E’doza 33

Yakobo pini yi lezu i adripi be dikari

1 # E’do 32:6 Yakobo enga i mile uru, nga lu ra, te mi ndre, Esauni emu, ’ba turu su be. Eri nga anzi awa ani Lea pi vu, Rakeli pie, ezoanzi ati’boru iri ’diyi be. 2Eri nga ezoanzi ati’boru ’diyi o’ba drilealeru anzi yini be, vutinia Lea pi anzi erini be, vilerisi Rakeli pi Yusufu be. 3#E’do 18:2; 42:6Eri ma ngulupi nga mu aga yi drilialeru, nga avu va nyakua paleko aziri, de nga cani i adripi vu ogogo ku.

4 # E’do 32:28; O’be 16:1; 21:1; Yer 10:23 Te Esau nga nzu dri fuzu eri be, nga eri o’de, nga eri ma ombeti ekila avasi, nga eri ma o’bolo ndru ra, yi nga wu mindresi ani. 5#E’do 48:9; Zab 127:3; Isa 8:18Eri nga i ma mile enga uru, nga oku piyi ndre anzi be; eri nga ’yo ra, ’Ba m, be ’diyi a’di piyi ya? Eri nga ’yo rai Yi anzi Munguni fele ati’bo mini dri ’yeta anzutiri erinisi ’diyi. 6Ezoanzi ati’baru nga di eca ogogo, yi’i anzipi be, nga avu kpere va; 7Lea nga vini esi ogogo anzi erini be, nga avu va; vutinia Yusufu pi nga esi ogogo Rakeli be, nga avu va ra. 8#E’do 32:5, 16Eri nga ’yo ra, Anyapa ongulumuru kakau mani te dri fuzu yi be ’diyi, mi pe yi ma ti ’dini a’disi ya? Eri nga di ’yo ra, Mani asi ndriza isuzu opi mani vu beni. 9Esau nga ’yo ra, Afa mani yi fu dri ma dri ra, ma adri la; afa mini ovuzu yi be ’diyi ma ovu o mini. 10#E’do 43:3; 2 Sam 3:13; 14:24-32; Mat 18:10Te Yakobo nga ’yo ra, ’Dini ku, ma zi mi tia, ma ka asi ndriza isu mi vu ’bo, mi a’i di afa feza mani fele ’diri fo! mani mi mile ndrele ekile ’bani Mungu ma mile ndrelerilerisi, azini vini mini ovule ayikosi masirisi. 11#Lip 1:15; 1 Sam 25:27; 2 Opi 5:15; Fil 4:18; 2 Opi 5:23Mi ma a’i, ma zi mi tia, mi a a’i afa feza mani ejile mi vuri fo, Munguni ’yele ma be ’yeta anzutirisirisi, azini afa mani yi fu dri ra. Eri nga eri omi okposi, eri nga a’i beni.

12Esau nga ’yo ra, Ama ma e’do aci amani, ama mu, ma nga dri ce mi drilia. 13Eri nga ’yo eri tia, Opi mani ni ra anzi yi odekuaru azini kabilo piyi ti pie mani ovuzu yi be ’diyi nga vini anzi endru; ka yi dro okposi o’du alu a’dule, yi nga odra dria. 14#E’do 32:3Ma zi mi tia, opi mani ma aga ati’bo ini ma drilia; ma’i ma nga yi dri ce e’yere e’yere, anyapa ovupi ma drilia ’diyini acilerile, anzini! acilerile, de nga ma cani opi mani vu oni Seiria ku.

15 # Rut 2:13 Esau nga ’yo ra, Mi fe ma ku ’ba ovupi ma be ’diyi ma azini tezu mi be ’de fo! Te eri ’yo ra, ’Dini a’disi ya? Mi fe ma ma isu asi ndriza opi mani vu fo! 16’Dini Esau nga mvi o’du ’darisi muzu i ma gerisi kpere Seiria. 17#Yos 13:27; Lip 8:5Yakobo nga ini mu kpere Sukotia, nga i dri jo si ’dale, nga lico ’be i ma anyapa dri; ’da ani pari nde ma ru Sukoti’i.

18 # Yoh 3:23; ’Yeta 7:16; Yos 24:1 Yakobo nga emu asi anzurusi aku Sekemuni ovupi angu Kananiaria, erini engaria Padani-aramuaria; nga hema aso aku nde ma drilialeru. 19#Yos 24:32; Yoh 4:5; ’Yeta 7:16Eri nga angu nde erini hema asozuri je Hamori Sekemu ma ati ma anzipi vu silingi turu alusi. 20#E’do 35:7Eri si pari edeta edezuri ’dale, nga runi ’da Eli-Elohe-Israeli’i.

Currently Selected:

E’doza 33: LB66

Highlight

Compare

Copy