'Ba Ebraniani 9

1Te aziza okori ovu azita be azi inzitaniri azizu, azini eri ovu pari alatararu; nyaku ’doriari be. 2#Efu 26:1-30; 25:23-40A’disiku yi ede bere okori, alenia tala pati indi, mesa pie, mikate ecetaruri pie; omve eri Pari Alatararuri’i. 3#Efu 26:31-33Te bongo jo ale iriri alizuri ma alialeru, bere omvele Pari Alatararu Agapi Turi indi; 4#Efu 16:33; 25:10-16, 21; 30:1-6; Kal 17:8-10, 25; Azi 10:3-5eri ma alia pari meleru obiese vezuri pi indi, sanduku azizani ruani a’bule melesi ciri be, sanduku nde ma alia imvu meleru ovupi mana beri pi indi kali Aronini bi idipiri pie, oni ’bararu azizani ’diyi pie; 5#Efu 25:18-22; 26:34azini eri ma drilia uruleru kerubi dizani indi, endri fezu oguna yikiniri ma dria. Te afa ’diyi ma e’yo ama econi ’yozaru curu’do alu alu ku. 6#Kal 18:2-6Afa ’diyi ovu edezaru ’dinile ’bo, atalau edeta edepi ’diyi adri fi bere okori ma alia o’du dria, azi inzitani ’yezu; 7#Lev 16:2-34; Efu 30:10te bere iriri ma alia kiri atalau edeta edepi agapi rari fi, pale alu eli vusini, fini vini ari kokoru ku, te eri adri ari fe edetaru i ma ngulupisi azini ezata ’ba driani ma e’yosi indi. 8#Ebra 10:19Orindi Alatararurini e’yo ’diri eceria ’dini, kini geri fizu pari alatararu ma aliari ovuni nga ecezaru ku, de bere okorini nga pa soria ’dani 9#Ebra 10:1, 2(’di ovu ecetaru ewu curu’dorisi). Bere ’diri ma alia yi adri afa feza piyi fe edeta be, te edeta ’diyi econi ’ba Mungu inzipiri ma asisile i ma e’yo onzi nizuri ’bazaru dri fuzu ci ku, 10#Lev 11:2; 15:18; Kal 19:13a’disiku azita ’diyi ovu azizaru e’yo ruanisi a’dule, nyaka pi ma e’yo azizu, afa mvuza pie, ojiza ndu ndu ’diyi pie, ovupi azizaru de nga yi edeni e’yo o’diru ku’diyi.

11 # Ebra 6:20; 10:1 Te Kristo ecea ’bo, eri atalau edeta edepi agapi ra e’yo onyiru ngapi ecapi ’diyiniri, eri fi pale alu iriti Pari Alatararuri ma alia, agazu bere ovupi amboru azini dri fupi ci agapi tu, ’bani edele drisi kuri ma aliasi (efini, ovuni bere nyaku ’doriari ku) 12eri fini ndri ma arisi ku, kani koanzi ma arisi ku, te i ma ngulupi ma arisi, erini onzeza ’ba otruzu kpere ’dani ’dani isuria ’boo 13#Lev 16:3, 15-16; Kal 19:9, 17-19Te ndri pi ma ari monio be, azini of uta tikarini cole ’ba alatara kokoru di yi ma ruaari ka eco yi ’bazaru alaru ondi ruanisi, 14#1 Pet 1:18, 19; 1 Yoh 1:7; Eceza 1:5; 1 Kor 15:45; Ebra 6:1ka’dini Kristo i ma ngulupi fepi edetaru ezata kokoru Mungu dri Orindi ’dani ’danirisiri ma arini nga asisile emini e’yo onzi nizuri ’ba alaru, emini azi dratani kuzu azi inzitani ngazu Mungu idriruri dri aga ra ku ya?

15 # Ebra 12:24; 1 Tim 2:5 E’yo ’dirisi eri ovu ’ba ’ba ecipi Mungu be e’yo aziza o’dirurisiri, te ’ba aluni drale e’yo onzi ovupi ’yezaru aziza okori ma palaa ’diyi ma arioti ofezurisi, ’ba ovupi omvezaru ’diyi ma isu aziza awita ’dani ’danirini. 16Te aziza afa awazuri ka ovu indi, ma ni ’ba afa azipiri ma drata oko. 17A’disiku aziza afa awazuri ovu okpo be kiri ’ba nderini drale ’borisi, te eri ovu okpo kokoru de nga ’ba eri azipirini ovuria idriru. 18E’yo ’dirisi e’yo aziza okori indi ovuni e’dozaru ari kokoru ku. 19#Efu 24:6-8; Lev 14:4; Kal 19:6’Dini Musa ka de azita dria oluzu ’ba dria ma tia ekile azitani ’yolerile ’bo, eri ’du koanzi ma ari, ndri ma ari pie, kabilo ’biko ekaruri pie, ediko bi pie, eri oya eri ani buku nde ma dria azini ’ba nde ma dria dria, 20#Mat 26:28kini, ’Di ovu ari e’yo aziza Munguni azile emi vurini. 21#Lev 8:15, 19’Dinile eri oya ari bere pi ma dria, afazu dria azi inzitani ngazu ’diyi be. 22#Lev 17:11; Efe 1:7Azini ekile azitani ’yolerile, ecea ogogo afa dria ovu ’bazaru alaru arisi, azini ari raza kokoru wutani yo.

E’yo onzi tuuzu edeta Kristonisiri

23 # Ebra 8:5 E’yo ’dirisi le eceta afa ’bua ’diyini ma ovu ’bazaru alaru edeta ’diyisi, te le afa ’bua ’diyi ma ngulupi ma ovu ’bazaru alaru edeta afa ’diyi agapi ra ’diyisi. 24#Ebra 11:12; 1 Yoh 2:1A’disiku Kristo fini pari alatararu edele drisi ovupi ecetaru pari adaruri ecezuria ku, te eri fi ’bu adaria, i e’dazu curu’do Mungu ma milia amasi. 25Fini i ma ngulupi fezu edetaru pale kakau, ekile atalau edeta edepi agapi rarini file Pari Alatararuri ma alia eli vusi eli vusi, ari ovupi eriniru kuri berile ku; 26#1 Kor 10:11; Gal 4:4ka ndra ovu ’dini, te’do isu leri ovu eceandizaru pale kakau engazu ewu nyaku eti ’bazuria. Te curu’do eri e’da di i ’bo pale alu ewuni asizuria, e’vo onzi wuzu erini i ma ngulupi fe edetaru’irisi. 27#E’do 3:19Azini ekile erini ovule ’bazaru ’ba dri drazu pale alu, vurinia fizu e’yo liza ma aliarile, 28#Isa 53:12; Fil 3:20; Ebra 10:10; 12:14; 2 Tim 4:8; 1 Pet 2:24dinile Kristo indi, ovuPi fezaru edetaru pale alu ’ba kakau ma e’yo onzi ’duze, nga i e’da pale liririsi, ezata kokoru, pata ejizu ’ba eri ma dri tepi ’divi dri.

Currently Selected:

'Ba Ebraniani 9: LB66

Highlight

Copy

Compare