Azita Amvizu 17

1Mi ma ede edetaru Yehova Mungu miniri dri ti kani kabinyebileko be, kani afa onzi azini be yi ruaari aluni ku; a’disiku eri ovu afa Yehova Mungu minirini ngule onziri’i.

2Mi ma eselia aku Yehova Mungu minirini fele mi dri ’diyi ma azi alu ma alia, yi ka agupi kani oku e’yo ovupi onzi Yehova Mungu miniri ma miliari ’yepiri isu, erini aziza erini ezalerisi, 3#Efu 22:20; Yob 31:26; Yer 7:22eri ka mu azi ngazu adrou dri yi inzizu, ka etu inzi, kani mbani, kani ’bi’bio ongulumu ’bua ’diyi, mani e’yoni azile ma’i kuri, 4’ba azini ka ’yo mi tia, mi ka eri ra; ka’dini mi ma nda e’yo nderi asi driasi, te mi ne, e’yo ngule onzi ’dini ’diri ka i ’ye Israeli eselia adada, 5#Lev 24:14; Yos 7:25ka’dini mi ma ofu agupi nde kani oku nde e’yo onzi ’diri ’yepi rari kalitile mini ria, mi ma o’be agupi nde kani oku nderi onisi kai. 6#Kal 35:30; Azi 19:15; Mat 18:16; 2 Kor 13:1; 1 Tim 5:19; Yoh 8:17Ma fu ’ba yini ngale fuleri ’ba iri kani ’ba na ’diyini e’yo eti nzelerisi; te ma fu eri e’yo eti ’ba aluni nzelerisi ku. 7#1 Kor 5:13’Ba e’yo eti nzepi ’diyi ma ’ba yi dri oko eri fuzuni, vutinia ’ba dria ma dri. ’Dini mi ma nze e’yo onzi emi eseliasi.

8 # 2 Sur 19:10; Hag 2:11; Mal 2:7; Efu 21:13; Kal 35:11; Azi 12:5; 19:17; Zab 122:5 E’yo azini okporu ka efu, ka mi nde lizaru ra, kani ari pini ari be, e’yo eti nzeza pini e’yo eti nzeza be, acoa pini acoa be, e’yo efupi awataru mi vile akua ’diyi, ka’dini mi ma enga di, ma mu uru pari Yehova Mungu minirini ngale peleria; 9#Yer 18:18; Azi 19:17; Lip 4:5; 1 Opi 3:16; Eze 44:24mi ma mu ’ba Levini kuhaniru ’diyi pi vu, ’ba e’yo lipi ewu nderisiri pie, mi ma zi yi tia, yi nga ani e’yo lizaniri ece mi dri. 10Mi ma ’ye ekile e’yo liza yini ngale ecele mi dri pari Yehovani ngale peleriarile; te mi ma ’ba mi asi e’yo dria ’yezu ekile yini mi imbalerile; 11mi ma ’ye ekile azita yini imbale mi dririle, azini ekile e’yo liza yini olule mi tiarile; mi ma oja mi dri ndia kani dri ejia e’yo liza yini ecele mi driri kuzu ku. 12#Kal 15:30; Ezr 10:8; Hos 4:4; Azi 18:5’Ba ’yepi ambosi, kuhani pa sopi azi ngapi ’daa Yehova Mungu miniri ma driliari pi ma ti eripi ’ba e’yo lipiri be kuri, agu nderi ma dra ra; mi ma nze ani e’yo onzi Israeli ma eseliasi ra. 13’Ba dria ma eri, ma ru ani, ma ’ye ambosi dika ku.

Azita opi ma e’yosiri

14 # 1 Sam 8:5; 10:19; Hos 13:9 Mi ka nga fi angu Yehova Mungu minirini fele mi driri ma alia eri ’duzu miniru, mi ka nga ovu alenia ’bo, mi ka nga ’yo kini, Ma nga opi ’ba ma drilia ekile suru dria ma ageia ’diyini ’balerile; 15#Yer 30:21mi ma ’ba opiru mi drilia ’ba Yehova Mungu minirini ngale peleri’i. Mi ma ’ba ’ba alu adripi mini ’diyi ma eseliari mi drilia opiru’i; mi econi ’ba jururu ovupi mi adripiru kuri ’bazaru mi drilia ku. 16#1 Opi 4:26; 10:28; 2 Sur 1:16; 9:28; Zab 20:7; Isa 31:1; Efu 13:17; Kal 14:3, 4; Hos 11:5Te bani eri ma fe akanyani ezuzu iniru karakarau ku, ma fe vini ’ba ma mvi Misiria, erini ngazu fezu ani akanyani ezuzu kakau ’dini ku; a’disiku Yehova ’yo emi tia ’bo kini, Emi ngani asi mvi geri ’daasi dika ku. 17#1 Opi 10:14-22, 27; 11:1-8; 2 Sur 1:15; 9:27Eri ma wu i dri oku tre ku indi, asini kazu ojazu kalaa ku; eri ma fe vini dahabu pini ezuzu i dri mele be ’dini ku. 18#2 Opi 11:12; Azi 31:9; 2 Opi 22:8Eri nga eca ’dini, eri ka nga ri oguna ini opiniri ma dria, eri nga azita ’dori ma siza aziniri si i dri buku ma alia, engazu azita ovupi ’ba Levini kuhaniru ’diyi ma driliari ma alia; 19#Yos 1:8; Zab 119:97eri ma ovu eri be ’dani, eri ma la buku ’diri o’du erini ovuzu idrirurisi dria, eri ma oni ani Yehova Mungu ini ruzu, azita ’diyi pi ma e’yo ta mbazu e’yo aziza ’diyi be dria, yi ’yezu; 20#Azi 5:32; 1 Opi 15:5asi erini kazu engazu uru afusi adripi erini ’diyi ma drilia ku, eri kazu vini i ojazu dri ndia kani dri ejia azita nderi kuzu ku indi; ’dini eri ma fe ewu erini opi nyazuri ma ovu izu, eri’i anzipi be, Israeli ma eselia.

Currently Selected:

Azita Amvizu 17: LB66

Highlight

Copy

Compare