Efuza 25

Israelini ala ejizu edetaruri

1 # 1 Sur 29:3; 2 Kor 9:7 Yehova ’yo Musa tia kini, 2#1 Sur 29:3; 2 Kor 9:7Mi ’yo anzi Israelini tia, yi ma a’i mani afa feza awa’diforuri; emi ma a’i afa feza mani ’ba dria lepi fepi asisi ’diyi dri. 3Afa feza emini ngale a’ile yi dri ’diyi yi ’di: mele pi, dahabu pie, mola pie, 4bongo blururi pie, bongo okalakokalari pie, ekaruri pie, mile be nyiriri pie, ndri podo pie, 5kabiloago ma enyi ojale wura ekarusi ’diyi pie, yianya ma enyi pie, asarau pati pie, 6tala odu pie, afa aji be arikariru odu efiza pi edezu obiese vele veri beri pie, 7#Efu 28:15oni onikiru piyi oni osule osu ’diyi be, yini ngale osule koti alinari pi ma ruaa bongo sule agatiari be ’diyi. 8#Lev 4:6; Ebra 3:6; Eceza 21:3Mi fe yi ma ede pari alatararu ma dri, ’dini ma ma adri yi ma eselia ani. 9Ekile afa dria mani ecele mi dri ’diyile, wura bereni pi afa alenia ’diyini be dria, emi ede yi ’dini.

Sanduku e’yo eti nzezaniri

10 # Efu 37:1; Azi 10:3; Ebra 9:4 Yi ma ede sanduku asarau patisi; oconi alazari ovu wuale iri ali be, walani wuale alu ali be, oconi wuale alu ali be. 11Mi ma a’bu ruani dria dria mele alarusi, mi ma a’bu ruani alialeru azini amvemveleru indi, azini mi ma ede ekilaza melesi ,drinia kalaniasi kuru. 12Mimaede ,emve erini su mele akapi acisirisi, mi eci yi eri ma paa su tro, emve iri kala aluria, emve iri kala aziniria. 13Mi ma ede patiniru asarau pati’i, mima a’bu yi rua dria dria melesi. 14Mi ma su pati nde ’diyi emve sanduku ma kalaa ’diyi ma alia, sanduku ’duzu. 15#1 Opi 8:8Pati nde ’diyi ma adri emve sanduku ruaa ’diyi ma talaa; ma nze yi ku. 16#Efu 16:34; 31:18; 40:20; Kal 17:20; Azi 10:2; 31:26; 1 Opi 8:9; 2 Opi 11:12Mi ma ’ba sanduku nde ma alia e’yo eti nzeza mani ngale fele mi driri. 17#Ebra 9:5; Efu 37:6; Rum 3:25Mi ma ede oguna yikiniri mele alarurisi; oconi alazari nga ovu wuale iri ali be, walani wuale alu ali be. 18Mi ma ede kerubi iri melesi; mi ede yi mele dile dirisi, mi ’ba yi sanduku kalaa irile irile. 19Mi ’ba kerubi alu kala aluria, kerubi azini kala aziniria; mi ma ede kerubi kala nde iria ’diyi tualu oguna yikiniri be ovuzu afa aluru. 20#1 Opi 8:7; 1 Sur 28:18Kerubi ’diyi nga yi ma opile aja uru, oguna yikiniri a’buzu yi ma opilesi, yi nga yi ma andreti ofe; kerubi ’diyi ma andretini nga ovu oguna yikiniri vuleru. 21#Efu 26:34; 40:20Mi ma ’ba oguna yikiniri uru sanduku ma dria; azini sanduku alia mi ma ’ba e’yo eti nzeza mani ngale fele mi driri. 22#Efu 29:42; 30:6, 36; Lev 16:2; Kal 17:4; Eze 9:3; Yak 2:13; 1 Sam 4:4; 6:2; 2 Opi 19:15; Zab 80:1; 90:1; Isa 37:16’Dale ama nga ama isu mi be, engazu oguna nde yikiniri ma dria, kerubi iri ovupi sanduku e’yo eti nzezani ma dria ’diyi ma eselia, ama nga ti eci mi be e’yo oluzu, e’yo mani ngale fele mi dri azitaru Israeli anzi dririsi.

