Efuza 7

1 # Efu 4:16; Yer 1:10 Te Yehova ’yo Musa tia, Mi ne, ma ’ba mi,Mungule Farau dri; te Aroni mi adrini nga ovu nabi mini. 2Mi nga e’yo dria mani azile mi tiari ’yo; azini Aroni mi adrini nga ’yo Farau tia eri ma ku anzi Israelini ma fu angu eriniasi ra. 3#’Yeta 7:36; Efu 4:7; 11:9Te ma nga asi Farauni ’ba mbazaru, ma nga fe eceta mani ezu kakau tali osutaru mani ’diyi be angu Misirinia. 4#Efu 6:6; 10:1Te Farau ngani e’yo mini eri ku; ma nga dri mani ’ba angu Misirini dria, ma nga ’ba ongulumu mani suru Israeliniriru ’diyi ofu angu Misirini aliasi e’yo liza, amboru ’diyisi. 5#Efu 8:22; 14:4, 18; Zab 9:16; 59:13; Efu 3:20Ma ka dri mani eju angu Misirini dria, anzi Israelini ofuzu ’ba Misirini ma eseliasi ra, yi nga ni ma ovu Yehova’i. 6Musa pi Aroni be yi ’ye ’dini; ekile Yehovani azile yi tiarile, yi ’ye ’dini ra. 7#Azi 29:5; 31:2; 34:7; ’Yeta 7:23, 30Ewu yini e’yo ’yozu Farau driliarisi, eli Musani ba de kali aro, azini Aronini ca de kali aro drini na.

Kali Aronini

8Yehova ’yo Musa pi ma tia Aroni be kini, 9#Isa 7:11; Yoh 2:18; 6:30; Efu 4:2, 17Farau ka nga ’yo emi tia ’yozu kini, Emi eca tali emini osutaruri; mi nga di ’yo Aroni tia kini, Mi ’du kali mini, mi ’be eri va Farau drilia, ’dini eri ma oja i uriru ani. 10#Efu 4:3Te Musa pi Aroni be yi nga fi Farau vu, yi ’ye ’dini ekile Yehovani azile yi tiarile; te Aroni nga kali erini ’be Farau drilia ati’ba erini drilia indi, eri nga i oja uriru ani. 11#E’do 41:8; Dan 2:2; 2 Tim 3:8; Efu 7:22; 8:7, 18; 2 Kor 11:13; 2 Tes 2:9, 11; 2 Tim 3:13; 2 Pet 2:13; Eceza 12:9; 13:14’Di ma vutia Farau nga ’ba onduaru ’diyi omve ’ba ojeru, ’diyi be; ’ba nde, ’ba ojouru Misiria ’diyi nga ’ye ’dini indi ondua yini olenirisi. 12Te ’ba ’diyi dria alu alu nga kali yini o’be va, kali nde nga yi oja uriru indio Te kali Aroniniri nga kali yini oki dria. 13#Efu 4:21Te asi Farauni ovu mbazaru ’dani, eri erini e’yo yini ku; ekile Yehovani ’yolerile.

Dra maturu arisiri

14 # Efu 8:15; 10:20, 27 Yehova nga ’yo Musa tia, Asi Farauni ovu okporu, eri oga ’bani mukokoru si. 15#Efu 4:2, 3Mi mu Farau vu dru o’bitisi, mi ne, eri fu muzu yia; mi nga pa so yi tia dri fuzu eri be, te mi ’du kali teka i ojapi uriruri mi dria. 16#Efu 3:12, 18; 5:1, 3Mi nga ’yo eri tia, Yehova Mungu ’ba Ebraniani epe ma ti mi vu, kini, Mi ku suru mani ma mu ’dini yi ma nga azi ma dri angu roko driaria ani; te mi ne, kpere andru mi erini nga kiri ku. 17#Eceza 16:4, 6; Zab 9:16; Eze 20:48; 25:17; Yoe 3:17; Efu 4:9Yehova ’yo ’dini kini, E’yo ’diri ma alia mi nga ni ma ovu Yehova’i; mi ne, ma nga kali ma driarisi yi ara amboruri co, yi nderi nga i oja ariru. 18#Efu 7:24E’bi yi ara nde alia ’diyi nga odra ra, yini nga ngu ngu; ’ba Misiria ’diyi nga yi ara nderi ngu onzi mvuzaru. 19#Efu 8:5; 9:22; 10:12Te Yehova ’yo Musa tia, Mi ’yo Aroni tia kini, Mi ’du kali mini, mi eju mi dri yi Misirini dria, yi ara ma dria, yi nyiri ’diyi pie, yi atipi ati ’diyi pie, yi yi olipi nyiri nyiri ’diyi be, ’dini yi ma oja i ariru ani; te arini nga ovu angu Misirini dria ma alia, afazu wariru ’diyi ma alia, azini oni edele tijoru ’diyi ma alia dria.

20 # Efu 17:5; Zab 78:44; 105:29 Te Musa pi Aroni be yi ’ye ’dini ekile Yehovani azilerile; eri enga kali nderi uru, eri co yi yi ara ndeni Farau ma milia, ati’ba erini milia indi, yi dria ovupi yi ara aliari nga i oja ariru. 21E’bi yi ara nde ma alia ’diyi nga odra ra; yi ara nderi ngu ngu, ’dini ’ba Misiria ’diyi econi yi yi ara ndeni mvuzaru ku; te ari nderi ovu angu Misirini ma alia dria. 22Te ’ba ojouru Misiria ’diyi yi ’ye ’dini ondua yini olenirisi indi, te Farau ma asi mba ’dani, eri erini e’yo yini ku; ekile Yehovani ’yolerile. 23#O’be 29:1Te Farau oja i fi i vile joa,la ’bani asi e’yo ’di dria ku. 24Te ’ba Misiria ’diyi dria ga ’bile yi ara amboru nde ria yi mvuza ndazu, yini ecole yi yi ara ndeni mvule kurisi.

Dra maturu odrukodrusiri

25Yehovani yi cozuri ma vutia, o’du aga aziri ra.

Currently Selected:

Efuza 7: LB66

Highlight

Copy

Compare