Efuza 28

Bongo ’ba kuhaniru ’diyini

1 # Kal 16:1-3; 17:1-8; Zab 77:20; Ebra 5:1-4 Mi ofu mi adri Aroni pi anzipi be, anzi Israelini ma eseliasi, mi eji yi mi vu ogogo, ’dini eri ma ’ye azi kuhanini ma dri ani, yi’i Aroni pi, i anzipi Nadabu pie, Abihu pie, Eleazari pie, Itamari pie dria. 2#Efu 29:5, 29; 39:1, 2; Lev 8:7, 30; Kal 20:26-28Mi ma so bongo alatararu mi adri Aroni dri, diza pi ma e’yosi rua ndriza be. 3#Efu 31:6; 35:31-35; 1 Opi 3:12; Isa 28:26; ’Yeta 6:3; 1 Kor 12:7-11; Efe 1:17Mi ma ’yo ’ba dria asi be onduaru, mani yi gale tre orindi onduanisi ’diyi ma tia, yi ma so bongo Aroni dri eri ’bazu ndu alaru, eri ma nga azi kuhanini ’ye ma dri beni. 4Bongo yini ngale sole ’diyi ’di: bongo agatiari pi, koti alinari pie, kanzu pie, bongo kotiru wura be lokari pie, bongo dri ombezuri pie, enyiriko opileari pie; ma so bongo alatararu mi adri Aroni pi dri anzipi be, eri ma nga azi kuhanini ’ye ma dri beni.

5Yi ma ’du mele pi, bongo blururi pie, okalakokalari pie, ekari pie, bongo mile be nyiriari pie. 6#Efu 39:2; Lev 8:7Yi ma ede koti alinari mele pisi, bongo blururi pie, okalakokalari pie, ekari pie, bongo mile be nyiriari pie, onduou ma dri pamvu. 7Eri ma ovu baka gbudriari be iri, ovupi ecizaru eri ma kalati iria ’diyi, eri ecizu tualu. 8Baka onduouni cale ovupi eri ma ruaa eri ombezuri, azi ngale ruaniari ma wura ma si i bongo adari be si si, ede eri bongo alu ’dasi, mele pisi, bongo blururi pie, okalakokalari pie, ekari pie, bongo mile be nyiriari pie. 9Mi ’du oni iri onikiru ’diyi, mi ma osi Israeli anzi ma ru drinia, 10ru azia oni alu dria, azini ru acepi azia ’diyi oni aziri ma dria, osiza yini vusi. 11Mi li oni iri nde ’diyi Israeli anzi ma ru vusi, onduouni adrile lilerile, ekile yini eceta sile oni driadriamva ruaari ma driarile; mi osu oni ’diyi mele yi bipi ci ’diyi ma alia. 12#Efu 39:7; Zek 6:13; E’do 9:12-17; Efu 12:14; Yos 4:7; Mar 14:9; ’Yeta 10:4; 1 Kor 11:24, 25Mi ma o’ba oni iri ’diyi koti alinaruri ma gbudria, ovuzu oni Israeli anzi ma e’yo egazuriru; te Aronini nga yi ru eji Yehova ma milia i ma gbudria irile irile egata fezu. 13Mi ma ede afa oni bipi ci ’diyi melesi, 14azini anziriku iri mele alarusi, mi ma ede yi ekile baka kale karile, ma ’ba anziriku kale ka ’diyi mele oni bipi ’diyi ma ruaa.

15 # Efu 39:8; Lev 8:8; Isa 59:17; 1 Tes 5:7; Efe 6:14 Mi ma ede bongo agatia e’yo lizaniri, onduou ma dri pamvu; azi mini ngale ruaniari ma wura ma si i koti alinaruri be si si; mele pisi, bongo blururi pie, okalakokalari pie, ekari pie, mi ma ’ye eri ’dini. 16O’biza kalaniniri ma ovu dria tro tro, agbozaru mile iri, oconi ma ovu driale alu, walani driale alu indio 17#Efu 30:10; Mal 3:17Mi ma oti oni eri ma ruaa, bereto su. Bereto alu sadiusi pi, topaze pie, karaboko pie, ’diyi bereto aluri; 18bereto iriri emerode pi, safira pie, diamonde pie; 19bereto nari jasinte pi, agate pie, ametusito pie; 20bereto suri berule pi, oniki pie, jasipe pie; yi ma ovu ecizaru pari yinia mele yi bipi ci ’diyi ma alia. 21#Kal 1:5; 2:3; Eceza 7:4-8; 21:12Oni ’diyi ma ovu Israeli anzi ma ru vusi, mudri drini iri ru yini vusi; ekile onduouni eceta sile oni driadriamva ma ruaari ma driarile, yi dria alu alu ma ru vusi, yi ma ovu suruti mudri drini iri ’diyini alu alu. 22Mi ma ede bongo agatiari ma ruaa anziriku ekile bakale ’diyi, mele alaru kale karisi; 23azini mi ma eci bongo agatiari ma ruaa ocoko meleru ’diyi iri, mi ma eci ocoko ’diyi iri bongo agatiari ma tia iri tro. 24Mi ma su anziriku meleru kale ka ’diyi iri ocoko iri ovupi bongo agatiari ma tia ’diyi ma talaa; 25anziriku iri kale ka ’diyi ma ti acepi iri ’diyi, mi ma eci yi mele oni bipi ci ’diyi ma ruaa, ma ’ba yi koti alinari ma baka gbudriari ma dria agatialeru. 26Mi ma ede ocoko iri melesi, mi eci yi bongo agatiari ma tia iri tro, kala alialeru i isupi koti alinari beria. 27Mi ma ede ocoko iri melesi, ma eci yi koti alinari ma baka gbudria iri ’diyi ma ruaa valeru, kala agatialeru, ogogo pari yini yi ti isuzuria, koti alinari ma baka kale onduasiri ma drilia uruleru. 28Yi ma a’di bongo agatiari ocoko erinisi baka blururisi, ocoko koti alinaru vileri be tualu, eri ma ovu ani koti alinari ma baka kale onduasiri ma dria, bongo agatiari kazu i ayuzu koti alinari ma ruaarisi ku. 29#Ong 8:6; Isa 49:15, 16; Ebra 9:24Aronini nga ru anzi Israelini ovupi bongo agatia e’yo lizaniri ma ruaa ’diyi ji i asi dria erini firia pari alatararuri ma alia, afa egata fepiriru ’Yehova ma milia ’dani. 30#Kal 27:21; Azi 33:8; Neh 7:65; Lev 8:8; 1 Sam 28:6; Ezr 2:63Mi ma ’ba Urimu pi Tumimu be bongo agatia e’yo lizaniri ma alia, yi nga ovu Aroni ma asi dria erini firia Yehova milia; Aronini nga e’yo liza Israeli anzini ji i asi dria Yehova ma milia ’dani.

