Efuza 29

Arani pi ’bazu ndu alatararu anzipi beri

1 # Lev 8:2 E’yo mini ngale ’yele yi vu yi ’bazu ndu alaru, azi kuhaniniri ’yezu ma driri eri ’di: mi ’du monio aludu alu, kabiloago iri rua be alaru ’diyi pie, 2#Lev 2:4; 6:20-22mikate akufi kokoruri pie, mikate akufi kokoru olizaru osale odusi ’diyi pie, mikate akufi kokoru pekepeke odu trizu drinia ’diyi pie. Mi ma ede yi nganufura ’ile inikinirisi. 3Mi ma ’ba yi afazu alu ma alia, ma eji yi afazu nderi ma alia, tualu monio pi kabiloago iri ’diyi be. 4#Efu 40:12; Lev 8:6; Ebra 10:22Mi ma ji Aronini pi anzipi be hema ti ecizaniri ma tilia, mi oji yi yisi. 5#Lev 8:7; Efu 28:8Mi ma o’du bongo ’diyi, ma osu i Aronini koti pisi kanzu koti alinariniri pie, koti alinari pie, bongo agatiari pie, mi a’di koti alinari mao baka onduouni caleri ruania indi; 6mi ombe bongo dri ombezuri eri ma dria, mi ’ba ekilaza alatararuri drinia. 7#Efu 30:25; Lev 8:12; 10:7; 21:10; Kal 35:25; Zab 133:1, 2; Isa 61:1’Di ma vutia mi ma ’du odu osuzari, mi osu eri drinia, mi osu eri dria ani. 8Mi ma eji anzipi, yi osuzu kotisi, 9#Kal 18:7mi a’di enyiriko Aroni pi ma opilia anzipi be, mi osu bongo osule dria ’diyi yi ma dria; azi kuhaniniri ma ovu yini azita i asipi kurisi. Te mi ma ope Aroni pi ndu alaru anzipi be.

10 # Lev 1:4; 8:14 Mi ma ji monio hema ti ecizaniri ma drilia. Te Aroni pi anzipi be yi ma oti yi dri monio nderi dria, 11mi ma fu monio nderi Yehova ma milia, hema ti ecizaniri ma tilia, 12#Lev 8:15; Efu 27:2; 30:2mi ma a’i monio nde ma ari, mi ’ba eri pari edeta edezuri ma o’yua mi drilejusi, mi osu ari nderi dria va pari edeta edezuri ma etia. 13#Lev 3:3Mi ma ’du oso dria fi rua a’bupiri, aridria’bure ogu ruaari pie, orofi iri ’diyi pie oso yi ruaari be, mi ve yi pari edeta edezuri ma dria. 14#Lev 4:11, 12, 21; Ebra 13:11Te monio nderi ma za, enyirikoni pie, warani pie, mi ma ve acisi pari ’bani hema asozuri ma aparitia amve; eri ovu edeta e’yo onziniri.

15 # Lev 8:18; 1:4; Isa 53:6; Gal 4:3-5 Mi ma ’du kabiloago alu indi, te Aroni pi anzipi be yi ma oti dri kabilo nderi ma dria, 16ma ma li kabilo nderi, ma a’i arini, ma oya eri pari edeta edezuri ma dria ageinia kuru kuru dria. 17Mi oli kabiloago nderi ola vusi ola vusi, ma oji fi pi pani be, ma o’ba yi olani pie, drini pie, 18#Efe 5:2; Fil 4:18; E’do 8:21mi ma ve kabilo nderi pi pari edeta edezuri ma dria; eri ovu edeta vezaru Yehova driri; afa aji be arikariruri, eri edeta vele acisi Yehova driri.

19 # Lev 8:22 Mi ma ’du kabiloago aziniri; te Aroni pi anzipi be yi ma oti dri kabiloago nderi ma dria. 20’Di ma vutia mi ma li kabiloago nderi, mi a’i arini, mi ’ba eri Aroni ma bidrile dri ndiaria, azini anzipi ma bidrile dri ndiari ma dria, azini yi ma driago dri ndiari ma dria, azini yi ma paago dri ndiari ma dria, mi oya ari pari edeta edezuri ma dria, ageinia kuru kuru dria indi. 21#Efu 30:25; Lev 8:30; Ebra 9:22Mi ma ’du ari pari edeta edezuri ma driari ma azi, ma ’du vini odu osule osuri ma azi, mi ma oya eri Aroni pi ma ruaa bongo erini be, anzipi ma ruaa, anzipi vile bongo ’diyi be indi eri be tualu; eri nga ovu alaru ani, eri’i bongo erini pie, anzipi pie, anzipi vile bongo ’diyi pie, eri be tualu.

22Azini vini mi ma ’du kabilo tekari ma oso, sobi osoruri pie, oso fi rua a’bupiri pie, aridria’bure ogu ruaari pie, orofi iri ’diyi pie, yi ma oso ruaari pie, o’du dri ndiari pie (a’disiku eri ovu inzita ’ba opezu ndu alaruri ma kabilo), 23#Lev 8:26mi e’du vini mikate alu, mikate aliza osale odusiri alu, mikate pekepekeri alu, ma o’du yi; afazu mikate akufi kokoruni Yehova ma miliari ma aliasi; 24te mi ’ba yi dria Aroni ma dri agelia, anzipi ma dri agelia indi, ma oya yi Yehova ma milia edeta oyazariru. 25#Lev 8:28Vutinia mi ma o’du yi yi ma driasi, ma ve yi edeta te vele ’bori ma dria pari edeta edezuri ma dria, ovuzu afa aji be arikariru Yehova ma drilia; eri edeta vele acisi Yehova driri.

