Azita Amvizu 4

Musani Israeli imbazu e’yo erizasiri

1 # Eze 20:11; Rum 10:5 Te curu’do, Israeli la! emi co bile azita mani imbale emi dri ’diyi piyi erizu, e’yo liza ’diyi be, emi ma ’ye yi ani; emi ma ovu ani idriru, ma fi angu Yehova Mungu emi a’bipinirini fele emi driria eri nyazu eminiru. 2#Eceza 22:18-19; Azi 12:32; Yos 1:7; O’be 30:6; Mat 15:9Emi ma ere e’yo azini e’yo mani di azile emi tiari ma dria ku, emi ma ku vini e’yo nderi ma azi ja ku indi; emi ma mba ani azita Yehova Mungu eminirini mani azile emi tia ’diyi ma ta beni. 3#Kal 25:1-9Emi ndre emi milesi e’yo Yehovani ’yele Baali-peori ma e’yosiri ’bo; te Yehova ja ’ba dria Baali-peori ma vuti bipi ’diyi ma dri emi eseliasi ra. 4Te emi emi ebipi ndra Yehova Mungu eminiri be ’diyi, emi dria alu alu idriru andru ’do. 5Mi ne, ma imba emi azita piyisi e’yo liza be, ekile Yehova Mungu manirini azile ma tiarile, emi ma ’ye ani ’dini angu emini file alenia eri nyazu eminiruri ma alia. 6#Yob 28:28; Zab 19:7; 111:10; O’be 1:7; 2 Tim 3:15; 1 Opi 10:6, 9; Dan 1:20; 4:9; Mal 3:12; ’Yeta 4:13E’yo ’disi emi mba yi ma ta, yi ’yezu; a’disiku ’diri ondua emini pi e’yo vaza eminiri be, suru ngapi azita ’diyi dria eripi ’diyi ma milia, ngapi ’yopi kini, Adada suru amboru ’dori onduaru e’yo vaza be, ’diyi. 7#2 Sam 7:23; Efu 25:8; 29:45; Lev 26:12; 1 Opi 6:13; Zab 46:1; 145:18; Isa 55:6; Zek 2:10; Efe 2:17; Yak 4:8Te suru amboru ovupi adrou yi vileri be ogogo yi vu ekile Yehova Mungu amanirini ovule ogogo ama vu amani eri omveriarileri ngori ya? 8Azini suru amboru ovupi azita piyi be, e’yo liza pie, kililiru trotro ekile azita ’do dria mani ’bale emi drilia o’du andru ’dorisirileri ngori ya?

E’yo i ’yepi Israeli vu Horebuari

9 # O’be 4:23; 23:19; 3:1, 3; 4:21; E’do 18:19; Azi 6:7; 11:19; Zab 78:5, 6; O’be 22:6; Efe 6:4 Te kiri mi ma mba mi ngulupi ma ta, mi ma mba orindi mini ma ta asi alusi, mi kazu e’yo mini ndrele mi milesi ’diyi avizu ku, yi kazu fuzu mi asisi o’du mini ovuzu idrirurisi dria ku; mi ece yi mi anzipi ma tia, yi ma anzi be- 10#Efu 19:9, 16; 20:18; Ebra 12:18o’du ndra mini pa sozu Yehova Mungu miniri ma drilia Horebuarisi, Yehova ’yo ndra ma tia kini, Mi oku ’ba nde ’diyi ma vu, ma nga fe yi ma eri e’yo mani ’yole ’diyi, ’dini yi ma oni ani ma ruzu ewu yini ovuzu idriru nyakuarisi dria, yi ma imba vini anzi yini indio 11#Efu 19:16-18; Ebra 12:18-19Emi esi ndra ogogo pa sozu oni nderi ma etia, oni nderini veria acisi kpere ’bu ma alia agadua, angu biza pi be, iriti pie, angu asepi iniciciruri pie. 12#Efu 20:22; 1 Opi 19:12Te Yehova ’yo ndra emi tia aci nderi ma aliasi agadua; emi eri ndra e’yo ’yoza nde ma o’duko ra, te emi ndreni wurani ngoni yari ku; kiri o’duko’i. 13#Efu 31:18; 34:28; Azi 9:10Eri olu emi tia aziza erini, erini azile emi dri ’yezuri, adani azita mudri nde ’diyi; si yi vini oni ’bararu iri ’diyi ma dria. 14#Efu 21:1Te Yehova azi ma tia etu nderisi emi imbazu azita piyisi e’yo liza be, emi ma ’ye yi ani angu emini ngazu agazu vunia eri nyazu eminiruri ma alia beni.

