गलातियों 4
4
1मैं इस इक्क उदारण कने समझांदा कि कुसकी मणू रा इक्क बच्चा है जे तिसेरा वारिस है। ते जां तांइ से वारिस बच्चा है, तां तिकर तिस बिच ते नौक्कर बिच कोई जादा फरक नी हुंदा। 2जां तांइ से बच्चा मालिक बणने री उमर तिकर नी पूज्जी जांदा, तां तिकर से अपणे प्यो रे ठैहराए रे बेल्ले तिकर अपणे संभालणे वालेया ते ख्याल रखणे वालेयां रे वस बिच रैहन्दा। 3तिय्यां ही असी भी जां तिकर बच्चे थिये, तां दुनिया री सुरुआती शिक्षा रे वस बिच होई करी इक्क गुलाम सांई थिये। 4पर जां परमेश्वर रा ठैहराए रा समय आई गेया तां परमेश्वर ने अपणे पुत्तर जो इस दुनिया बिच भेज्जेया जे इक्क जनानी का पैदा होए। से इक्क यहूदी मणू रे रुप बिच पैदा होए ते तिन्हा ने मूसा रे कानून जो मन्नेया। 5ताकि जे मणू मूसा रे कानून रे वस बिच रैह्णे वाले लोक्कां जो अजादी देई दे ते तिन्हा ने असा जो अपणे बच्चेयां सांई गोद लेई लित्ता। 6अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा। 7इधेरे तांइ तुसा अवे गुलाम नी बल्कि परमेश्वर री औलाद है, ते जां तुसा परमेश्वर री औलाद्दां ठैहरे तां तुसा से सारी चीजां हासिल करणी जे परमेश्वर ने अपणी औलाद्दां जो दैणे रा वादा कित्ते रा है।
गलातियों रे बारे बिच पौलुस री चिंता
8पैल्ले जां असी परमेश्वर जो नी जाणदे थिये तां तुसा तिन्हा जो ईश्वर मन्नी करी चलेया करदे थिये जे हकीकत बिच ईश्वर हिन ही नी। 9पर अवे ता असा ने परमेश्वर जो जाणी लित्ते रा है, बल्कि इय्यां बोलणा जादा सही होणा कि पैल्ले परमेश्वर ने असा कने रिस्ता बणाया। तां फिरी किय्यां तिस कमजोर ते सुरुआती शिक्षा पास्से मुड़ी सकदे? तुसा फिरी किजो तिन्हेरे गुलाम बणना चाह्ंदे? 10तुसा गैर यहूदी मणू मूसा रे कानून रे हिसाब कने दिन-बार, महीने, मौसम ते साल्लां जो मनदे। 11मैं तुसा रे कम्मां री वजह कने बड़ी फिकर बिच है कि जिन्नी मैहनत तुसा बिच कित्ती से कुथकी बेकार ना होई गे री हो। 12ओ संगी विश्वासियों, मैं तुसा सांई बणने तांइ यहूदी रीति-रीवाजां पर चलणा छड्डी दित्तेया, ते अवे मैं तुसा का बिनती करदा कि तुसा मेरे सांई बणो ते यहूदी रीति-रीवाजां पर चलणा छड्डी देयो। तुसा पैल्ले मेरे कने बड़े ठीक रे। 13तुसा जाणदे कि पैल्ले मैं सरीर री कमजोरी री वजह कने तुसा का आया ते तिय्यां ही मैं तुसा जो सुब बसेख सुणाया। 14हालांकि मेरी शरीरी कमजोरी तुसा तांइ परेसानी ही थी पर तुसा फिरी भी मेरे जो तुच्छ नी समजेया ते ना ही मेरे जो छड्डेया, पर तुसा ने मेरे जो इस तरिक्के कने अपणाया जिय्यां की परमेश्वर रे कुसकी स्वर्गदूत जो या फिरी अप्पु मसीह यीशु जो अपणाया हुंदा। 15तिस बेल्ले ता तुसा बड़े खुस थिये पर अवे तुसा री से खुसी कुते गई? मेरे जो इस गल्ल रा पक्का पता है कि तुसा मेरे तांइ किच्छ भी करी सकदे थिये, ते जे अगर मुमकिन हुंदा तां तुसा अपणी हाख्खियां भी मेरे तांइ देई दिंदे। 16इय्यां लगदा कि मैं तुसा कने सच बोलणे री वजह कने तुसा रा दुश्मण बणी गे रा है।