Mesa mikate ecetaruniri

23 # Efu 37:10; 1 Opi 7:48; 2 Sur 4:8; Ebra 9:2 Mi ma ede mesa asarau patisi: oconi alazari ma ovu wuale iri, walani wuale alu, oconi edrezari wuale alu ali be. 24Mi ma a’bu ruani dria dria mele alarusi, azini mi ma ede ekilaza melesi drinia kalaniasi kuru. 25Mi ma ede eri dri eseleni tini beri, walani drianzi su, eri ma kalaa dria, mi ede indi ekilaza melesi esele nderi ma tia kalaniasi kuru. 26Azini mi ma ede eri dri emve su meleni, mi eci yi kalania su tro pani su ’diyi dria. 27Emve ’diyi ma ovu ogogo eseleni tini beria, pari pati eri ’duzu ’diyi ecizuriru. 28Mi ma ede patiniru asarau pati’i, ma a’bu ruani dria dria melesi, mesa ’duzu ani. 29#Efu 37:16; Kal 4:7Mi ma ede saani erini, kabileni pie, imvuni pie, okelea yi bezu ’diyi pie; ma ede yi mele alarusi. 30#Lev 24:5-8Mi ma ’ba mikate ecetaruri mesa nderi ma dria ovuzu ma milia zu zu.

Tala pati edele melesiri

31 # Efu 37:17; 1 Opi 7:49; Zek 4:2; Ebra 9:2; Eceza 1:12; 4:5 Mi ma ede tala pati mele alarusi. Mi ede tala pati nderi mele dile dirisi, nduni pi ruani be; koponi pie, ongbuni pie, funi pie dria, yi nga ovu dria tala nderi ma ruaa afa aluru; 32#Kal 8:4; Efu 37:18, 19arakala azia ma fu eri ma ruaa, tala arakala na eje aluria, tala arakala na eje aziniria; 33kopo na ekile alimondi fule ovu eri ma arakala aluria, ongbu alu azini fu alu; kopo na ekile alimondi fule ovu eri ma arakala aziniria, ongbu alu azini fu alu-arakala azia fupi tala nderi ma ruaa ’diyi yi ovu ’dinile; 34tala nderi ma pati adaria kopo su ekile alimondi fule, ongbu ’diyi pi funi be, 35ongbu alu arakala iri etia tala nderi ma ruaa afa aluru, azini ongbu alu arakala iri etia tala nderi ma ruaa afa aluru, azini ongbu alu arakala iri etia tala nderi ma ruaa afa aluruarakala azia fupi tala nderi ma ruaa ’diyi yi ovu ’dinile. 36Ongbu yini piyi arakala yini be ovu tala nderi ma ruaa afa aluru; tala nderi dria ma ovu edezaru mele alaru dile dirisi. 37#Eceza 1:12; Efu 27:21; 30:8; Lev 24:3, 4; 2 Sur 13:11; Kal 8:2Mi ma ede tala erini aziri; yi nga tala erini ’diyi o’i, dizani ma di ruani e’dazu ani. 38Akpaani ’diyi piyi ajikuani be ma ovu edezaru mele alarusi. 39Mi ma ede eri afazu ’diyi be dria, mele alaru ma onzi alusi. 40#’Yeta 7:44; Ebra 8:5; Efu 26:30; Kal 8:4; 1 Sur 28:11, 19Mi ne onyiru mi ede afa ’diyi ekile wura mani ecele mi dri oni dria ’borile.

Currently Selected:

Efuza 25: LB66

Highlight

Copy

Compare