Efuza 30

Pari obiese vezuri

1 # Efu 37:25; 40:5; Eceza 8:3 Mi ma ede pari edeta edezu obiese vezu driniari; mi ede eri pati asaraururisi. 2Oconi alazari ma ovu wuale alu, walani wuale alu; kala erini su ’diyi ma ovu tro tro, tro tro, oconi edrezari ma ovu wuale iri; o’yu erini ma ovu pari nderi ma ruaa afa aluru. 3Mi ma a’bu ruani dria dria mele alarusi, drini pi, kalani pie, o’yuni pie dria; mi ede ekilaza melesi drinia kalaniasi kuru. 4Mi ma ede eri dri emve iri melesi; ma eci yi ekilaza eriniri ma etia, ma ’ba yi ejenia kalaniasi iri tro, yi ma ovu pari kali suzu eri ’duzuri. 5Mi ma ede kali nde ’diyi pati asaraururisi, ma a’bu yi rua dria dria melesi. 6Mi ma ’ba eri bongo ’ile sanduku e’yo eti nzezaniri ma driliari ma drilia, oguna yikini sanduku e’yo eti nzezani driari ma drilia, pari amani ngazu dri fuzu mi beria. 7Aroni ma ve obiese edele afa aji be arikariru ’diyisiri drinia; ma ve eri o’biti vusi o’biti vusi erini tala ederia, 8ma ve eri vini ondre vusi ondre vusi erini tala ’iria, ovuzu obiese vele ve i depi kuriru Yehova drilia a’bianzi emini vusi dria. 9#Lev 10:1Mi ma ede obiese vele ve nduri drinia ku, kani edeta vezaruri kani edeta edele anyafurasiri drinia ku; mi ma osu vini edeta mvuzaruri drinia ku. 10#Lev 23:27Te Aroni ma ede e’yo onzi o’yuni ma dria pale alu eli vusi; eri ma ede e’yo onzi anyapa edetaru e’yo onziniri ma arisi pale alu eli vusi a’bianzi emini vusi dria; eri ovu alatararu tu Yehova dri.

Silingi ’ba onzezuri

11Yehova ’yo Musa ma tia kini, 12#Efu 38:25; Kal 1:2, 5; 26:2; 2 Sam 24:2; Yob 33:24; 36:18; Zab 49:7; Mat 20:28; Mar 10:45; 1 Tim 2:6; 1 Pet 1:18; 2 Sam 24:15Mi ka anzi Israelini ’diyi ma kalafe la, ’ba ’bani adrile lale ’diyi vusi, etu nderisi ’ba dria alu alu ma fe afa yi ma orindi onzezuri Yehova dri mini yi laria, dra muaruri kazu yi ’yezu o’du mini yi lazurisi ku. 13#Efu 38:25-26; Mat 17:24; Kal 3:47; Eze 45:12’Ba dria agapi fipi ’ba lale ’bo ’diyi eselia ’diyi ma fe ’dini: sekeli ali, sekeli pari alatararu vileri vusi (sekeli alu alu ovu gera be kali iri), sekeli ali nderi ovu afa fele Yehova driri. 14’Ba dria agapi fipi ’ba lale ’bo ’diyi ma eselia ’diyi, e’dozu ’ba capi eli kali iri ’diyisi, yi ma fe afa feza nderi Yehova dri ’ba eli kali iri agapi ’bo ’diyi be. 15#Yob 34:19; O’be 22:2; ’Yeta 10:34; Rum 2:11; Gal 2:6; Efe 6:9; Kol 3:25; 1 Pet 1:17Afa e’i ma fe tu ku, alio ma fe vini were ku, yi ma fe sekeli ali’i, yi ka afa feza nderi fe Yehova dri orindi emini ma e’yo onzi edezu. 16#Kal 16:40Mi ma a’i sekeli e’yo onzi edezu ’diyi anzi Israelini dri, ma pe sekeli ’diyi hema ti ecizaniri ma azi ’yezu; eri ma ovu egata fepiriru Yehova ma milia anzi Israelini ’diyi ma e’yosi, orindi emini ma e’yo onzi edezu.

