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
