गलातियों 5
5
पवित्रात्मा रे जरिये अगुवाई ते प्यार
अजादी जो बचाई करी रखो
1मसीह यीशु ने असा जो मूसा रे कानून का अजाद करणे तांइ असा जो अजाद कित्ते रा है, इधेरे तांइ पक्के तौर पर अपणी अजादी जो मत गुआंदे, ते दुबारा मूसा रे कानून जो मन्नी करी अप्पु जो गुलाम मत बणदे। 2मैं पौलुस, तुसा लोक्कां जो बोलदा कि जे अगर तुसा परमेश्वर रे सामणे धार्मिक ठैहरणे तांइ खतना करांगे, तां मसीह यीशु ने जे किच्छ कित्ते रा ओ, तिसेरा तुसा जो कोई फाएदा नी होणा। 3पर मैं हर इक्क खतना कराणे वाले जो बोल्ली दिन्दा कि तिस मणू जो मूसा रा कानून पूरे तरिक्के कने मनणा पैणा। 4तुसा मणू जे मूसा रे कानून जो मन्नी करी धार्मिक ठैहराणा चाह्ंदे, ते तुसा अप्पु जो मसीह यीशु का बखरा करी लित्तेया ते तुसा बिच परमेश्वर रा अनुग्रह नी रेया। 5किजोकी पवित्रात्मा री वजह कने असी विश्वास कने, आस कित्ते री धार्मिकता री भाल रखदे जे परमेश्वर ने तिन्हा लोक्कां जो दैणे रा वादा कित्ते रा ओ जे तिन्हा पर विश्वास करदे। 6जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।
7परमेश्वर कने तुसा रा रिस्ता ता बड़ा छैल होया करदा थिया, अवे कुनिए तुसा जो रोक्की दित्तेया कि तुसा मसीह रे सुब बसेख री सच्चाई जो ना मन्नो? 8इदेइ शिक्षा परमेश्वर रे पास्से का नी है, जिन्हा ने तुसा जो अपणी औलाद्दां बणने तांइ सद्दे रा है। 9झूठ्ठी शिक्षा थोड़े जदेय त्रके रे आट्टे सांई है जे गुन्ने रे आट्टे जो तरकाई दिंदा। 10पर मैं परमेश्वर पर विश्वास करदा कि मेरे अलावा तुसा कुसकी होर जणे री गल्लां पर भरोस्सा नी करणा। पर जे अगर कोई तुसा जो परमेश्वर रे सच्चाई रे बसेख का भटकाणे री कोसीस करेया करदा है, परमेश्वर ने तिन्हा जो सजा जरुर दैणी चाए से कोई भी किजो ना हो। 11पर ओ संगी विश्वासियों, जे अगर मैं मसीह का छुटकारा मिलणे रे बसेख कने-कने खतना कराणे रा प्रचार करदा रैहन्दा ता ना ही कोई मेरे बुरा मनदा ते ना ही मेरे पर कोई जुल्म करदा। 12जे मणू तुसा जो सही रस्ते का भटकाणे री कोसीस करदे, तिन्हेरे तांइ ए खरा है कि से किन्नर बणी जाण। #5:12 पौलुस ने ए गल्ल इक्क तान्ने रे तौर पर बोल्ली थी, कि जे मणू मसीह पर विश्वास करणे रे कने खतना कराणे पर भी बड़ा जोर पाया करदे थिये से मणू अपणा अंग कटाई करी किन्नर ही बणी जाण। 13ओ संगी विश्वासियों, परमेश्वर ने तुसा जो अजाद होणे तांइ सद्दे रा है इधेरे तांइ अवे तुसा जो मूसा रा कानून मन्नी करी चलणे री जरुरत नी है। अपणे सरीर री बुरी इच्छा जो पूरा करणे रा मौक्का मत देयो बल्कि आपसी प्यार कने इक्क-दूए री सेवा करो। 14किजोकी मूसा रा पूरा कानून वस इक्क ही हुकम बिच पूरा होई जांदा कि “तू अपणे गुआडीं कने अप्पु सांई प्यार रख।” 15जे अगर तुसा अप्पु-मिते लड़दे रे, तां चुकन्ने रेयो कि कुथकी तुसा अप्पु जो बर्बाद ना करी लेयो।
पवित्र आत्मा ते मणू रा स्वभाव
16पर मैं तुसा जो बोलदा कि पवित्रात्मा रे कहे मुताबिक चलो, तां तुसा कुसकी भी तरिक्के कने सरीर री बुरी इच्छा जो पूरा करणे रा मौक्का नी दैणा। 17किजोकी सरीर रे बुरे कम्म से कम्म हिन जे पवित्रात्मा नी चाह्ंदा कि असी करे। ते तिय्यां ही जे कम्म पवित्रात्मा असा का चाह्ंदे, सरीर री बुरी इच्छा से कम्म बिल्कुल भी नी चाह्ंदी, किजोकी ए दोन्नों इक्क-दूए रे दुश्मण हिन। इधेरे तांइ तुसा हमेसा से कम्म नी करी सकदे जे तुसा करणा चाह्ंदे। 18ते जे अगर तुसा पवित्रात्मा रे कहे मुताबिक चलदे, तां तुसा जो मूसा रे कानून जो मन्नी करी चलणे री जरुरत नी है। 19सरीर रे बुरी इच्छा ता जाहिर ही हिन, मतलब कि व्याभिचार, गन्दे काम्म, अय्याशी करणा, 20मूर्तां री पूजा करणा, जादू-टोणा करणा, दुश्मणी रखणा, लड़ाई-झगड़े करणा, हिरस, लैह्र, मतलबीपन, दूज्जे रे खिलाफ सोच, फूट पाणा, गुटबंदी करणा, 21जलन, मतवाले होई जाणा, लीला-क्रीड़ा अते इन्हा सांई होर-होर कम्म हिन, इन्हेरे बारे अन्दर मैं तुसा कने पैल्ले का ही जताई दिन्दा, जिय्यां कि पैल्ले भी जताई चुके रा है कि इदेय-इदेय कम्म करणे वाले मणू परमेश्वर रे राज रे वारिस नी बणी सकदे। 22पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है। 23ते निमतापन, अप्पु पर काबू रखणा। इदेय-इदेय कम्मां रे खिलाफ कोई भी कानून नी है। 24अते जे मणू मसीह यीशु रे हिन, तिन्हा ने अपणे सरीर री बुरी इच्छां जो मसीह कने सुली पर चढ़ाई दित्ते रा है, ते से अवे अपणी सरीर री बुरी इच्छा रे काबू बिच नी हिन। 25जां पवित्रात्मा ने असा जो नौई जिन्दगी दित्ते री है, तां असा जो पवित्रात्मा रे कहे मुताबिक जीणा भी चाएदा। 26असी घमंडी ना बणे ते ना ही इक्क-दूज्जे जो छेड़े, अते नां इक्क-दूज्जे री हिर्स करण।
Currently Selected:
गलातियों 5: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