Awala’bani rua ojizuri

17Yehova ’yo Musa ma tia kini, 18#Efu 38:8; 1 Opi 7:38Mi ma ede awala rua ojizuri molasi, ede pani molasi indi, rua ojizu. Mi ma ’ba eri hema ti ecizaniri pi ma eselia pari edeta edezuri beria, mi ma osu yi alenia. 19#Isa 52:11; Ebra 10:22Te Aroni pi anzipi be yi ma oji yi ma dri pa be alenia ani. 20Yi ma oji yi yisi yini firia hema ti ecizaniria, yi kazu drazu ku, kani yini ecaria ogogo pari edeta edezuri vu azi ngazu, afa edetaru vezu acisi Yehova dri, 21#Efu 28:43Yi ma oji yi ma dri pa be, yi kazu odrazu ku; eri ma ovu azitaru yi dri ’dani ’dani, eri dri azini eri ma ori dri a’bianzi yini vusi dria.

Odu osule osuri pi obiese vele veri be

22 # Efu 37:29 Yehova ’yo vini Musa ma tia lindi kini, 23#Ong 4:14; Eze 27:22; Zab 45:8; Yer 6:20Mi ’du mini afa aji be arikariru agapi ’diyi: odu arikariru rapi sururi sekeli turu towi, azini pati o’boko madalasiniru aluzaru kalafe ’di ma ali, ’di sekeli turu iri drini kali towi, azini eka aluzaruri sekeli turu iri drini kali towi, 24#Zab 45:8; Efu 29:40azini kasia turu towi sekeli pari alatararu vileri vusi, azini odu mizeituni otekua alu; 25#Kal 35:25; Zab 80:20; 133:2te mi ma ede eri odu alatararu osule osuriru, afa aji be arikariru osale tualu onduouni osalerileri; eri nga ovu odu alatararu osule osuri, 26#Lev 8:10; Kal 7:1Mi ma tri eri hema ti ecizanziri pi ma ruaa sanduku e’yo eti nzezaniri be, 27mesa pi ma rua afazu erini ’diyi pie, tala pie afazu eri vile ’diyi pie, pari obiese vele veri edezuri pie, 28pari edeta edezuri pie afazu eri vile ’diyi pie dria, awala rua ojizuri pie pani pie dria; 29mi ma ’ba yi alaru, ’dini yi ma ovu alatarararu ani; afa dria yi rua elopi ’diyi ma ovu alatararu indi, 30Mi ma osu odu Aroni pi ma dria anzipi be, mi ma ’ba yi ndu alaru, ’dini yi ma nga azi kuhanini ma dri ani beni, 31Mi ma ’yo anzi Israelini ’diyi ria kini, ’Diri nga ovu ma dri odu alatararu osule osuri, a’bianzi emini vusi dria. 32Ma osu eri ’ba tokori ma ruaa ku, mi ma ede odu azini i sipi erile tro troni ku, ekile odu ’bani osale ’dirile; eri ovu alatararu, eri ma ovu di alatararu emi dri indio 33#E’do 17:14; Lev 7:20, 21’Ba ngoni ngori ti odu azini ’dirileri osapiri, kani ’ba odu ’diri osupi ’ba andi driari, yi nga eri nze o’dipi ma eseliasi amve li kpi.

34 # Efu 25:6; 37:29 Yehova ’yo Musa tia, Mi ’du mini afa aji be arikariru ’diyi, ese sitaketiru, etiriko ongoro’bo onikaruri pie, ese galabanoru pie, afa aji be arikariru ’diyi tualu obiese vele ve alaruri be (afa mini sole ’diyi dria ma nziza ma ovu tro tro, tro tro), 35te mi ma ede eri obiese vele veriru afa aji be arikariru edezaru onduouni osale ondua erinisirile, osazaru a’isi, onyiru azini alatararu; 36#Efu 29:37, 42; Lev 2:3; 16:2mi ndi were eri ’izu inikini, ma ’ba eri sanduku e’yo eti nzezaniri ma drilia, hema ti ecizaniri ma alia, pari amani ngazu dri fuzu mi beria; eri nga ovu emi dri alatatararu. 37Obiese vele veri mini ngale edeleri, emi ma ede emi ngulupi dri emini ’diri osalerile ku; eri ma ovu Yehova dri alatararu emi ma milia. 38’Ba ngoni ngori ti ka afa ede ajini ka ngu ’dirile, yi nga eri nze o’dipi ma eseliasi amve li kpi.

Currently Selected:

Efuza 30: LB66

Highlight

Copy

Compare