31 # Efu 39:22; Lev 8:7; 2 Sam 6:14; Hos 3:4 Mi ma so kanzu koti alinari vileri bongo blururisi dria. 32Eri ma ovu tile be agadua dri suzu, ma ci tini dri suzuri bongo kale karisi kuru kuru dria, kazu i asizu ku beni, tini ma ovu elile koti edele anziri kusirinirile. 33Tinia ele mi ma so patiefi pomegranateni ma wura, baka blururi pisi, okalakokalaruri pie, ekaruri pie, tini ma ageia dria, aiyoro meleru osazaru yi ma eselia ageinia dria, 34aiyoro meleru alu, patiefi pomegranateni alu, dika aiyoro meleru alu, pomegranate alu, kanzu ma ti eleri ma ageia dria. 35Aroni ma su eri azi ngazu, yi awuni eri erini firia pari alatararu Yehova ma miliaria, azini erini efuria, ka mu drazu ku.

36 # Efu 39:30; Lev 8:9; 1 Sur 16:29; Zab 29:2; 93:5; Zek 14:20; Ebra 4:15; 7:26 Mi ma di mele alaru kparakala, mi ma si drinia ekile onduouni adrile eceta sile oni driadriamva ma ruaari ma driarile ’dini, ALATARARU YEHOVA DRI. 37Mi ma a’di eri baka blururisi, eri ma ovu bongo dri ombezuri ma ruaa; eri ma ovu bongo nderi ma dria andretialeru. 38#Lev 10:17; 22:9; Isa 53:11; Yoh 1:29; Ebra 9:28; 1 Pet 2:24; Lev 1:4; 23:11; Isa 56:7Eri ma ovu Aroni ma andretia, azini Aroni ma ’du e’yo onzi afa alatararu nde, anzi Israelini ngale ’bale alaru afa feza yini alatararu ma alia’diyini dria; eri ma ovu eri ma andretia ’dani, yi ma ovu a’izaru Yehova ma milia ani.

39Mi ma ca koti wura be lokari bongo mile be nyiriarisi, ma ede vini ara dri ombezuri bongo mile be nyiriarisi, mi ma ede vini enyiriko opiliari onduou wura cipiri ma dri pamvu.

40 # Efu 39:27; Eze 44:17, 18 Mi ma so koti Aroni anzipi dri, mi ma ede vini yi dri enyiriko opilia ’diyi, ma so yi dri bongo sule dria ’diyi be indi, diza pi ma e’yosi rua ndriza be. 41#Efu 29:7; 30:30; Lev 10:7Mi ma su yi Aroni mi adri ma ruaa anzipi be, mi ma osu odu yi ma dria, ma ope yi ndu, yi ’bazu alaru, ’dini yi ma ’ye ani azi kuhanini ma dri beni. 42#Lev 6:10; Eze 44:18Azini mi ma so yi dri bongo paa ’diyi, engazu opilia cazu o’dua ’diyi, yi rua pililiri a’buzu; 43#Efu 20:26; Lev 20:19, 20; Kal 18:22; Lev 17:7yi ma ovu Aroni pi ma ruaa anzipi be yini firia hema ti ecizaniri ma alia, kani yini esiria pari edeta edezuri vu ogogo, azi ’yezu pari alaruri ma alia; yi kazu e’yo onzi ’duzu yi ruaa drazu ani ku. Eri ma ovu azitaru eri dri ’dani ’dani a’bianzi erini eri ma vutia ’diyi dri indio

Currently Selected:

Efuza 28: LB66

Highlight

Copy

Compare