Efuza 24

Musa pini ovuzu Oni Sinai ma dria I ’ba ’wara ’diyi beri

1 # Efu 28:1; Lev 10:1, 2; Kal 11:16 Eri ’yo Musa tia, Mi’i, mi etu uru Yehova vu, Aroni pie, Nadabu pie, Abihu pie, ’ba ’wara Israelini kali aziri ’diyi be, emi so pa ma inzizu re. 2Te kiri Musa a’dule ma emu Yehova vu ogogoni; te yi ma emu ogogo ku, azini ’ba ongulumuru ma etu eri be ku indi.

3Te Musa eca e’yo dria Yehovani ’yoleri ecezu ’ba ongulumuru dri, e’yo liza be dria; ’ba ongulumuru omvi e’yo o’duko alusi kini, Ama nga e’yo dria Yehovani ’yole ’bori ’ye ra. 4#Azi 31:9; E’do 28:18; 31:45Te Musa si e’yo dria Yehovani ’yoleri ra. Eri enga o’biti drio drio, eri si pari edeta edezuri oni nde etia, oni biza izu izu ageinia mudri drini iri suruti Israelini mudri drini iri ’diyi vusi. 5Eri pe karile anzi Israelini eselia ’diyi ma ti afa edetaru vezu, yi so ti edeta asi anzuruni ’diyi Yehova dri. 6#Ebra 9:18Te Musa abe ari iri, osu ari ma azi okele alia, oya ari nderi ma aziri pari edeta edezuri ma dria. 7Eri ’du buku azizani, la eri ’ba ongulumuru bilia; te yi ’yo, Ama nga e’yo dria Yehovani ’yole ’bori ’ye ra, ama nga yi inzi ra. 8#Mat 26:28; Mar 14:24; Luk 22:20; 1 Kor 11:25; 1 Pet 1:2; Ebra 9:19-20; 10:29Te Musa ’du ari nderi, eri oya eri ’ba ongulumuru dria, kini, Emi ne, aziza Yehovani azile emi be e’yo ’diyi dria ma e’yosiri ma ari ’di.

9’Di ma vutia Musa pi tu Aroni pie, Nadabu pie, Abihu pie, ’ba ’wara kali aziri Israelini ’diyi be, 10#E’do 32:30; Efu 3:6; 33:20, 23; Isa 6:1, 5; Yoh 1:18; 1 Tim 6:16; 1 Yoh 4:12; Eze 1:26; 10:1; Eceza 4:3; Mat 17:2te yi ne Mungu Israelini ra; eri ma pa etia oni otile ’dere ’dere ’diyi indi, ekile oni ajeambosi safirarurile, ’ba ma milia nezaniri ’bu ma mileni ovule alatararurile. 11#Efu 19:21; E’do 16:13; Azi 4:33; E’do 31:54; Efu 18:12Eri ’bani i ma dri ’ba anzi Israelini ma dri cepi ’diyi ma dria ku; te yi ne Mungu, yi nya, yi mvu indi.

12 # Efu 32:15; Azi 5:22 Te Yehova ’yo Musa tia, Mi etu ma vu oni dria, mi ovu ’daa; ma nga mi dri oni ’bararu, mani azita Pi sizu e’yo azile ’diyi be ’bori fe, ’dini mi ma imba yi beni. 13#Efu 33:11Te Musa pi nga Yosua eri ma aza kopiri be, Musa nga di tu oni Munguni dria. 14Eri ’yo ’ba ’wara tia, Emi te ama ’doa, cazu etu amani ecazu emi vu dikaria; emi ne, Aroni pi Huri be ovu emi be ’di; ’ba ka ovu e’yo be eri ma emu di yi vu.

15 # Efu 19:9; Mat 17:5 Te Musa tu uru oni dria, iriti a’bu oni nderi ma dri ci. 16#Efu 16:10; Kal 14:10Diza Yehovani ri oni Sinai ma dria, iriti a’bu eri o’du azia; o’du azirisi eri omve Musani iriti aliasi. 17#Ebra 12:18Diza Yehovani e’da i anzi Israelini ’diyi ma milia wura be ekile aci vepi dipi okporu oni mbili ma driarile. 18#Azi 9:9Te Musa fi iriti ma eselia agadua, tu oni dria. Musa ovu di oni dria etu kali su, ini kali su.

Currently Selected:

Efuza 24: LB66

Highlight

Copy

Compare