26 # Lev 7:31, 34; 8:29; Kal 18:11, 18; Zab 99:6 Mi ma ’du kabilo Aronini opezu ndu alaruri ma agati, mi ma oya eri Yehova ma milia edeta oyazariru; eri nga ovu esele miniri. 27#Azi 18:3Mi ma ’ba agati nde edeta oyazariniri alaru, o’du edeta ’dule uru ’bani oyale azini ’dule ururini be, yi agati pi o’du be kabilo ’ba opezu ndu alarurini ovupi fezaru Aroni pi ma e’yosi anzipi beri. 28#Lev 10:15; 7:34Te eri nga ovu Aroni pi dri anzipi be afa yiniru yini isule ’dani anzi Israelini ’diyi ma driari, a’disiku eri ovu edeta ’dule ururi, eri nga ovu edeta ’dule uru anzi Israelini ’diyini fele engazu edeta yini asi anzuruni ’diyi ma eseliari, adaru edeta yini ’dule ’du uru Yehova dri ’diyi.

29 # Kal 20:26; 18:8; 35:25 Bongo alatararu Aronini ’diyi nga ovu anzipini eri ma vutia, yini osuzu yi ma ruaa o’du ’bani ngazu odu osuzu yi ruaa yi opezu ndu alarurisi. 30#Lev 8:35Mvi ngapi ovupi kuhaniru eri ma pariari ma osu yi o’du aziri, erini firia hema ti ecizaniria azi ’yezu pari alatararu ma aliaria.

31 # Lev 8:31 Mi ma ’du kabiloago ’ba opezu ndu alaruri, ma a’di zani pari alaruria; 32#Mat 12:4te Aroni anzipi be yi nga kabilo nde ma za nya, tualu mikate afazu aliari be, hema ti ecizaniri ma tilia. 33#Kal 16:40; Lev 10:14Yi ma nya afa nde e’yo onzi edezu ’bo ’diyi, yi ’bazu ndu azini alaru ani, te ani’bo ma nya yi aluni ku, afa nde ’diyini ovule alatararurisi. 34Za esa ’ba opezu ndu alaruri, kani mikate esa ka ace cazu o’bitisi, mi ma ve acepiri acisi; ma nya eri ku, erini ovule alatararurisi.

35 # Lev 8:33 Mi ma ’ye ’dini Aroni pi dri anzipi be, ekile e’yo dria mani azile mi tia ’borile; mi ma ope yi ndu alaru o’du aziri, 36#Ebra 10:11; Efu 30:26mi ma fe monio edeta e’yo onziniri e’yo onzi edezu etu vusi. Mi ma ’ba pari edeta edezuri ndu alaru mini e’yo onzi erini ederia indi, mi ma tri eri odusi eri ’bazu alaru indio 37#Efu 30:29; 40:10; Mat 23:19Mi ma ede pari edeta edezuri ma e’yo onzi o’du aziri, eri ’bazu alaru, pari edeta edezuri ma ovu alatararu tu; afa dria pari edeta edezuri ma ruaa elopiri ma ovu alaru indio

Edeta edele etu vusi ’diyi

38 # Kal 28:3; 1 Sur 16:40; 2 Sur 2:4; Ezr 3:3; Dan 9:27; 12:11 Te afa mini ngale fele pari edeta edezuri ma dria ’diyi yi ’di: kabiloanzi eli be alu ’diyi iri etuzu etuzu ’dani. 39#Eze 46:13Mi ma fe kabilomva alu o’bitisi, kabilomva aziniri ondresi; 40kabilo aluri vusi mi ma fe anyafura inikini abaka ma esele alu mudriniri, odu dile diri otekua ma esele alu suniri be tualu, azini patiefi su otekua ma esele alu suniri edeta afa mvuzaniriru. 41#1 Opi 18:29; 2 Opi 16:15; Ezr 9:4, 6; Zab 141:2; Eze 4:3, 5; Dan 9:21Kabilomva aziniri mi ma fe ondresi, mi ma ’ye eri ma ruaa ekile edeta anyafurani o’bitisirile, azini ekile edeta afa mvuzani erinirile, ovuzu afa aji be arikariu, edeta vele acisi Yehova dririru. 42#Dan 8:11; Kal 17:4Eri nga ovu edeta veza i depi kuriru hema ti ecizaniri ma tilia Yehova drilia a’bianzi emini vusi ’dani, pari mani ngazu dri fuzu mi be e’yo ’yozu mi beria. 43#1 Opi 8:11; Hag 2:7, 9; Mat 3:1Ma nga dri fu anzi Israelini ’diyi be ’dale, diza maniri nga Hema nderi ’ba alaru; 44#Lev 21:15ma nga hema ti ecitaniri ’ba ndu alaru, pari edeta edezuri be iri tro; ma nga vini Aroni pi ’ba ndu alaru anzipi be, yi ma nga azi kuhanini ma dri ani beni. 45#Efu 25:8; Lev 26:12; Zek 2:10; Yoh 14:17; 2 Kor 6:16; Eceza 21:3Ma nga adri anzi Israelini ’diyi ma eselia, ma nga ovu Mungu yini. 46Yi nga ni ma Yehova Mungu yini, ndra yi ofupi angu Misiriniasiri’i, ma ma adri ani yi ma eselia beni: ma Yehova Mungu yini.

Currently Selected:

Efuza 29: LB66

Highlight

Copy

Compare