Ba ma bilendu lizu ma inzi wura inzile inzi ’diyi kuri

15 # Yos 23:11; O’be 4:23, 27; Yer 17:21; Mal 2:15; Isa 40:18; ’Yeta 17:24-29 E’yo ’disi emi ma te emi ma ngulupi ma agei onyiru. Emi ndreni ndra wura azini rua be ngoni yari aluni ku, o’du Yehovani e’yo ’yozu emi tia Horebua aci ma aliasiria; 16#Efu 20:4; Lev 26:1; Azi 5:8; 27:15; Rum 1:23emi te emi agei onyiru emi kazu muzu emi ezazu ku, emi kazu siri’ba inzile inziri opazu emi dri afa azini ma wurasi ’dini ku, kani i sipi agupile, kani okule, 17#Rum 1:23kani anyapa nyaku dria ’diyi ma azile, kani aria sapi uru ’bua opilesi ’diyi ma azile, 18kani afa agapi agatisi nyakua ’diyi ma azile, kani e’bi ovupi yia nyaku etia ’diyi ma azile ’diyi. 19#Azi 17:3; Yob 31:26; Yer 8:2; E’do 2:1; 2 Opi 17:16; 21:3Mi ka mi mile enga luzu uru ’bua, mini etu pi ndreria, mba pie, ’bi’bio pie, ada ’bi’bio dria ongulumuru ’bua ’diyi pie, kazu mi sezu yi inzizu, mi kazu vini azi ngazu afa nde Yehova Mungu minirini awale ’ba dria ’bu dria ma etia ’diyi dri ’diyi dri ku. 20#Efu 19:5; Azi 7:6; 14:2; 26:18; Tit 2:14; 1 Pet 2:9Te Yehova o’du ndra emi, onze emi okalemvu aya akazuriasi, ada Misiriasi, emi ma ovu eri ma yilaru ’ani, ekile o’du andru ’dorisirile. 21#Kal 20:12Vini indi Yehova ovu ndra aokosi ma be emi ma e’yosi, eri so ndra oyo kini ma ma zo Yoridanini ku, ma ma fi vini angu onyiru Yehova Mungu minirini fele mi dri awurusoruri ma alia ku. 22#2 Pet 1:13Te ma’i, ma mani dra angu ’dori ma alia, ma ma zo Yori’danini ku; te emi’i, emi nga zo ra, nga angu onyiru nderi ’du eminiru. 23Emi ma ovu mile be, emi kazu aziza Yehova Mungu eminirini, ndra erini azile emi beri avizu ku, emi kazu wura inzile inziri opazu afa Yehova Mungu minirini ogale mi dri ’diyi ma azi ma wurasi ku indio 24#Ebra 12:29; Efu 24:17; Azi 9:3; Isa 33:14; Efu 20:5; Azi 6:15; Isa 42:8; 48:11A’disiku Yehova Mungu emini ovu aci vepi veri, Mungu a’yaruri’i. 25#2 Opi 17:17Emi ka anzi oti, azini anzi ma anzi, emi ka nga ovu angu nderi ma alia ewu izuru ’boria, emi ka nga emi eza, ka nga afa inzile inziri opa afa azini ma wurasi, emi ka nga e’yo ovupi onzi Yehova Mungu mini ma miliari ’ye, fezu eri ma aokoni engazu ani, 26#Azi 30:18, 19; Isa 1:2; Mik 6:2ma ’bu pi omve nyaku be o’du andru ’dorisi, e’yo onzi emini ma eti opezu kini ace were emi nga dri la teketeke angu emini Yoridanini zozu fizu ’duzu eminiruri ma aliasi; emi ngani asi ovu angu nderi ma alia ewu izuru ku, te emi nga dri ja teketeke ra, 27#Azi 28:36; Lev 26:33; Azi 28:62, 64; Neh 1:8; Eze 12:15; 32:26Te Yehovani nga emi ere suru eselia, emi nga ace kiri lamiru suru ndu ndu Yehovani ngazu emi ojizu yi vu ’diyi ma eselia. 28#Azi 28:36, 64; 1 Sam 26:29; Yer 16:13; Eze 20:32, 39; ’Yeta 7:42’Dale emi nga azi nga adrou ’bani edele patisi azini onisi ’diyi dri, afa edele drisi, ecopi afa ndrepi ku, e’yo eripi ku, nyaka nyapi ku, ecopi vini ajini ngupi ku ’diyi. 29#Yer 29:13; 2 Sur 15:4; Neh 1:9; Isa 55:6Te ’darisi emi alu alu ka nga Yehova Mungu eminiri ndru, eri nga eri isu ra, eri ka nga eri nda i asi driasi, azini i orindi driasi. 30#E’do 49:1; Azi 31:20; Yer 23:20; Hos 3:5; Yer 4:1, 2; Yoe 2:12Mi ka nga ovu inzata amboru ma alia e’yo ’diyi dria ka nga emu mi dria, ewu asizurisi mi nga emvi Yehova Mungu miniri vu, mi nga bile co o’duko erini erizu, 31#Efu 34:6; Kal 14:18; 2 Sur 30:9; Neh 9:31; Yob 8:8; Zab 86:5, 15; 103:8; 111:4; Yon 4:2a’disiku Yehova Mungu mini eri Mungu yiki beri’i; eri ngani ece mi aza kozu ku, ngani mi dri ja ku, ngani vini avi aziza ndra erini azile mi a’bipi berisi ku. 32#Yob 8:8; Efu 15:11; 1 Sam 2:2; 2 Sam 22:31, 32; Isa 44:6, 8; 45:5, 18; Mat 24:31; Mar 12:29Mi zi nga curu’do zita o’du agapi ’bo, ovupi andra mi drilia oko ’diyi ma e’yosi, engazu o’du Munguni ’ba ’bazu nyakuaria, mi zi nga vini engazu ’bu ma kalati aluria cazu kpere kalati aziniria, kini e’yo amboru tu awa’dirileri ’ye i ndra ra ya ’ba eri e’yo ’dinileri oku drio ra ya? 33’Ba yi eri ndra o’duko Munguni e’yo ’yozu aci ma aliasi, ekile mini erile ’borile, vutinia ovu di idriru ’dani ra ya? 34Kani Mungu o’bi ndra muzu suru azini ’duzu iniru suru azini ’diyi ma eselia o’bita piyisi, eceta pie, e’yo osuzaru ’diyi pie, omba pie, dri okporuri pie, wu ejuzaruri pie, e’yo uriuriru ambo ambo ’diyi pie, ekile Yehova Mungu eminirini ’yele emi dri Misiria emi ma miliarile ra ya? 35#Mar 12:29, 32; Azi 32:39; 1 Sam 2:2; 2 Sam 22:32; Isa 45:5, 18Ece ndra e’yo nderi mi dri mi ma ni ani Yehovani Mungu’i beni; aziniri yo, pe lu eri’i. 36#Efu 19:9, 19; 20:18, 22; 24:16; 1 Sur 29:11; 2 Sur 20:6; Ebra 12:18Engazu ’bua eri fe ndra mini o’duko ini erizu, eri ma imba mi ani; va nyakua eri fe ndra mini aci ini amboruri ndrezu, mi eri vini e’yo erini ’yole aci ma eseliasi ’diyi ra. 37Erini ndra mi a’bipiyi lele avasirisi, e’yo ’disi eri ope a’bianzi yi ma vutia ’diyi, eri ofu mi Misiriasi erini ovuria mi be ci, okpo erini amboru turisi, 38suru mi agapi ambosi azini okposi ra ’diyi odrozu mi driliasi, mi ofizu, angu yini fezu mi dri ovuzu afa mruru, ekile erini ovule o’du andru ’dosirile. 39#Yos 2:11; Isa 42:8; Dan 4:35Ka’dini mi ma ni di andru, mi ma mba e’yo nde ma ta mi asia ci, kini Yehovani Mungu ’bua uru azini va nyakuari’i; azini yo, pe lu eri’i. 40#Lev 22:31; Azi 5:16; 6:3, 18; 12:25, 28; 22:7; Efe 6:3Mi ma mba e’yo aziza erini ’diyi pi ma ta, azita erini ’diyi be, mani azile mi tia o’du andru ’dorisi ’diyi, mi ma ovu ani drilebaru, anzi mini mi ma vutia ’diyi pie, mi ma fe ani o’du mini ovuzu angu Yehova Mungu minirini fele mi driri ma alia ’diyi ma idri yi drile ’dani ’dani beni.

