Isaya 34
34
Adra Yehovani ’bale suru ndu ndu ’diyi vuri
1Emi esi ogogo, emi suru ndu ndu, e’yo erizu, emi co bile, emi ’ba suruni ’diyi la!
Nyaku ma eri e’yoni, afa gapi alenia tre ’diyi pie dria; angu wudrikuru azini afa efupi eri ma alia ’diyi be dria.
2Aokoni Yehovani nyale suru ndu ndu ’diyi dria vurisi, azini eri ma adrani vele ’ba yini o’biru dria ma driarisi, eri ja yi dri teketeke, fe yi ’ba ’ba fupi ’diyi dri ’bo.
3Yi nga ’ba yini ’bani ofule ’diyi o’be amve, avu yini ma amakani nga tu ra; oni amboru nga aka yiru ari yinisi.
4 #
Zab 102:26; Eze 32:7; Yoe 2:31; 2 Pet 3:10; Mat 24:29; Mar 13:25; Luk 21:26; Eceza 6:13-14 Ongulumu ’bua ’diyi dria nga afi ra, ’buni nga i tra ’bani enyiriko tralerile,
Ongulumu yini dria nga onyu ra, ekile bini onyule zabibu pati ma ruaarile, ekile elio bi onyupi onyu elio ma siarile.
5 #
Mal 1:4; Isa 63:1-6; Yer 49:7-22; Eze 25:12-14; 35:1-15; Amo 1:11-12 Sei mani erini afa mvule fudri ’bua ’borisi; mi ndre, eri nga esi va Edomu ma dria, azini suru mani trile ’diyi ma dria, yi ma e’yo lizu.
6 #
Isa 63:1; Zef 1:7 Sei Yehovani ga tre arisi, eri a’bu a’bu ososi, kabilo piyi ma ari ndri berisi, oso kabiloago ma orofinirisi indi.
A’disiku Yehova ovu edeta edeza be Boziraa, azini anyapa oliza be amboruri angu Edomunia.
7Azini odru asea ’diyi nga esi va yi be tualu, tiagoa ’diyi monio amboru ’diyi be. Acini nga ati angu yinia, irifura yinini nga anzu ososi.
8A’disiku eri ovu o’du Yehovani arioti ofezuri, eli afa ofezuri agata gaza Zionini ma e’yosi,
9Te yi raza erini nga yi oja odu iniru, irifura erinini nga i oja barutiro, azini angu erini nga efu odu iniru vepi acisiriru.
10 #
Eceza 14:11; 19:3 ’Ba ngani di eri inyu ku etusi dria; acika erini nga nga ’dani. Eri nga ovu ezazaru toko a’bianzi vu a’bianzi vu; ’ba azini ngani aga eri ma alia ’dani ku.
11Te kapia yi nga angu nde nya ozuku be, emaa pi nga adri alenia koreke pieni. Eri nga baka dri jataniri aja eri ma dria, baka jo o’bizu e’yo tokonisiri be.
12Azini yi nga ’ba ’wara erini omve fizu angu nde opini nyaleri ma alia, te ’ba ngani ovu ’dale ku, opianzi erini indi yi dria nga ovu toko,
13 #
Isa 32:13; Hos 9:6 Ocini nga enga jo erini opiniri ma alia, aukau pi nga enga jo erini okporu ’diyi ma alia ocakai be.
Eri nga ovu pari obalakoni ovuzu aleniariru, akuma aria okondoru ’diyini pa tuzu driniari’i.
14Anyapa angu roko dria ’diyi yi nga dri fu obau be, ndri aseari nga agyini omve ’daa; ada, aria wupi inisiri nga ri ’dale, nga i ma pari ava lizuri isu ’dale.
15Elipiuini nga jorovu si ’dale gbe tizu, eri nga anzi erini oga ra, eri nga anzi nde ori eri ma endria; ada, yuku pi nga yi oku ’dale, yi dria alu alu ago pi aroni be.
16 #
Zab 56:8; Dan 7:10; Mal 3:16 Emi nda e’yo buku Yehovani ma aliariari: Afa ’dinile ’diyi ngani avi aluni ku; afa aroni dria alu alu ’diyi ngani ovu ago kokoru ku.
A’disiku tile Yehovani azi e’yo ’dirini ra, azini Orindi erini oku yi ’bo.
17 #
Zab 78:55; O’be 16:33 Te eri ’be odrisi yi dri, dri erini awa angu nde ma esele yi dri bakasi ’be; yi nga ani angu nde nya ’dani ’dani, yi nga adri alenia a’bianzi vusi a’bianzi vusi ra.
Bible in Lugbara © United Bible Societies, 1966.