'Ba Ebraniani 8

’Ba ’ba ecipi Mungu be aziza o’dirusiri

1 # Zab 110:1; Ebra 4:14 ’Dini e’yo amani ’yoleri ma dri ambori ’di’i: ama ovu atalau edeta edepi agapi rari be ’dinile, ripi va oguna Diza Ndrizarurini ma dri ndiria ’bua, 2ovupi atalau pari alatararuri pi ma azi ngapi, bere adaru Opini asoleni, ’bani asoleni kuri beri. 3Yi ’ba atalau edeta edepi agapi rari dria alu alu afa feza piyi fezu edeta be; e’yo ’dirisi le atalau ’diri indi ma ovu afa erini ngale feleri be. 4Eri ka te ovu nyakua, ngani te ovu atalau edeta edepiriru ku, a’disiku ’ba afa feza fepi kile azitani ’yolerile ’diyi yi indi. 5#Efu 25:40; Kol 2:17’Ba ’diyi yi eceta azini endrilendri pari ’buariniri ma azi nga; ekile Munguni Musani imbalerile, Musani ’yeria bere ederia ’dini, eri ’yo kini, Mi ndre onyiru mi ma ede afa dria ekile eceta ecele mi dri oni ma driarile. 6#Ebra 7:22; 12:24; 2 Kor 3:6Te curu’do Kristo isu azi onyiru agapi rari ’bo, erini ovule ’ba ’ba ecipi Mungu be e’yo eciza onyiru agapi ra, azile aziza agapi ra ’diyi berisirisi. 7’Dini aziza okori ka ovu ezata kokoru, yi ngani ndra pari azini ndru aziza iriri ofizu ku

8 # Yer 31:31-34; Ebra 10:16, 17 Te erini egaria yi ma dria, eri ’yo ra kini: Emi ne, o’duni emu ra, Opi ’yo ra, o’du nde ’diyisi ma nga aziza o’diru ’ba ori’ba Israelini pi dri ori’ba Yudani be;

9 # Efu 19:5, 6 ekile ndra mani azile yi ma a’bipi tia o’du mani yi ma dri bizu yi dri cezu yi ofuzu angu Misiriarisi ’dinile ku; te yi ovuni aziza mani ma alia ’dani ku, azini ma egani e’yo yini ku, Opi ’yo ra.

10Te aziza mani ngale azile ori’ba sraelini be o’du ’dayi ma vutiari eri ’di’i, Opi ’yo ra: Ma nga azita mani ’ba asisile yini ma alia, ma nga yi si yi ma asia; ma nga ovu Mungu yini, yi nga ovu ’ba mani.

11Yi alu alu ngani ’ba eri vile akuari imba ku, yi alu alu ngani vini adripi yini imba ku, kini, Mi ma ni Opini; a’disiku yi driani ngale ma nile rarisi, engazu ’ba were turi vu cazu ’ba yini ’wara agapiri vu.

12A’disiku mani ngale yiki ’bale e’yo onzi yinisirisi, te ma ngani yi ma ezata ega dika ku. 13#Rum 10:4Erini ’yoria, Aziza o’diru, ’dinile, eri ’ba aziza okori okuru ’bo. Te afa i ojapi okuru azini ecapi dezaruri, ace were eri nga avi ra.

Currently Selected:

'Ba Ebraniani 8: LB66

Highlight

Copy

Compare