17गलत शिक्षा दैणे वाले मणू तुसा जो अपणा दोस्त ता बनाणा चाह्ंदे पर तिन्हेरा मकसद तुसा री भलाई नी है, तिन्हेरा मकसद तुसा जो मेरे का अलग करणा है ताकि तुसा बड़े जोस कने तिन्हेरी गल्लां मन्नों। 18ठीक मकसद तांइ हमेसा जोस बिच रैह्णा ता ठीक गल्ल है, ना की सिर्फ तिस बेल्ले जां मैं तुसा कने हुंदा। 19ओ मेरे प्रियों, जिय्यां कुसकी दुपराणी जनानी जो लोकिणे री पीड़ हुंदी, तिसी सांई मैं तुसा तांइ पीड़ सहन करेया करदा है। ते जां तांइ तुसा मसीह बिच पूरी तरह पकी नी जांदे, तां तांइ मेरे जो से पीड़ रैह्णी। 20मैं चाह्ंदा कि अवे तुसा का आई करी बड़े नरमी कने तुसा कने गल्ल करां किजोकी अवे मैं तुसा तांइ बड़ा वरी फिकरमंद है।
सारा हाजिरा रा उदारण
21तुसा जे मूसा रे कानून रे हिसाब कने जीणा चाह्ंदे, मेरी इक्क गल्ल सुणो, मैं तुसा जो दसदा कि मूसा रे कानून बिच कै लिख्खे रा है। 22पवित्रशास्त्र बिच ए लिख्खे रा है कि अब्राहम रे दो मुंडे थिये। तिस बिच का इक्क मुंडा जे हाजिरा का पैदा होया जे गुलाम थी, ते दुआ मुंडा जे सारा का पैदा होया जे गुलाम नी थी। 23जे मुंडा गुलाम जनानी का पैदा होया, से इक्क आम मुंडा थिया जे इक्क मणू री मर्जी कने पैदा होया। पर जे मुंडा तिस अजाद जनानी का पैदा होया जे अब्राहम री लाड़ी थी, से परमेश्वर रे अब्राहम कने कित्ते रे वादे री मुताबिक पैदा होया। 24ए दो जनानियां परमेश्वर रे दो वाचा रा इक्क उदारण सांई हिन। हाजिरा परमेश्वर रे तिस वादे सांई है जे तिन्हा ने इस्राएल रे लोक्कां कने सीने पहाड़ पर कित्तेया थिया। से वाचा लोक्कां जो गुलाम सांई बणाई दिंदी। 25इस बेल्ले रे यरुशलेम रे मणू यहूदी रीति-रीवाजां जो मनणे री वजह कने गुलाम सांई हिन। से मणू हाजिरा सांई गुलाम हिन जे अरब देस रे सीने पहाड़ जो दर्शांदी। 26पर अब्राहम री लाड़ी सारा स्वर्गीय यरुशलेम सहर जो दर्शांदी ते तिसेरी औलाद्दां अजाद हिन। ते ए यरुशलेम असा री मां सांई है। 27किजोकी पवित्रशास्त्र बिच लिख्खे रा है,
“ओ ओत्तर जनानी, तू जे बच्चे नी पैदा करदी, खुसी मना।
तू जिस जो लोकिणे री पीड़ नी हुंदी, गला खोल्ली करी जय जयकार कर।
किजोकी जे जनानी छड्डी दित्ती गई थी, तिसेरे बच्चे सुहागिन का भी जादा हिन।”
28ओ संगी विश्वासियों, असी इसहाक सांई हिन जो परमेश्वर रे वादे री औलाद है। 29पर अवे तुसा पर से मणू जुल्म करदे जे मणू चाह्ंदे कि तुसा मूसा रे कानून जो मन्नो, बिल्कुल तिय्यां ही जिय्यां इश्माइल ने जो इक्क मणू री मर्जी कने पैदा होया तिस इसहाक पर जुल्म कित्ता जे आत्मा री ताकत कने पैदा होया थिया। 30पर पवित्रशास्त्र बिच ए लिख्खे रा है,
“गुलाम जनानी ते तिसेरे मुंडे जो दुर भेज्जी देयो,
किजोकी गुलाम जनानी रे मुंडे जो प्यो री जायदाद बिच कोई विरासत नी मिलणा चाएदी,
से सिर्फ लाड़ी रे मुंडे जो मिलणा चाएदी जे गुलाम नी है।”
31ओ संगी विश्वासियों, आखिर बिच मैं ए बोलणा चाह्ंदा कि असी गुलाम जनानी रे मुंडे सांई नी हिन जे मूसा रे कानून जो दर्शांदी, पर असी अजाद जनानी रे मुंडे सांई हिन जे विश्वास जो दर्शांदी।
Currently Selected:
गलातियों 4: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
