Isaya 35
35
Diza amboru Zionini ngale isule ndori
1Angu didi pi nga ovu ayikosi angu asokoruri be, angu roko driari nga ovu ayikosi, eri nga fu zo ojole;
2eri nga fu zo tu, eri nga ovu ayikosi ayiko pisi ongo ngoza be.
Ba nga diza Lebanonini fe drinia, afa onyiru tu Karimeli pini Saroni be. Yi nga diza
Yehovani ndre, afa onyiru tu Mungu amanirini.
3 #
Yob 4:3-4; Ebra 12:12 Emi ’ba ’ba dri okpo kokoru ’diyi ma dri okporu, emi fe okpo ’ba kumuti be okpo kokoru ’diyi dri.
4Emi ’yo ’ba asi be rururu ’diyi ma tia, Emi ovu di okporu, emi ru ku; Emi ndre, Mungu eminiri nga emu arioti ofe avu ofeza Munguni lilerisi.
Eri nga emu emi pa ra.
5 #
Isa 29:18; Yoh 9:6; Mat 9:27; 11:5; Mar 7:32; Luk 7:22 Etu ’dasi ’ba mile odraza ’diyi ma mile yi nga yi ozi mgboru, ’ba bile dirinyaru ’diyi ma bile yi nga yi ozi mgboru;
6 #
Luk 7:22; Yoh 5:8; ’Yeta 3:2; Mat 9:32; Yoh 7:38 etu ’dasi ’ba pa acozaru ’diyi uga ombu nyajole, ’ba ti be ndindiruri ma andreni nga ongo ngo.
A’disiku yini nga ega angu didia, yi raza yi nga ega angu roko driaria indi;
7cinya dripi aciruri nga i oja pari yini tizuriro, angu a’wiruni nga i oja pari yi a’diniriro indi; pari obalakoni ovuzu yini lazu aleniari nga ovu aseru, omi pi ase izuru be.
8 #
Yoe 3:17; Eceza 21:27 Te gboko amboru nga ovu ’dale, eri geri ’bani ngale runi ’dale Geri alataniri; ’ba ondiru ’diyi ngani aga aleniasi ku, te eri nga ovu ’ba ’dayi dri; ’ba acipi geria ’diyi, ka tro ovu ondua kokoru ti, ngani aba alenia ku.
9 #
Lev 26:6; Isa 11:9 Kami ngani ovu ’dale ku, nguru azini ngani tu alenia ku; ’ba ngani yi isu ’dale ku, te ’ba onzele ’bo ’diyi nga aci aleniani.
10 #
Isa 51:11; 25:8; Efe 1:7; Eceza 7:17; Yoh 16:22 Te ’ba Yehovani onzele ’diyi nga emvi ra, nga emu Zionia ongo ngoza be, ayiko ’dani ’daniri nga ovu yi ma dria; yi nga ayiko isu nyona be, te candi pi otaza be nga apa ziri.
Bible in Lugbara © United Bible Societies, 1966.