Aku ’bani apazu yi ta mbazu Yoridani ma kala etuni efurialeruria ’diyi

41 # Yos 20:8-9; Kal 35:6 Musa nga di aku ambo ambo na Yoridania ’aa’dasi etuni efurialeru ’diyi ope ndu, 42’ba ’ba ’dipiri ma apa ’daa, eri ka i agyini fu aka ku, ka vini eri ngu onzi drio ku indi; ’dini eri ka apa aku ’diyi ma azi aluria eri ma ovu ani idriru beni: 43yi Bezeri angu roko senderuriari ’ba Rubenini ’diyi dri, Ramoti Gileadiari ’ba Gadini ’diyi dri, azini Golani Basaniari ’ba Manaseni ’diyi dri. Musani azita Israeli driri amvizu 44’Di azita Musani ’bale anzi Israelini ma driliari; 45’diyi e’yo eti nzeza, e’yo aziza, azini e’yo liza Musani ’yole anzi Israelini ma tia yini efuria Misiriasi ’diyi; 46#Azi 3:29’yo ndra e’yo ’diyi Yoridani ma tia ’aa’dasi, e’bu i otipi Beti-peori beria, angu Sihoni opi ’ba Amorini ’diyini ovupi ndra Hesibonia, Musa pini agale anzi Israelini be yini efuria Misiriasiri vile angua. 47#Kal 21:35; Azi 3:3, 4Yi o’du ndra angu erini yiniru, angu Ogi opi Basaniariniri be, yi opi ’ba Amorini ’diyini ndra ovupi Yoridani tia ’aa’dasi etuni efurialeru iri ’diyi; 48#Azi 2:36; 3:12; Zab 133:3engazu Aroeri ovupi e’bu Arinoni ma kalatiaria cazu kpere oni Sionia (eri Herimoni’i), 49tualu Araba Yoridani ma tia ’aa’dasi etuni efurialeruri dria be kpere Miri Arabaa Pisiga ma angu eluza ma ombetiaria.

Currently Selected:

Azita Amvizu 4: LB66

Highlight

Copy

Compare